Search form

SOERA ZINOENÕ 58

Sinoenõ 58.

I. Fangarõngarõ, bõrõ zalaw̃a samoejoeʼõ hoekoe. II. Fangandrõ, enaʼõ ifakiko ira Lowalangi.

1Chõ doeka wanoenõ andrõ, dali: ”Bõi fakiko”: chõ Dawido; oemanõ.

2I. Hadia, si ndroehoe satoelõ niw̃aʼõmi, jaʼami Lowalangi, no adõlõ wangoehoekoemi ono niha? (Sin. 82).

3Famoejoe saʼae mifachai tõdõmi, famalangõgõ itoelo tangami, ba danõ.

4Seboea horõ andrõ, ba no fabali, iʼotarai daloe ninara, ba solaoe faja andrõ, ba no eloengoe, iʼotarai waʼatoemboera.

5Timba zõfoe goelõ zõfoera andrõ, hoelõ zõfoe goelõ safiso, sanozo tõgi dalingania.

6Si lõ mamondrongo li zi fakelemoe, li zi no toʼõlõ fanaka. (Sangomb. 10, 11).

7II. He Lowalangi, teoe nifõra ba mbawara andrõ; rasa mboha nono zingo andrõ, jaʼoegõ Jehowa.

8Enaʼõ mangoeloe ira, enaʼõ tobali idanõ, sahele misa; na ifaoedoegõ nono wana andrõ chõnia, ba ja hoelõ nifaloʼo.

9Ja hoelõ mbaeʼa ira, sangoeloe barõ wananania andrõ, hoelõ dabina saechoe, si lõ mangila haga zi moloeo.

10Ja lõ fachamõ laʼila zodoi andrõ bowoami, ba ibõzini aoeri ia (Lowalangi).

11Omoeso dania dõdõ zatoelõ tõdõ, na iʼila wolaoe balõ andrõ; isasai dania gahenia ba ndro zeboea horõ andrõ.

12Ba lamane dania: ”Si ndroehoe, mobõli gõlõ zatoelõ tõdõ andrõ; tenga faja, so Lowalangi, sangoehoekoe ba goeli danõ. (Sin. 7, 9).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index