Search form

SOERA ZINOENÕ 68

Sinoenõ 68.

Fanoenõ Dawido, ba wemõna andrõ. I. Fanoeno Lowalangi, sanolo Iraono Gizeraëli. II. Famasoegi ba dõdõ femõna mbanoea Lowalangi, fõna. III. Femõna Lowalangi, weʼamõi ba niʼamoniʼõ andrõ.

(Faigi gõi Zam. II. 12, 26—31.)

1Chõ doeka wanoenõ andrõ; chõ Dawido; sinoenõ; oemanõ.

2I. Ja maoso Lowalangi, ja zoemaewe zi faʼoedoe chõnia, ja moloi zi fatioe tõdõ chõnia. (Moz. IV. 10, 35).

3Si mane simbo ba nangi, ja si manõ wamoloimõ jaʼira; si máne sigoesigoe, salaoe ba galitõ, waʼadoedoe zeboea horõ, fõna Lowalangi.

4Ba somoeso tõdõ zatoelõ andrõ, sowoeawoea tõdõ tánõ fõna Lowalangi, ba saʼiki ba waʼomoeso dõdõ andrõ.

5Misoeno Lowalangi, midoenõdoenõ dõinia andrõ; mifolala zanõrõ benoea andrõ; Jehowa dõinia. Ba miʼowoeawoeaʼõ dõdõmi tánõ fõnania! (Jes. 57, 14).

6Ama zi lõ ama, si lõ ina, ia, Lowalangi, ba nabiania niʼamoniʼõ andrõ. (Sin. 10, 14).

7Lowalangi, samaigi omo ba zi lõ omo; sangefaʼõ nikoeroe, solohe ba waʼohahaoe dõdõ; ba si lõ moloʼõ li, ba ba danõ si mate so nahiara.

8II. He Lowalangi, me mowaõwaõ ndraʼoegõ no, fõna mbanoeaoe, me õtõrõ danõ, (Moz. II. 13, 21. Sangoehoek. 5, 4. 5),

9ba hoemeoe danõ, ba mowõi gõi mbanoea si jaw̃a, tánõ fõna Lowalangi; ba daʼõ, ba hili Zinaʼi, fõna Lowalangi, Lowalangi Ndraono Gizeraëli andrõ. (Moz. II. 19, 16—18).

10No õtefe teoe sabõnõ dána chõoe andrõ, jaʼoegõ Lowalangi, hadia zi no õkõli, ba õʼokafoei.

11No monahia ba chõnia zato andrõ chõoe, no õhaogõ nahia zi noemana, ba waʼeboea dõdõoe andrõ, jaʼoegõ Lowalangi.

12Terongo li zi mõna, ibeʼe Soʼaja; ato sibai zangombacha toeria si sõchi, ira alawe. (Jes. 52, 7).

13Moloi razo zato, moloi, ba ifaosa nihalõ chõra ira alawe jomo.

14Na molombase ami ba gotaloea kandra mbiribiri, ba hoelõ gafi marafadi ami, sosõnõ wirõ; sosõnõ ganaʼa saʼoesõ mboera. (Sangoehoek. 5, 16).

15Me ifazawili ba daʼõ Si lõ ambõ faʼabõlõ razo andrõ, ba hoelõ nifazaewe bõtoea hili Zalomono.

16Hili chõ Lowalangi hili Mbazana andrõ; hili soja zoezoe hili Mbazana.

17Hana wa afõchõ dõdõmi, jaʼami hili soja zoezoe, ba hili andrõ somasi Lowalangi dadaomania? Ba lõ mamalõmalõ, wa nahia Lowalangi ia. (Sin. 132, 13).

18Koereta Lowalangi andrõ, ba no ba ngafoeloe ngahõnõ, mehõnõ wa hõnõ; no so ba chõra Zoʼaja: — hili Zinaʼi, niʼamoniʼõ. (Raz. II. 6, 17. Dan. 7, 10).

19No mõi mijaw̃a ndraʼoegõ, no õʼohe nikoeroe nikoerōē andrõ; no õtema gameʼela ba niha, he ba zi lõ moloʼõ li, enaʼõ lõ teboelõ Jehowa, Lowalangi. (Efes. 4, 8—10).

20Nisoeno Zoʼaja, ero maʼṍchõ iʼonoro noroda. Fangorifida Lowalangi.(Raz. I. 10, 13).

21Lowalangi wangorifi chõda, Lowalangi andrõ, ba Jehowa, Soʼaja andrõ, ba iʼila lala wangefa ba waʼamate.

22Si ndroehoe, iboto hõgõ zi fatioe tõdõ chõnia Lowalangi, ba alizoezoe zanõrõ lala horõ.

23No iw̃aʼõ Soʼaja: ”Oeʼohe mangawoeli ira, moroi ba Mbazana, moroi ba dojo nasi oeʼohe ira mijaw̃a.

24Enaʼõ õfemondri ba ndro gaheoe, ba enaʼõ moʼoeracha dõlõtõlõ nasoemõ, ba zi fatioe tõdõ chõoe.”

25III. No lõ laʼila, me õtõrõ, jaʼoegõ Lowalangi, me itõrõ Lowalangigoe andrõ, razogoe, weʼamõi ba niʼamoniʼõ andrõ. (Sam. II. 6, 13. 14. Sin. 24, 7. Moz. II. 15, 20).

26Mowaõwaõ, zanoenõ, ba itete, ba solaoe biola, ba hoenõ nono alawe, samõzi faritia.

27Misoeno Lowalangi, Soʼaja, ba gowoeloa andrõ; jaʼami si oroi goemboe Ndraono Gizeraëli andrõ! (Jes. 48, 1).

28So ba daʼõ Mbenijami, si achi andrõ, samatõrõ, ba salaw̃a Ndraono Joeda, sato andrõ chõra, ba salaw̃a Ndraono Zeboeloni ba salaw̃a Ndraono Nafetali.

29No iʼoroiʼõ Lowalangi waʼasalaw̃aoe. He Lowalangi, aʼaroʼõ nifaʼemaoe chõma!

30Bõrõ gosalimõ andrõ, ba Jeroezalema, wa laʼohe zoemange chõoe razo. (Sin. 72, 10. 15).

31Tenaw̃a zaliw̃aliw̃a andrõ, barõ zoechoe, awõ ngawawá zaw̃i si mantoea andrõ, awõ nono zaw̃i niha baero, enaʼõ mangaloeloe ira, wolohe boto wirõ. Fazawili soi andrõ, somasi manoewõ.

32So dania razo Miseraji; iʼaliogõ iʼoroʼõ dangania chõ Lowalangi tanõ Gaitiofia andrõ. (Jes. 19, 21. Sin. 87, 4).

33Jaʼami õri niha ba goeli danõ, misoeno Lowalangi, misoeno Zoʼaja!

34Misoeno zanõrõ banoea fondrege si jaw̃a andrõ, si no gõtõgõtõ faʼara; hiza, ifarongogõ linia andrõ, li sabõlõ.

35Mitehe chõ Lowalangi waʼabõlõ; famatõrõ Iraono Gizeraëli waʼasalaw̃ania andrõ ba famatõrõ banoea si jaw̃a waʼabõlõnia. (Sin. 29, 1).

36Sataʼoe ita nilaoe Lowalangi, moroi ba niʼamoniʼõ andrõ chõnia; Lowalangi Ndraono Gizeraëli andrõ zameʼe faʼabõlõ ba faʼabeʼe ba mbanoeania. Nisoeno Lowalangi! (Sin. 29, 11).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index