Search form

SOERA ZINOENÕ 69

Sinoenõ 69.

I. Fangarõngarõ zi gõna famakao, bõrõ Lowalangi. II. Fangandrõ fangorifi. III. Fanoeno Lowalangi.

1Chõ doeka wanoenõ andrõ, dali: ”Ladari mbõhõ.” Chõ Dawido.

2I. Orifido Lowalangi, iroegi saʼae nosogoe molõ andrõ!

3No alõmõ ndraʼo ba laza sabacha, si lõ danedane gahegoe; no oeroegi namõ nidanõ, ba itõrõ hõgõgoe molõ andrõ.

4Erege dõdõgoe weʼaogoe, no odoefodoefo dõlõtõlõgoe, alõ saʼae hõrõgoe wombalombaloi Lowalangigoe andrõ.

5Oja moroi ba rozi mboe ba hõgõgoe zi fatioe tõdõ chõgoe, lõ bõrõ; ato zamakiko jaʼo, si faʼoedoe chõgoe ba waja; labeʼe niʼaligoe zi tenga niraboegoe. (Sin. 35, 19. Joh. 15, 25).

6He Lowalangi, jaʼoegõ zangila wa si no ambõ tõdõ ndraʼodo, ba tenga si tobini chõoe lalõgoe andrõ.

7Bõi beʼe aila ba chõgoe andre zanõtõna chõoe, jaʼoegõ Soʼaja, Jehowa ngahõnõ andrõ! Bõi aila ba chõgoe andre zangaloei jaʼoegõ, jaʼoegõ Lowalangi Ndraono Gizeraëli!

8Bõrõ ndraʼoegõ, wa oetaha wangoʼaja, wa tobaloe mbawagoe faʼaila. (Sin. 44, 23).

9No tobali niha bõʼõ ndraʼo ba dalifoesõgoe, lõʼõ saʼae laʼilado ono ninagoe andrõ. (Sin. 38, 12. Job. 19, 13).

10Noa saʼae iʼado fõnoe andrõ, ba nomomõ ba no gõnado fangoʼaja zangoʼaja jaʼoegõ andrõ. (Joh. 2, 17. Rom. 15, 3).

11Meʼe dõdõgoe ba lõ mangamangado, ba tobali fangoʼaja jaʼodo.

12Oeʼonoecha gonigoni, ba tobali amaedola ndraʼo chõra.

13Lafatooe ndraʼo sidadao ba mbawa gõli ba samadoemadoe toeo, na manoenõ. (Job. 30, 9).

14II. Ba jaʼodo, ba chõoe oetandrõsaigõ wangandrõgoe, jaʼoegõ Jehowa, na baw̃a waʼeboea dõdõoe; he Lowalangi, ba waʼabõlõ waʼeboea dõdõoe andrõ tema ligoe fanolooe andrõ, si lõ farõi! (Jes. 40, 8).

15Sõbi jaw̃a ndraʼo moroi ba laza andre, fa bõi alõmõ ndraʼo; enaʼõ aefa ndraʼodo ba zi fatioe tõdõ chõgoe ba ba namõ nidanõ andre.

16Bõi beʼe itõrõ hõgõgoe jaw̃a molõ ba bõi beʼe ahõndrõ ndraʼo ba namõ, ba bõi tehe idoehõ mbawania jaw̃agoe kohokoho.

17Fondrondrongo ligoe, Jehowa, omasiõ sa waʼeboea dõdõoe andrõ, otahõgõ ndraʼo, ba waʼahachõ dõdõoe andrõ, si no eboea.

18Ba bõi biniʼõ mbawaoe chõ genonioe andre; sataʼoe saʼae ndraʼodo; taʼitaʼi fondrondrongo chõgoe!

19Hatõʼõgõ ba dõdõgoe, orifi; efaʼõ ndraʼodo, bõrõ zi fatioe tõdõ andrõ chõgoe.

20Jaʼoegõ zangila fangoʼaja jaʼo andrõ ba faʼailagoe ba fahõwõsa andrõ, nilaoe chõgoe; no so ba gametahõoe zamakao jaʼo fefoe.

21Matedo ibeʼe fangoʼaja andrõ, oeʼofõchõi; oebazebazeʼõ waʼahachõ dõdõ, ba lõʼõ, ba sondrara tõdõ, ba lõ faloecha. (Ngen. Jer. 1, 2. 9).

22Labeʼe õgoe gawõchoe, ba me owõchi dõdõgoe ba lafabadoegõ chõgoe niro aisõ. (Mat. 27, 34. 48).

23Ja tobali fesoe naha gõra fõnara, ja tobali tandraw̃a ba zi lõ faʼaboe dõdõ! (Rom. 11, 9. 10).

24Ja ndroendroemõ hõrõra, fa bõi laʼila niha, ja mangiwangiwa zolara, si lõ mamalõmalõ!

25Hawoei ira bachoebachoe dõdõoe andrõ, jamoechamõ ira holahola wõnoemõ andrõ!

26Ja adoedoe nahiara, ja lõ niha ba nosera andrõ! (Hal. zin. 1, 20).

27Me no solohi nibagooe andrõ ira, ba sanoetoenõ faʼafõchõ zesocho chõoe. (Jes. 53, 4).

28Nõnõ horõ horõra andrõ, ba bõi beʼe lachamõ waʼatoelõ andrõ fõnaoe, (Rom. 1, 24).

29Niboenoe dõira ba zoera waʼaoeri andrõ, ba tebai tetanõ ba zoera dõira, awõ dõi zatoelõ. (Loek. 10, 20).

30Ba jaʼodo, ba no si noemana ba si no fahõna faʼafõchõ, ba folohe jaw̃a jaʼo wangorifi andrõ chõoe, jaʼoegõ Lowalangi.

31III. Daʼoesoeno dõi Lowalangi ba wanoenõ, oeʼeboeaʼõ doeriania fangandrõ saoha gõlõ.

32Daʼõ zomasi Jehowa, moroi ba zaw̃i si matoea, moroi ba nono zaw̃i si so tandroe ba saʼa. (Sin. 50, 8—14).

33Laʼila si noemana ba omoeso dõdõ; jaʼami, sangaloei Lowalangi, ja aoeri dõdõmi! (Sin. 22, 27).

34Ifondrondrongo sa Jehowa li zi noemana, ba lõ iʼositengagõ nikoeroe andrõ chõnia.

35Jamoesoeno ia banoea si jaw̃a ba tanõ ba asi, awõ zaliw̃aliw̃a bacha, fefoe!

36Itolo sa Ziona Lowalangi ba ifoeli itaroeʼõ mbanoea Ndraono Joeda, ba monahia ira ba daʼõ, ba chõra saʼae.

37Ba latema ondrõita maʼoewoe genoninia, ba somasi tõinia zi soso ba daʼõ dania.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index