Search form

SOERA ZINOENÕ 7

Sinoenõ 7.

I. Fangandrõ fangatoelõ, ba zamakao andrõ. II. Idõnadõna chõ Lowalangi sangandrõ andrõ.

1Fangarõngarõ Dawido chõ Jehowa, bõrõ niw̃aʼõ Choesi andrõ, mado Mbenijami. (Sam. I. 24, 10; 26, 19. Sam. II. 16, 5—11).

2I. He Jehowa, Lowalangigoe, saw̃atõgoe ndraʼoegõ, tolodo, ba zolohi jaʼo andrõ fefoe, ba orifido!

3Fa bõi isasawi dõdõgoe, si mane singo, fa bõi ifoefoe, lõ sangorifi. (Sin. 10, 8. 9).

4He Jehowa, Lowalangigoe! Na no atṍ oelaoe zi manõ, na no togoele ba dangagoe zi lõ atoelõ, (Job. 31, 7—34).

5Na no oelaoe zi lõ sõchi, ba zi sõchi tõdõ chõgoe, ba na no oeʼalani noedoegoe, lõ bõrõbõrõ,

6ba jamoegohi nosogoe si fatioe tõdõ andrõ, ba jamoeraʼoe, jamoehoendragõ tooe nosogoe, jamoetooeʼõ ba danõ lachõmigoe andrõ.

7Faoso, Jehowa, ba wõnoemõ andrõ! fazaw̃aʼõ, ba wolaw̃a woʼotoe dõdõ zamakao jaʼo; faoso, ondrasido! noa sa õhonogõi hoekoe.

8Ndramoefasoei ndraʼoegõ ngahõnõ soi, ba foeliʼõ mijaw̃a, jaw̃ara.

9Ihoekoe soi niha Jehowa. Hoekoe ndraʼo, Jehowa, dali waʼatoelõgoe ba faʼadõlõ dõdõgoe! (Sin. 18, 21—27).

10Enaʼõ tebato walõsõchi ba zi lõ sõchi andrõ; abeʼeʼõ zatoelõ tõdõ! Jaʼoegõ zanechegõ tõdõ, awõ mboea, jaʼoegõ, Lowalangi satoelõ. (Sin. 104, 35. Jer. 11, 20; 17, 10. Fam. 2, 23).

11II. Lowalangi zolohe baloese chõgoe, itolo zadõlo tõdõ. (Sin. 3, 4).

12Sangoehoekoe si no atoelõ Lowalangi, Lowalangi sametaʼoe niha, ero maʼṍchõ. (Sin. 9, 5).

13Na so zi lõ mamalalini eraʼerania, ba no idali wõdania, ba no ichai wanania ba italini. (Moz. V. 32, 41. Ngen. Jer. 2, 4; 3, 12).

14Ifaoedoegõ ono wana famoenoe zi manõ, ifoʼalitõ nono wana andrõ chõnia.

15Hiza, so zi lõ sõchi ba dõdõ zi manõ. No abeto ia famakao, ba iʼadonogõ waja.

16No ichao lõsoelõsoe, no iʼabachaʼõ, ba jaʼia zaechoe bacha, ba lõsoelõsoe andrõ, nichaonia. (Amaed. 26, 27).

17Ba hõgõnia mangawoeli wamakao andrõ chõnia, ba galizoezoenia gõna dania horõnia andrõ.

18Ba jaʼo, ba oeʼandrõ saoha gõlõ chõ Jehowa, dali waʼatoelõnia andrõ, ba oesoeno dõi Jehowa, Fondrege zalaw̃a.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index