Search form

SOERA ZINOENÕ 72

Sinoenõ 72.

I. Razo waʼohahaoe dõdõ andrõ, seboea. II. Faʼasalaw̃a si lõ teboelõ waʼasalaw̃ania.

Chõ Zelomo.

1I. He Lowalangi, beʼe chõ razo wangoehoekoe andrõ chõmõ; ba chõ nono razo andrõ beʼe waʼatoelõmõ.

2Enaʼõ iʼatoelõʼõ wangoehoekoe banoeamõ andrõ, ba enaʼõ iʼohe ba waʼadõlõ wangoehoekoe si noemana.

3Enaʼõ mowoea faʼohahaoe dõdõ hili ba mbanoeamõ andrõ, awõ hilihili andrõ, ba waʼatoelõ. (Sin. 85, 9—14).

4Jamoeʼohe ba waʼatoelõ hoehoeo zaboe tõdõ ba mbanoea, jamoetolo nono zi noemana, ba jamoefoefoe zamalangõgõ awõra. (A. 12).

5Ndramoeʼataʼoefi ndraʼoegõ gõtõ waʼara loeo, ba gõtõ waʼara mbaw̃a, gõtõgõtõ waʼara.

6Ja noemalõ mitooe, si máne teoe, ba mbenoea, si bohooe lasabi doeʼoe, si máne teoe sabõlõbõlõ andrõ, fombasõi danõ.

7Ja mobowo zatoelõ tõdõ andrõ ba gõtõnia, ja fahõna waʼatoelõ, iroegi lõ baw̃a saʼae.

8Ja salaw̃a ia, iʼotarai nasi, noemalõ ba nasi ba zi tambai, ba iʼotarai mboto nidanõ, noemalõ ba wondrege danõ. (Sach. 9, 10).

9Ja mangaloeloe chõnia zowanoea ba danõ si mate, ja lafelai gawoegawoe si fatioe tõdõ chõnia. (Jes. 49, 23).

10Ndramoefosoemange ia razo Darisi andrõ, awõ razo ba hoelõ, ndramoeʼohe gameʼela razo Zaba ba razo Zeba andrõ. (Sin. 68, 30. Jes. 60, 9).

11Ba latoehi danõ fõnania razo fefoe, mõi enoninia dozi niha baero. (Sin. 2, 8. 10—12).

12Iʼorifi zi noemana, na iʼangarõfi li ia, ba saboe tõdõ, si lõ sanolo. (Job. 36, 15. Sin. 35, 10).

13Ihachõsi tõdõ zi lõ tõi ba si noemana ba idooeʼõ noso zi noemana.

14Iʼefaʼõ nosora ba wamakao ba ba wamalangõgõ; eboea mbõli ndrora wamaiginia. (Sin. 9, 13).

15II. Ba saoeri ia: ba labeʼe soemangenia ganaʼa Zaba andrõ õsa, ba lõ mamalõmalõ wangandrõ, salahinia, ero maʼṍchõ lasoeno ia. (A. 10. Sin. 84, 10).

16Fahõna mboea nowi ba danõ, ba hili jaw̃a; moeroeroe mboeania, si máne ba hili Libano; mobowo ira, iʼoroi mbanoea, si máne sinanõ ba danõ.

17Si lõ teboelõ dõinia; gõtõ waʼara loeo jaw̃a mamadomadohoe dõinia, ba ba chõnia lafahowoeʼõ ira niha, lasoeno dania ia dozi, niha baero, wa no sohahaoe tõdõ ia. (Moz. I. 12, 3; 22, 18).

18Nisoeno Jehowa, Lowalangi andrõ, Lowalangi Ndraono Gizeraëli; ha jaʼia zolaoe sahõlihõli dõdõ.

19Ba nisoeno dõinia soadoe andrõ, iroegi zi lõ aetoe. Ja anõnõ danõ maʼasagõrõ lachõminia andrõ! Ja doehoe, Ja doehoe! (Sin. 41, 14. Jes. 6, 3).

20Awai wangandrõ Dawido andrõ, ono Gizaʼi.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index