Search form

SOERA ZINOENÕ 73

III.

Sinoenõ 73.

I. Fangiwa dõdõ ba wamaigi faʼohahaoe dõdõ zanao horõ. II. Si lõ sõchi loealoeara ba aro dõtõnafõ zatoelõ tõdõ.

Sinoenõ; chõ Gasafo.

(Faigi gõi Sin. 37. 49. Soera Jobi.)

1I. Si ndroehoe, eboea dõdõ Lowalangi ba Ndraono Gizeraëli, ba zohaoehaoe tõdõ andrõ.

2Ha maʼifoe tõ, ba mangiwa menaʼõ gahegoe; ezai moetõ tõ, ba ahele ndraʼo. (Sin. 94, 18).

3Afõchõ saʼae dõdõgoe ba zi fajaw̃a andrõ, me oeʼila waʼohahaoe dõdõ zeboea horõ andrõ. (Job. 21, 7).

4Lõʼõ sa faʼafõchõ chõra, iroegi mate ira, ba soʼõsi mbotora.

5Lõ saboe dõdõra, si máne ba niha bõʼõ; ba lõ tefakao ira, si máne awõra.

6Ba daʼõ moroi, wa no hoelõ naja ba mbagi chõra hocha andrõ, awõ wa no hoelõ mbaroera wamakao awõra.

7No ahõndrõ hõrõra, ba waʼesolo mbawara; falawoe nifachai dõdõra andrõ. (Job. 15, 27).

8Mangoʼaja ira ba itõrõ lira wamalangõgõ awõra, ba walõsõchira andrõ; fajaw̃asa wehedera andrõ.

9Lafajaw̃a mbawara, iroegi mbanoea si jaw̃a ba itõrõi goeli danõ lelara.

10Andrõ gõi laʼoʼõ chõra banoea, ba lõ ambõ õra idanõ.

11Ba lamane: ”Hana wa iʼila Lowalangi? Hadia, so wangila chõ Wondrege zalaw̃a andrõ?” (Sin. 10, 11).

12Hiza, daʼõ zeboea horõ andrõ; lahõna ganaʼa, ba wa lõ mamalõmalõ waʼohahaoe dõdõ.

13Ba he wisa, zajazaja gõlõ, wa no oeʼohaoehaoeʼõ dõdõgoe, wa oesasai dangagoe ba wa lõ sala?

14Ba hadia, nifakao ndraʼo, ero maʼṍchõ, ba ero mahemoloe so wotoegoe?

15Na oew̃aʼõ menaʼõ tõdõgoe: ”Oemanõ gõi wehede,” ba hiza, ba no farõi ndraʼo ba ngaʼõtõ nonooe andrõ.

16II. Ba no mangerangera ndraʼo, enaʼõ aboto ba dõdõgoe, ba aboe dõdõgoe, wamaigigoe jaʼia.

17Irege mõido ba niʼamoniʼõ andrõ chõ Lowalangi, wanõngõni amozoeara.

18Si ndroehoe, no õfataro ira ba zaelo tanõ, alaoe ira obeʼe, enaʼõ afoefoe.

19Ha lõ alio adoedoe ira, si lõ moedõnadõna, no tekiko ira, no aetoe, ba gametaʼoeõ.

20Õtajaigõ ba dõdõoe chalachalara, jaʼoegõ Soʼaja, na tokeaʼõ; hoelõ wangifi, na aefa wemõrõ.

21Me abao dõdõgoe ba me manõgi ba mboeagoe,

22ba sambõ tõdõ ndraʼo ba lõ saboto ba dõdõgoe; hoelõ zaliw̃aliw̃a ba danõ ndraʼo fõnaoe.

23Ba lõʼõ zoei oerõi ndraʼoegõ; jaʼoegõ zolohe tangagoe kambõlõ.(Rom. 8, 35—39).

24Õfasao ndraʼo, balazi dõdõoe, ba õtema ndraʼo dania, fao zoemange.

25Ha niha chõgoe ba zoroego? Ba na chõgoe ndraʼoegõ, ba lõ hadia ia zomasido ba goeli danõ.

26Alacha alõ nõsigoe ba alacha ariri dõdõgoe; weʼeweʼe dõdõgoe Lowalangi ba oerachagoe, iroegi zi lõ aetoe.(Sin. 16, 5).

27Hiza sa, tekiko zangerogõ jaʼoegõ; õhori fefoe zi farõi chõoe.

28Ba chõgoe, ba faʼohahaoe dõdõ, na fabõbõ ndraʼo chõ Lowalangi, chõ Zoʼaja, Jehowa manõtõna ndraʼo, ba wanoetoenõ folaoenia andrõ, fefoe.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index