Search form

SOERA ZINOENÕ 76

Sinoenõ 76.

Fanoeno Lowalangi, me no ilaw̃a zi faʼoedoe.

1Chõ doeka wanoenõ andrõ; nilaoe biola; sinoenõ; chõ Gasafo; oemanõ.

2No teʼila Lowalangi ba Ndraono Joeda; no eboea dõinia ba Ndraono Gizeraëli.

3Ba Zalema so nosenia ba ba Ziona nahiania. (Sin. 132, 13).

4Ba daʼõ ifatõ no gari wana andrõ ba baloese ba fõda, ba no iʼetoeʼõ wanoewõ. (Sin. 46, 10).

5Si takile ndraʼoegõ, si so lachõmi, moroi ba hili woraboe andrõ.

6No teʼosindraʼoei gamagama zabõlõ andrõ; no alaoe hõrõra, mõrõ, ba no adada danga zabeʼe fanoewõ, fefoe.

7Ba wanegoemõ andrõ, jaʼoegõ Lowalangi Jakobo, tehawoe femõrõ goereta, awõ koedo.

8Sataʼoe ita ndraʼoegõ, jaʼoegõ andrõ; ha niha zanaha chõoe, na tesao wõnoemõ.

9No õfarongogõ wangoehoekoe moroi ba zoroego, ba tokea goeli danõ ba lõ hedehede, (Sin. 46, 11. Hab. 2, 20),

10me maoso Lowalangi, ba wangorifi si noemana ba goeli danõ, fefoe.

11Isoeno sa ndraʼoegõ fõnoe niha andrõ, ba õhalõ bõbõ taloemõ zi tosai fõnoe andrõ.

12Mifaboeʼoe zoemange chõ Lowalangimi Jehowa, ba miboeʼa gõi; dozi si tefasoei jaʼia, ba ndramoeʼohe gameʼela chõ zataʼoe ita andrõ! (Moz. II. 15, 11. Moz. V. 7, 21).

13Sangohori faʼabeʼe dõdõ ba zeboea, ba sataʼoe zalaw̃a ba goeli danõ.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index