Search form

SOERA ZINOENÕ 78

Sinoenõ 78.

Famahaõ. Famasoegi ba dõdõ famatõrõ Lowalangi Iraono Gizeraëli.

(Faigi gõi Zin. 105. 106.)

Famahaõ; chõ Gasafo.

1Mifondrondrongo, jaʼami banoeada, wamahaõgoe andre, mibeʼe mbõrõ dalingami ba daroma ligoe andre.

2Daʼoebokai mbawagoe, ba wolaoe amaedola, daʼoetoenõ dahõdahõ, si oroi gõtõ fõna saʼae. (Sin. 49, 4. 5. Mat. 13, 35).

3Si no tarongo, si no itõrõ, nidoenõdoenõ ndra amada chõda.

4Ba lõ tabiniʼõ ba maʼoewoera wanoetoenõ ba gõtõ dania toeria Jehowa andrõ ba faʼabõlõnia ba sahõlihõli dõdõda chõnia, nilaoenia.

5Noa sa iʼasogõ wamadoehoeʼõ ba Ndraono Jakobo, ba no ibeʼe goroisa ba Ndraono Gizeraëli, niʼoroiʼõnia chõ ndra toeada, enaʼõ laʼombachaʼõ ba ndraonora.

6Enaʼõ laʼila ba gõtõ dania, iraono andrõ, si toemboe dania, ba enaʼõ maoso daʼõ, ba wanoetoenõ mitooe, ba ndraonora.

7Enaʼõ tõtõnafõra Lowalangi, ba bõi olifoe ira zeboea andrõ, nilaoe Lowalangi, ba enaʼõ laʼoʼõ goroisania.

8Ba bõi si mane ira toeara ira, niha si farõi ba samadaõ li; niha si lõ aro tõdõ, saefaʼaefa eraʼera chõ Lowalangi. (Moz. V. 32, 5. 6).

9Iraono Geferaji andrõ, solohe fana, ba wafanata, ba no moloi, me loeo wanoewõ.

10Labõhõi wawoeʼoesa li andrõ chõ Lowalangi ba lõ edõna latõrõ lala andrõ chõnia, ba goroisa.

11Olifoe ira nilaoenia andrõ ba sahõlihõli dõdõ andrõ, nifaʼeleʼõnia chõra.

12No ilaoe zahõlihõli dõdõ ba zi so ira toeara, ba danõ Miseraji, ba zaloʼo ba Zoana. (Jes. 19, 11).

13No ifabali nasi, ifatõrõ ira; iʼabeʼeʼõ nasi, hoelõ mbaʼabaʼa [fatambai]. (Moz. II. 14, 21. 22).

14Ba ifasao ira, lawoeo, na maʼṍchõ, ba sara wongi dania, ba haga galitõ. (Moz. II. 13, 21).

15Isila gara ba danõ si mate andrõ, ifabadoegõ chõra zi hoelõ nidanõ seboea. (Moz. II. 17, 6; Moz. IV. 20, 7—11).

16Ifangoemboe mbombo moroi ba gara, ifangele nidanõ, si hoelõ nidanõ seboea.

17Ba latohoegõ zoei wamazõchi horõ chõnia ba fangandrõ fõnoe Wondrege zalaw̃a, ba danõ si mate.

18Latandraigõ Lowalangi tõdõra, wangandrõ gõ somasi ira. (Moz. II. 16, 3. Moz. IV. 11, 4).

19Lafatooe Lowalangi, lamane: Hadia, iʼila Lowalangi ifaʼoli gõda, ba danõ si mate?

20Hiza, no ibõzi gara, ba mangoemboe nidanõ chõnia, ahele, moʼoengo; hadia, iʼila gõi ibeʼe gõda? Hadia iʼila iʼasogõ ndriwo mbanoeania?”

21Andrõ mofõnoe Jehowa, me irongo daʼõ, ba hoemola galitõ ba Ndraono Jakobo, tesao wõnoe ba Ndraono Gizeraëli. (Moz. IV. 11, 1).

22Me lõ mamati ira ba li Lowalangi andrõ, ba me lõ latõtõna wangorifi andrõ chõnia.

23Ba iʼoroiʼõ ba lawoeo si jaw̃a, ibokai mbawandroehõ mbanoea si jaw̃a.

24Moteoe ”mana” ba chõra ibeʼe, enaʼõ laʼā, ibeʼe chõra mbõra mbanoea si jaw̃a. (Moz. II. 16, 4. 14. 15).

25Õ malaʼika gõra, dozi ira; no ifaʼoheʼõ chõra mbalazo, fahõna.

26Ifasoegi nangi moroi ba gatoemboecha ba mbanoea, ba ifatõrõ nangi moroi raja, ba waʼabõlõnia andrõ.

27Moteoe diwo ba chõra, ibeʼe, hoelõ gawoegawoe, ba fofo soʼafi, hoelõ nene ba mbewe nasi.

28Ba daloe golombasew̃ara iʼechoegõ, tefasoei nahiara.

29Ba laʼā, ba maoeloe waʼaboesora; ibeʼe chõra zomasi ira.

30Ba lõ si dõhõ na wangisõra andrõ, so na ba mbawara gõra andrõ,

31ba tesao wõnoe Lowalangi chõra, ba iboenoe zesolo andrõ chõra õsa ba ibõzi tooe nono matoea Ndraono Gizeraëli. (Moz. IV. 11, 33).

32Ba latohoegõ wanao horõ, lõ lai daʼõ, lõ mamati ira ba zahõlihõli dõdõ andrõ chõnia.

33Ba ibeʼe tajataja mbaw̃ara, tobali angi, ba dõfira, ba sataʼoe ita waʼalio. (Moz. IV. 14, 23).

34Na iboeboenoe ira, ba lazofoezofoe ia; lafoeli ira, ba laforege wangaloei Lowalangi.

35Ba itõrõ tõdõra, wa no weʼeweʼe dõdõra Lowalangi, wa sangorifi jaʼira Lowalangi Fondrege zalaw̃a andrõ.

36Ba lahaogõhaogõ mbewera chõnia, ba lelara, ba solaoe faja chõnia.

37Ba lõ aro dõdõra chõnia, si farõi ira, ba wawoeʼoesa li andrõ chõnia.

38Ba jaʼia, ba sahachõ tõdõ, iʼefaʼõ lalõra andrõ ba lõ ifakiko ira; asese iʼalõsi wõnoenia, ba lõ iforege wamaosi tõdõnia.

39Itõrõ sa tõdõnia, wa no õsi niha ira, wa angi, silalõ misa ba si lõ mangawoeli. (Sin. 103, 14—16).

40Ha me oega molaw̃a ira chõnia, ba danõ si mate andrõ, ha me oega laboesi dõdõnia ba danõ si lõ nihaniha! (Moz. IV. 14, 22).

41Lõ dõhõ latandraigõ Lowalangi, afõchõ bacha dõdõ niʼamoniʼõ ba Ndraono Gizeraëli, labeʼe.

42Lõ itõrõ tõdõra waʼabõlõ dangania, ba he baw̃a andrõ, me iʼefaʼõ ira ba danga nemalira.

43Me ilaoe dandra andrõ chõnia, ba danõ Miseraji ba sahõlihõli dõdõ andrõ, ba ndraso Zoana. (A. 12).

44No ibaliʼõ do nidanõ seboea chõra, awõ mbombo, fa tebai labadoe. (Moz. II. 7, 19. 20).

45Ifaʼamõi chõra ndri manoe, si manga jaʼira; ba talaho, famakikora. (Moz. II. 8, 2. 20).

46Ibeʼe õ lamanoea mboea danõ chõra, ba õ damo gõlõra. (Moz. II. 10, 13).

47Ifabõziʼõ nagoe chõra teoe kara, ba boea ara chõra teoe sabeʼe. (Moz. II. 9, 25).

48Gõna teoe kara georifõra ibeʼe, ba gõna zaerezaere mbiribirira ba saw̃ira.

49Ifatõrõ chõra holahola wõnoenia andrõ ba faʼabao dõdõ ba bachoebachoe dõdõ ba famakao, awõ ngawawá malaʼika samakiko.

50Ifolala wõnoenia andrõ, lõ itimba waʼaetoe nosora, iloeloe ba wõchõ waba. (Moz. II. 9, 15).

51Ibõzi fefoe nono si aʼa ba danõ Miseraji, si aʼa zabõlõ andrõ ba nose maʼoewoe Chamo. (Moz. II. 12, 29).

52Ba awoeʼa mbanoeania andrõ, hoelõ mbiribiri, ibeʼe, ba ifasao ira, hoelõ nikoebaloi, ba danõ si mate andrõ. (Sin. 77, 21).

53Ihaogõ wolohe jaʼira, fa bõi ataʼoe ira; ba emalira andrõ, ba no ibaloegõ asi. (Moz. II. 14, 19. 22. 27).

54Ba iʼohe ira ba danõ niʼamoniʼõ andrõ chõnia; ba hili andre, niʼochõgõ gambõlõnia. (Moz. II. 15, 17).

55Ba itimba fõnara niha baero andrõ; ifaosa tána chõra ba dahõdahõ, ifatewoe ba nosera mado Ndraono Gizeraëli andrõ.

56Ba latandraigõ Lowalangi Fondrege zalaw̃a, laʼandrõ wõnoenia, ba lõ laʼoʼõ wamadoehoeʼõ andrõ chõnia.

57Laʼerogõ [Lowalangi], fabali, si mane ira toeara; labaliʼõ ira foeri, hoelõ wana si falimo. (Hos. 7, 16).

58Ba labaosi dõdõnia, ba hilihili andrõ chõra, afõchõ bacha dõdõnia, labeʼe ba nadoera andrõ. (Moz. I. 32, 21).

59Ba irongo Lowalangi, ba mofõnoe ia, ba ifaoeloegõ iʼerogõ Ndraono Gizeraëli.

60Ba ibõhõli nahiania andrõ ba Zilo, ose andrõ, si sosó ia ba niha. (Sam. I. 1, 3; 4, 11).

61Ba ibeʼe niraboe waʼabõlõnia andrõ; lachõminia andrõ [tawõla gamaboeʼoela li], ba iloeloe ba danga nemali.

62Ba itooeʼõ ba mbawa ziʼõli mbanoeania andrõ, mofõnoe ia ba dána chõnia.

63Ono matoea andrõ chõnia, ba iʼā alitõ, ba lõ faloecha wanoenõ ba walõw̃a nono alawe chõnia.

64Mate niʼõʼõtõ gere andrõ chõnia, ba lõ mangeʼesi lacha mbanoea. (Sam. I. 4, 17. 20).

65Ba tokea Zoʼaja, hoelõ zi no mõrõ, hoelõ zabõlõ, si karaini waʼiki, wamadoe agoe.

66Ba itimba nemalinia andrõ; aila ira, si lõ aetoe, ibeʼe.

67Ba iʼerogõ nose Ndraono Jesefo andrõ, tenga mado Geferaji nitoejoe. (A. 9).

68Mado Joeda saʼae itoejoe, hili Ziona andrõ, somasi ia. (Ngaʼõt. II. 6, 6).

69Ba ilaoe niʼamoniʼõ andrõ chõnia, timba waʼalaw̃a mbanoea si jaw̃a waʼalaw̃a, si mane tanõ andrõ, nilatania, si lõ teboelõ.

70Ba itoejoe genoninia andrõ, Dawido andrõ, ba zinga kandra mbiribiri ihalõ. (Sam. I. 16, 11. 12).

71Ba nikoebaloinia biribiri si bohooe moʼono ihalõ, enaʼõ ikoebaloi mbanoeania, maʼoewoe Jakobo, tána chõnia andrõ, Iraono Gizeraëli. (Sam. II. 7, 8).

72Ba ikoebaloi ira, dali waʼadõlõ dõdõnia andrõ; ba enahõi dangania, wolohe jaʼira.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index