Search form

SOERA ZINOENÕ 83

Sinoenõ 83.

Fangandrõ chõ Lowalangi, ba wanolo, ba zi faʼoedoe ba mbanoeania andrõ.

1Sinoenõ; chõ Gasafo.

2He Lowalangi, bõi si lõ liw̃aliw̃a ndraʼoegõ, bõi si lõ hedehede, ba bõi sahono manõ, jaʼoegõ Lowalangi!

3Hiza sa, fagoeagoea zi faʼoedoe chõoe, ba fajaw̃a zi fatioe tõdõ chõoe.

4Laʼaloei lala, ba wangalani banoeaoe, laʼonechesi; mamagõlõ ira, ba wolaoe ba nirorogõmõ andrõ. (Sin. 27, 5; 35, 20).

5Lamane: ”Talaboe! tahori ira, enaʼõ adoedoe ira, enaʼõ lõʼõ saʼae itõrõ tõdõ niha Ndraono Gizeraëli andrõ.”

6Mamagõlõ saʼae ira, ha sara dõdõ, lafabõbõ ira oedoemõ.

7Õsi nose Ndraono Gedomo andrõ ba õsi nose Ndraono Zimaʼeli. Iraono Moabi ba maʼoewoe Hagara;

8Iraono Gebala ba Iraono Gamoni ba Iraono Gamaleki ba Dawa Wilisiti, fabaja banoea Diro andrõ.

9Ba no lafabõbõ ira gõi chõra Dawa Asiria andrõ, no tobali taʼio maʼoewoe Loti ira.

10Laoe chõra, si máne folaoemõ ba Ndraono Midiano no, si mane chõ Zisera ba si mane chõ Jabino no, ba mbewe Gizona! (Sangoehoek. 7, 22; 4, 15. 21. 23).

11Nihori no ba Gendrora, si no tobali obooela, fangatabõ zinanõ ba danõ.

12Fatõrõ ba zalaw̃ara nifatõrõ chõ Gorebi no ba chõ Zebi ba chõ Zeba ba chõ Zalamoena, ba nibajoini andrõ chõra, fefoe. (Sangoehoek. 7, 35; 8, 21).

13Sangoemaʼõ: ”Tahalõ chõda naha Lowalangi.” (Sin. 74, 8).

14He Lowalangigoe, baliʼõ zi hoelõ tawoejoe nangi ira, si máne dami wache ba nangi.

15Si mane alitõ, na achozi gatoea, ba si máne holahola galitõ, na itõrõ hili.

16Õmanõ wolohi jaʼira angi andrõ chõoe, ba õfetaʼoe ira angi sabõlõ chõoe.

17Hawoei mbawara faʼaila, enaʼõ lasofoe dõimõ, jaʼoegõ Jehowa.

18Alacha aila ira, ba alacha tobali dõdõra, si lõ mamalõmalõ; hana na aila ira ba hana na tekiko.

19Ba acha aboto ba dõdõra, wa no ha jaʼoegõ zotõi Jehowa, wa ha jaʼoegõ Wondrege zalaw̃a ba goeli danõ maʼasagõrõ. (Hos. 12, 6).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index