Search form

SOERA ZINOENÕ 86

Sinoenõ 86.

I. Fangandrõ ba waʼaboe dõdõ. II. Fanoeno Lowalangi, si no ahachõ tõdõ.

Fangandrõ Dawido.

1I. Beʼe mbõrõ dalingaoe, jaʼoegõ Jehowa, ba fondrondrongo chõgoe; no saboe tõdõ ndraʼo ba si noemana.

2Rorogõ nosogoe, me no satoelõ tõdõ ndraʼo; tolo genonimõ, sanõtõna chõoe, jaʼoegõ Lowalangigoe! (Sin. 18, 21—27).

3Hachõsi tõdõ ndraʼo, Soʼaja, chõoe sa moeʼao ndraʼo, maʼõmaʼõchõ. (Sin. 6, 3).

4Omoesoiʼõ dõdõ genonioe; chõoe sa oefaõga dõdõgoe, Soʼaja.

5Me no si sõchi tõdõ ndraʼoegõ, ba me sebolo tõdõ, jaʼoegõ Soʼaja, ba me no fahõna waʼeboea dõdõoe ba zi angarõfi li jaʼoegõ, fefoe. (A. 15).

6Beʼe ba dõdõoe wangandrõgoe, Jehowa, ba fondrondrongo li weʼaogoe andre.

7Oeʼangarõfi li ndraʼoegõ, na baw̃a waʼafõchõ chõgoe, õfondrondrongo sa ligoe. (Sin. 50, 15).

8Lõ Lowalangi si mane jaʼoegõ, jaʼoegõ Soʼaja, ba lõ si mane folaoemõ andrõ. (Sin. 71, 19).

9Dozi soi, niwõwõimõ andrõ, ba mõi dania mangaloeloe chõoe, jaʼoegõ Soʼaja, awõ wamosoemange tõimõ andrõ.

10Me no seboea ndraʼoegõ ba me solaoe sahõlihõli dõdõ; ha jaʼoegõ Lowalangi.

11Ombachaʼõ chõgoe lala andrõ chõoe, Jehowa, enaʼõ oetõrõ ia, ba zi fadoehoe dõdõoe; osambalõʼõ dõdõgoe ba wangataʼoefi tõimõ andrõ.(Sin. 27, 11).

12II. Oeʼandrõ saoha gõlõ chõoe, jaʼoegõ Soʼaja, Lowalangigoe, moroi siʼaikõ ba dõdõgoe, ba oesoeno dõimõ, si lõ aetoe.

13Me no eboea sibai dõdõoe chõgoe, ba me no õʼefaʼõ nosogoe ba mbaho mbanoea tooe andrõ.

14He Lowalangi, no maoso chõgoe zeboea fajaw̃asa, ba laʼaloei nosogoe sabõlõ, si no oroedoe, ba lõ ba dõdõra jaʼoegõ.

15Ba Lowalangi sahachõ tõdõ ndraʼoegõ ba seboea tõdõ, jaʼoegõ Soʼaja, sebolo tõdõ ndraʼoegõ ba si no fahõna faʼasõchi dõdõ ba fa lõ farõi. (Moz. II. 34, 6).

16Otahõgõ ndraʼo ba eboeaʼõ dõdõoe chõgoe; beʼe chõ genonioe andre waʼabõlõoe ba tolo nono genonioe ira alawe andrõ. (Sin. 116, 16).

17Fazõchi dandra ba chõgoe ba zi sõchi, enaʼõ laʼila si fatioe tõdõ chõgoe, ba enaʼõ aila ira, me no õtolo ndraʼo, jaʼoegõ Jehowa, ba me no õrara dõdõgoe.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index