Search form

SOERA ZINOENÕ 88

Sinoenõ 88.

Fangarõngarõ ba waʼaboe dõdõ.

1Sinoenõ, nilaoe Ndraono Gora andrõ, chõ doeka wanoenõ andrõ, dali ba wanoenõ ”Mahalata” andrõ; famahaõ; chõ Hemano andrõ, maʼoewoe Zera.

2He Jehowa, Lowalangi sangorifi jaʼo, na loeo moeʼaodo chõoe ba zi bongi,

3ba jamoeroegi ndraʼoegõ fangandrõgoe, beʼe mbõrõ dalingaoe ba wangarõngarõgoe!

4No afõli dõdõgoe wamakao, no ahatõ ba mbanoea tooe nosogoe.

5Hoelõ zilalõ mitooe ba gohokoho, wamaigi niha bõʼõ jaʼodo, hoelõ niha si no amomó ndraʼodo.

6No moeloeloe ndraʼo, awõ zi no mate, hoelõ niboenoe tooe, si no moetanõ, ba lewatõ, si lõ itõrõ tõdõoe saʼae, si no õtiboʼõ.

7No õbeʼe ndraʼo ba gohokoho, ba mbaho, ba zogõmigõmi, ba namõ ba nasi.

8Chõgoe tohare waʼabao dõdõoe, ba õhawoei ndraʼo doeloe andrõ chõoe. (Sin. 42, 8).

9No õʼarõoeʼõ chõgoe zi no faʼila li chõgoe; no ogoro ira ndraʼo õbeʼe; si no moekoeroe ndraʼo, ba tebai aefada. (A. 19. Sin. 31, 12; 38, 12).

10Itoegoe abõsi hõrõgoe ba wamakao andrõ; oeʼangarõfi li ndraʼoegõ, jaʼoegõ Jehowa, ero maʼõchõ, oeʼoroʼõ dangagoe chõoe.

11Hadia, õfazõchi dandra ba zi no mate? Hadia, ifoeli aoeri loemõ, ba wanoenõ jaʼoegõ? (Sin. 6, 6).

12Hadia, ba lewatõ lafatoenõ wa eboea dõdõoe, ba ba gawoewoecha lafatoenõ, wa si lõ farõi ndraʼoegõ?

13Hadia, aboto ba dõdõ dandra andrõ chõoe, ba zogõmigõmi, ba aboto ba dõdõ waʼatoelõmõ andrõ ba danõ waʼolifoe?

14Ba jaʼo, ba chõoe moeʼaodo, jaʼoegõ Jehowa; oehoelõhoelõ wongi, wangandrõ chõoe.

15Hana wa lõ ba dõdõoe nosogoe, jaʼoegõ Jehowa, ba hana wa õbiniʼõ chõgoe mbawaoe?

16Seboea akaola ndraʼo ba si mate, iʼotarai iraono ndraʼo; oetaha wametaʼoe andrõ chõoe, ba lõ lala dõdõgoe.

17No itõrõdo fõnoemõ sabõlõbõlõ andrõ, no terasa ndraʼo ba gametaʼoeõ andrõ chõoe.

18No teʼoeʼoe ndraʼo chõnia, hoelõ na ba nidanõ, maʼõmaʼõchõ, no tefasoei manõ ndraʼo chõnia.

19No õʼarõoeʼõ chõgoe zi fahoewoe chõgoe, fabaja awõgoe, lõ oroma zi no faʼila li chõgoe. (A. 9).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index