Search form

SOERA ZINOENÕ 89

Sinoenõ 89.

I. Itõrõ tõdõ zanoenõ andrõ waʼeboea dõdõ Lowalangi. Isoeno waʼabõlõnia ba faʼeboea dõdõnia. II. Itõrõ tõdõnia gamaboeʼoela li andrõ, nifaboeʼoe chõ Dawido. III. Mangarõngarõ ia, me no awoewoe maʼoewoe Dawido andrõ, ba iʼandrõ, enaʼõ ifoeli ihachõsi tõdõ Lowalangi.

(Faigi gõi Zam. II. 7, 8—16.)

1Famahaõ chõ Getano, maʼoewoe Zera.

2I. Daʼoesoeno waʼeboea dõdõ Jehowa andrõ, iroegi zi lõ aetoe, gõtõgõtõ waʼara oeʼombachaʼõ bewegoe andre, wa si lõ farõi ndraʼoegõ.

3Noa sa õmane: ”Si lõ aetoe waʼatedooe waʼeboea dõdõ andrõ”; ba mbanoea si jaw̃a õʼaroʼõ, wa lõ farõi ndraʼoegõ.

4”No fawoeʼoe li ndraʼo chõ nitoejoegoe andrõ, no fahõloe ndraʼo chõ genonigoe Dawido andrõ: (Sin. 132, 11. Jes. 55, 3. Hal. zin. 2, 30).

5Iroegi zi lõ aetoe lõ oeboelõʼõ madooemõ andrõ, iroegi ngaʼõtõ mitooe oeʼaʼaroʼõ dadaomamõ.”

6Ba lasoeno banoea si jaw̃a zahõlihõli dõdõ andrõ chõoe, jaʼoegõ Jehowa, ba fa lõ farõi ndraʼoegõ ba waloechata niha niʼamoniʼõ.

7Ha niha atṍ ba lawoeo si jaw̃a zi mane Jehowa? Ha niha zi mane Jehowa ba ndraono Lowalangi andrõ? (Job. 1, 6).

8Sataʼoe ita Lowalangi ba waloechata seboea ba niha niʼamoniʼõ ba sihocha mboe niha, fefoe zi tefasoei jaʼia.

9He Jehowa, Lowalangi ngahõnõ, ha niha zi mane jaʼoegõ, salaw̃a seboea? ba no tefasoei ndraʼoegõ wa lõ farõi andrõ, chõoe. (Sin. 115, 3).

10Ba dangaoe so hocha nasi andrõ; na eboea ndroeloenia, ba jaʼoegõ zangahono. (Mat. 8, 26. Sin. 65, 8).

11Jaʼoegõ mege zangoehoendragõ Rachaba [Miseraji] andrõ, hoelõ niboenoe, tooe ba danõ, no õfazawili zi faʼoedoe chõoe tangaoe sabõlõ andrõ. (Sin. 87, 4).

12Chõoe mbanoea si jaw̃a ba chõoe gõi danõ; oeli danõ, ba õsinia, ba jaʼoegõ mege zombõi. (Sin. 24, 1).

13Jõoe ba raja, ba jaʼoegõ zamazõchi; Tabora ba Heremono ba lakaraini waʼiki, ba dõimõ andrõ.

14Sabõlõ sibai mboelõchamõ ba sabeʼe dangaoe, ba no alaw̃a gambõlõoe andrõ.

15Faʼatoelõ ba faʼadõlõ dajadaja dadaomamõ andrõ; ba sanaro fõnaoe waʼeboea dõdõ ba faʼadoehoe. (Sin. 97, 2).

16Ja ahowoe soi, sangila maʼiki; sanõrõ lalara ba haga mbawaoe andrõ, jaʼoegõ Jehowa.

17Ba dõimõ andrõ lakaraini waʼiki, si lõ mamalõmalõ ba waʼatoelõmõ andrõ salaw̃a ira.

18Faʼamoadoe waʼabõlõra ndraʼoegõ, ba ba waʼasõchi dõdõoe andrõ alaw̃a dandroera andrõ.

19Chõ Jehowa sa mbaloesema andrõ, ba chõ niʼamoniʼõ andrõ ba Ndraono Gizeraëli razoma. (Sin. 47, 10).

20II. Me no andrõ, ba no moehede ndraʼoegõ ba zatoelõ tõdõ andrõ chõoe, ba gangilata, õmane: ”No oetolo zabõlõ, no oebaliʼõ salaw̃a nono matoea, ono mbanoea. (A. 4. Sam. I. 13, 14).

21No oesõndra genonigoe Dawido andrõ, no oebajoini ia fanicha niʼamoniʼõ andrõ chõgoe. (Sam. I. 16, 13).

22Lõ aefa dangagoe chõnia, ba iʼabeʼeʼõ ia boelõchagoe.

23Lõ tola ilimo ia si fatioe tõdõ, ba lõ tola ifakao ia si lõ atoelõ.

24Oefoefoe dania fõnania zi faʼoedoe chõnia, ba oebõzi tooe zi fatioe tõdõ chõnia.

25Iʼoʼawõgõ ia fa lõ farõi ndraʼo ba faʼeboea dõdõgoe andrõ; ba ba dõigoe dania alaw̃a dandroenia andrõ. (Sam. I. 2, 10. Sin. 132, 17).

26Oefababajaʼõ chõnia nasi, ba ibabaja mboto nidanõ kambõlõnia oebeʼe. (Sin. 72, 8).

27Imane dania wangarõfi li jaʼo: ”Amagoe ndraʼoegõ, Lowalangigoe ba fangabeʼe dõdõgoe, ba wangorifigoe andrõ.” (Sam. II. 7, 14).

28Ba jaʼo gõi, oebeʼe si aʼa ia, fondrege zalaw̃a ba goeli danõ.

29Iroegi zi lõ aetoe, lõ oeboelõʼõ chõnia waʼeboea dõdõgoe andrõ, ba bõi awoeʼa wawoeʼoesa li andrõ chõma. (Jes. 54, 10).

30Ba lõ oebeʼe aetoe ngaʼõtõnia, ba dadaomania, ba faʼara mbanoea si jaw̃a oebeʼe.

31Na laʼerogõ goroisagoe ononia, na lõ latõrõ lala andrõ, chõgoe;

32na laʼoʼaja gamachoitagoe ba na lõ laʼoʼõ goroisagoe,

33ba oeʼotoeʼõ ira bõzibõzi ba horõra andrõ, ba famakao ba lalõra.

34Ba lõʼõ zoei oeboelõʼõ chõnia waʼeboea dõdõgoe, lõ oelimo ia, lõ farõi ndraʼo.

35Lõ oeʼoʼaja wawoeʼoesa li andrõ chõgoe, ba lõ oewoeʼai niw̃aʼõgoe.

36Sambalõ si fahõloe ndraʼo ba waʼatoelõgoe andrõ, si ndroehoendroehoe lõ oelimo Dawido andrõ.

37Lõ tola aetoe ngaʼõtõnia; ba dadaomania, ba hoelõ loeo, fõnagoe. (Sin. 72, 17).

38Si mane baw̃a si jaw̃a lõ teboelõ ia, ba lõ farõi zamadoehoeʼõ andrõ ba mbanoea jaw̃a.” (Moz. I. 9, 13).

39III. Ba noa saʼae õtiboʼõ, ba no lõ ba dõdõoe: no mofõnoe ndraʼoegõ chõ nibajoinimõ andrõ. (Sin. 44, 10—25; 74. 79).

40No õʼositengagõ wawoeʼoesa li andrõ chõ genonioe andrõ, no õhoendragõ tooe zaemboenia.

41No õdoedoegõ gõli andrõ chõnia fefoe, no õbaliʼõ adoedoela hatinia andrõ.

42Laraboe hadia ia chõnia dozi sanõrõ, no tobali famaʼiki ia ba zi so ba ngainia. (Sin. 80, 13).

43No õʼalaw̃aʼõ gambõlõ zamakao jaʼia, no õʼomoesoiʼõ dõdõ zi fatioe tõdõ chõnia, fefoe.

44No õbeʼe mangandraoeli mbawa wõdania, ba lõ niʼabeʼeʼõmõ jaʼia ba wanoewõ.

45No õbeʼe taja lachõminia, ba no õsoʼagõ dadaomania.

46No õʼambõsi chõnia mbaw̃a waʼono matoea, no õbaloegõ manõ ia faʼaila.

47Ha waʼara na sa, wa lõ mamalõmalõ õbiniʼõ ndraʼoegõ, jaʼoegõ Jehowa? Ba ha waʼara na moehola wõnoemõ andrõ, hoelõ galitõ? (Sin. 85, 6).

48Tõrõ tõdõoe, wa lõ anaoenaoe nosogoe andre; he wisa wa lõ boto andrõ, ba nifazõchioe ono niha fefoe. (Sin. 90, 9. 10).

49Heza so niha, saoeri manõ, si lõ mangila faʼamate, sangefaʼõ bechoenia ba waʼabõlõ mbanoea tooe andrõ?

50Hezo waʼeboea dõdõoe fõna, jaʼoegõ Soʼaja, nifaboeʼoemõ chõ Dawido, fahõloesa, ba wa lõ farõi ndraʼoegõ? (Sin. 85, 2).

51Tõrõ tõdõoe, Soʼaja, waʼaila genonimõ andrõ, wa oeloeʼi wangoʼaja niha sato, soja soi.

52Sanandraw̃a — si faʼoedoe chõoe, Jehowa, sanandraw̃aisi lahe nibajoinimõ andrõ.

53Nisoeno Jehowa, iroegi zi lõ aetoe. Ja doehoe, Ja doehoe! (Sin. 41, 14).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index