Search form

SOERA ZINOENÕ 9

Sinoenõ 9.

I. Isoeno Zoʼaja si no mõna ba wanoewõ. II. Iʼandrõ na wanolo.

1Chõ doeka wanoenõ andrõ, dali: ”Mateʼõ salahi nono.” Sinoenõ; chõ Dawido.

2I. Damangandrõdo saoha gõlõ chõ Jehowa, moroi siʼaikõ ba dõdõgoe, daʼoetoenõ zahõlihõli dõdõda andrõ chõnia.

3Daʼoeʼomoesoiʼõ dõdõgoe chõoe, acha maʼiki dõdõgoe, daʼoesoeno dõimõ, jaʼoegõ Fondrege zalaw̃a.

4Bõrõ wa lawoewoe ira foeri si faʼoedoe chõgoe andrõ; tegaõlõ tooe ira ba tekiko, ba wanõngõoe jaʼira.

5Noa sa jaʼoegõ zamaigi lala ba chõgoe andre, no õʼasiwai hoehoeo andrõ chõgoe; no moedadaoʼõ ba dadaoma zangoehoekoe andrõ, sangoehoekoe satoelõ. (Sin. 7, 12).

6No õtenaw̃a niha baero, ba no õfakiko zeboea horõ; no õboenoe dõira, si lõ fangorifi, iroegi zi lõ aetoe.

7No aetoe nemali andrõ, no tobali adoedoela, si lõ mamalõmalõ, no tobali arõ mbanoeara õbeʼe; lõʼõ saʼae itõrõ tõdõ niha bõʼõ. (Sin. 34, 17).

8Ba moedadao ba dadaomania Jehowa, lõ mamalõmalõ, no iʼaroʼõ dadaomania, ba wangoehoekoe. (Sin. 103, 19).

9Ba ihoekoe golia oeli danõ, ba waʼatoelõ, iʼasiwai hoehoeo soi niha ba waʼadõlõ. (Sin. 96, 13).

10Belebele nifakao Jehowa, baʼabaʼa, na baw̃a lõ lala dõdõ.

11Andrõ manõtõna chõoe zi no mangila tõimõ andrõ, me lõ si farõi ndraʼoegõ ba zanofoenofoe jaʼoegõ, Jehowa.

12Miʼanoenõ chõ Jehowa, sonahia ba Ziona, midoenõdoenõ ba niha misa wolaoelaoenia. (Sin. 132, 13).

13Me iʼaloealoei horõ, fangeʼengeʼe andrõ, me itõrõ tõdõnia; lõ olifoe ia wangarõngarõ zanaha famakao. (Moz. I. 4, 10).

14II. Eboeaʼõ dõdõoe chõgoe, Jehowa, faigi wamakao zi faʼoedoe andrõ jaʼo; jaʼoegõ, samazaw̃a jaʼo moroi ba mbawandroehõ ba waʼamate andrõ.

15Enaʼõ oedoenõdoenõ doeriamõ andrõ fefoe, enaʼõ maʼiki dõdõgoe ba mbawa gõli Nono Ziona alawe andrõ, ba wangorifi andrõ chõoe. (Sin. 22, 23; 40, 10—11; 13, 6).

16No alaoe niha baero andrõ, ba lõsoelõsoe nichaora, no tochai gahera ba goeʼõ andrõ nifadõlõra. (Sin. 7, 16).

17No terongo Jehowa, wa sangoehoekoe ia. Ba nilaoelaoe dangania fafali zeboea horõ. (Sin. 7, 17).

18Ba mbanoea tooe noemalõ zeboea horõ andrõ; fefoe niha baero andrõ, si no olifoe Lowalangi.

19Tenga si lõ mamalõmalõ, wa olifoe ia zi noemana, ba tenga si lõ teboelõboelõ, wa lõ boto wanõtõna zaboe tõdõ andrõ. (Sin. 22, 25; 10, 17. 18).

20Faoso, Jehowa! Fa bõi fajaw̃a niha; alacha tehoekoe niha baero andrõ, tánõ fõnaoe.

21Hawoei ira faʼataʼoe, jaʼoegõ Jehowa, enaʼõ aboto ba dõdõ niha baero, wa niha si mate ira. (Sin. 59, 14).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index