Search form

SOERA ZINOENÕ 94

Sinoenõ 94.

I. Fangandrõ chõ Lowalangi, solaoe balõ ba zi lõ sõchi andrõ. II. Faʼohahaoe dõdõ zanõtõna fanolo chõnia.

1I. He Lowalangi solaoe balõ, jaʼoegõ Jehowa! He Lowalangi salaoe balõ, oromaʼõgõ! (Moz. V. 32, 35).

2Faoso, sangoehoekoe õsi goeli danõ, beʼe zoelõ ba zeboea hocha andrõ! (Moz. I. 18, 25).

3Ha waʼara zeboea horõ andrõ, Jehowa! ha waʼara omoeso dõdõ zeboea horõ andrõ?

4Lalaoe hoehoeo fajaw̃asa, lasoeno ira dozi samasõchi si lõ sõchi.

5Larasa mbanoeaoe andrõ, Jehowa, ba lafalangõgõ dána chõoe andrõ.

6Laboenoe lacha mbanoea, awõ zi fatewoe andrõ, ba laʼeʼeli zi lõ ama, si lõ ina.

7Ba lamane: ”Lõ iʼila Jehowa, lõ anehe Lowalangi Jakobo.” (Sin. 10, 11).

8Mibeʼe ba dõdõmi, jaʼami si lõ tõdõ ba niha andre; ba jaʼami sowõhõ mowa, ba ha waʼara atoeatoea ami? (Sin. 92, 7).

9Samataro tõgi dalinga andrõ, hadia lõ irongo? Sombõi hõrõ andrõ, hadia, lõ iʼila? (Moz. II. 4, 11).

10Sangotoeʼõ soi niha, hadia, lõ ilaoe mbalõ? Jaʼiá, samahaõ niha ba waʼaboto ba dõdõ?

11Iʼila geraʼera niha Jehowa, wa no si lõ boto. (Kor. I. 3, 20).

12II. Ja ahowoe niha, niʼotoeʼõmõ, jaʼoegõ Jehowa, nifahaõmõ ba goroisa andrõ chõoe! (Sin. 19, 12—14. Job. 5, 17).

13Ba wamaigi chõnia sahono ia, na baw̃a wamakao, gasagasa wa techao gohokoho ba zeboea horõ andrõ. (Sin. 37, 7).

14Lõʼõ sa itiboʼõ mbanoeania Jehowa, ba lõ farõi ia ba dána chõnia andrõ.

15Mangawoeli sa ba waʼatoelõ hoekoe andrõ, ba laʼoʼõ ia dozi sadõlõ tõdõ.

16Ha niha zi mõi belebelegoe, ba zeboea horõ andrõ, ba ha niha zanolo jaʼo, ba zamazõchi si lõ sõchi?

17Na tenga Jehowa zanolo jaʼo menaʼõ, ba te no iroegi danõ si lõ liw̃aliw̃a nosogoe andre. (Sin. 115, 17).

18Na oemane: ”Ahele gahegoe”, ba itoewoe ndraʼo faʼeboea dõdõoe andrõ, jaʼoegõ Jehowa.

19Ba waʼoja ngawalõ waʼaboe dõdõgoe andrõ, ba iʼokafoei dõdõgoe fondrara tõdõ andrõ chõoe. (Kor. II. 1, 4. 5).

20Hadia, fabõbõ chõoe dadaoma wamakiko andrõ, sombõi fangaboe dõdõ, samaliʼõ hoekoe?

21Lahawoei noso zatoelõ andrõ, ba laʼetoeʼõ hoekoe zi lõ horõ.

22Ba belebelegoe Jehowa, ba weʼeweʼe dõdõgoe Lowalangigoe, saw̃atõgoe.

23Isoelõni chõra horõra ba ifakiko ira, bõrõ walõsõchira andrõ, ifakiko ira Jehowa, Lowalangida.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index