Search form

SOERA ROETI FAZA

I. Awoeʼa Gelimelechi andrõ, iʼohe woʼomonia ba ononia matoea, si domboea. Mate Gelimelechi ba ononia andrõ. II. Mangawoeli Naʼemi. III. Lõ farõi chõnia Roeti andrõ.

1I. Me loeo zangoehoekoe andrõ, ba samoeza maʼṍchõ, ba lofo ba danõ. Ba so zaheta, banoea Mbetilechema Joeda, iʼohe woʼomonia ba ononia matoea, domboea, ba isaw̃a danõ Ndraono Moabi. 2Tõi zawoeʼa andrõ, ba Elimelechi, ba Naʼemi dõi woʼomonia ba Maloni ba Chilijoni dõi nononia andrõ — mado Geferaji, banoea Mbetilechema Joeda. Ba laroegi danõ Ndraono Moabi ba laʼiagõ daʼõ. 3Ba mate woʼomo Naʼemi andrõ. Elimelechi, ba hatṍ jaʼia ba ononia andrõ si domboea. 4Ba mangowaloe nononia andrõ, ono Ndraono Moabi lahalõ; Orafa dõi zi samboea ba Roeti zi samboea. Ba sosó ira ba daʼõ, mato mewoeloe fache. 5Ba mate gõi zi daroea andrõ, Maloni ba Chilijoni, ba ira alawe andrõ zi tosai, lõʼõ saʼae ononia andrõ, si daroea, ba lõ foʼomonia andrõ.

6II. Ba maoso Naʼemi, iʼohe noemõnõnia andrõ, mangawoeli, aheta ia ba danõ Ndraono Moabi, me no irongo ba daʼõ, ba danõ Ndraono Moabi, no ihachõsi tõdõ mbanoeania Jehowa ba no ifoeli ibeʼe chõra mbalazo. 7Ba irõi mbanoea andrõ, ba zi sosó ia mege, ba fao chõnia noemõnõnia andrõ si domboea. Ba me ba lala so ira, ba wangawoeli ba danõ mado Joeda, 8ba imane Naʼemi chõ noemõnõnia andrõ, si domboea: Miʼae mifoeli ami, sõchi na faoma mangawoeli ami jomo chõ ninami! Jamoesoelõni chõmi Jehowa waʼomasimi zi mate andrõ ba faʼomasimi ndraʼodo! 9Na mitema daʼõ chõ Jehowa, ba lõ zi lõ misõndra zahono ami, jomo chõ ndra matoeami dania, daroea ami! Ba faʼago bawa ia chõra. 10Ba megeʼege sibai ira, ba lamane chõnia: Fao saʼae ndraʼaga chõoe ba niwami andrõ! 11Ba imane Naʼemi: Mifoeli ami, onogoe, hadia, wa fao ami chõgoe? Hadia, so na nono matoea ba daloegoe, foʼomomi dania? 12Mifoeli ami, jaʼami onogoe, miʼaeʼe! satoea saʼae ndraʼodo; tebai saʼae mõido nihalõ. Ba na oemane dõdõgoe enaʼõ: So na dõtõnafõgoe! ba na bongi andre faloechado ndra matoea ba na moʼonodo ono matoea, enaʼõ, 13— ba hadia, mibaseʼõ irege eboea daʼõ? Hadia, nitaha manõ ami, lõ mõi nihalõ? Bõi, jaʼami ira onogoe! Aboe sibai sa dõdõgoe ami; jaʼodo sa, ba no si gõna tanga Jehowa! 14Ba ifoeli megeʼege sibai ira; ba Orafa, ba faʼago bawa chõ ninania, ba Roeti andrõ, ba iʼolembai ia.

15III. Ba imane Naʼemi: Me no ifoeli ia kalaʼedomõ ba niwara ba chõ Lowalangira, ba foeliʼõ gõi, oʼõ galaʼedomõ! 16Ba imane Roeti: Bõi forege chõgoe, oerõi ndraʼoegõ, fa oefoelido, lõ faodo chõoe! Ba zi mõi ndraʼoegõ sa, ba daʼõ mõi ndraʼo gõi, ha ba zi soʼõ, ba daʼõ gõi sodo, iwaoe niwagoe, ba Lowalangioe Lowalangigoe; 17ba zi mate ndraʼoegõ, ba daʼõ gõi matedo, ba ba daʼõ ndramoekoʼo ndraʼodo; jamoelaoe chõgoe nilaoe dõdõnia Jehowa — ha faʼamate zamabali jaʼita! 18Ba me iʼila Naʼemi, no aro dõdõ daʼõ, ba wefao chõnia, ba ibato wamarooe jaʼia. 19Ba mofanõ zi daroea andrõ ba laroegi Mbetilechema. Ba me mõi ira mijomo ba Mbetilechema, ba hoemoefa mbanoea maʼasamboea, ba chõra andrõ, ba lamane: Daʼõ Naʼemi andrõ? 20Ba imane chõra: Bõi mibeʼe tõigoe Naʼemi, (waʼomasigoe) Mara (saboe tõdõ) mibeʼe tõigoe; noa saʼae oja nifatõrõ Zi lõ ambõ faʼabõlõ chõgoe faʼaboe dõdõ. 21Si so ndraʼo, me mofanõdo ba si lõʼõ, me iʼohe mangawoeli ndraʼodo Jehowa; ba hadia wa mibeʼe tõigoe Naʼemi, me noa saʼae ihõndrõgõ ndraʼo Jehowa, me no ifatõrõ chõgoe waʼaboe dõdõ Si lõ ambõ faʼabõlõ? 22Ba bõrõta wamasi gandroe, me laroegi Mbetilechema Naʼemi andrõ ba oemõnõnia Roeti andrõ, Iraono Moabi, si no fao chõnia, moroi ba danõ Ndraono Moabi.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index