Search form

Moatlem 1

1Thiofilas:

Khebengwah ngama raangtek titab ko Jisu ma ate moatlem bengmotah thuma chenni motah a, ngale chenni hethôtah a ereheh raang ekang, erediko 2ate rangkhethung nâng tôansietwên tôkotuk chenni motah a ereheh raang ekang. Ate rangkhethung nâng tôansietwên mako, Asâthôanju chaanma atema ate moattat chhoante rãng rentah mihnyan hehnâng hethô thienwah. 3Ate ritdi jâroak belii khenko thin demnâng depdep chohmînwah, ngale atea ahîn ngama jien putedâlem rãng thinnâng rongrup moatlem heh molahma khesokwah. Thinma ate khetah, ngale thinnâng atema Joban Hahsông ngin hehmin thôkotah. 4Ngale chenthu thin aroamma khôanpoatko, thinnâng atema arepa ngatwah: “Jeroselem wah nekchhoan mêngen, ngama nenâng thôkotah hînhô pa machoh chohkenko bemla letma tongen, ere hînhô pa kohrãng ngawama toamsêm wah. 5Jon ma joma baptijem kohwah, phumma jâthe jânii diko nenâng Asâthôanju ma baptijem kohmin.”

Jisu Rangkhethung nâng Tôansietwên

6Chenthu moattat chhoante heh Jisu demnâng aroamma chohmîn poatko, thinma chhienwah, “Teso, nangma Isrial hehnâng Hahsông pa athângheh ngakkoh minne?”

7Jisu ma thinnâng ngatwah, “Rangkuh sanhapa ngawama ate chaan koba hôaneka, erepa chenthu dângmin a epa nema jetthin dangmah. 8Rohkomin chenthu Asâthôanju nekhoh nâng meka theko, nema chaan echoh en, ngale nema Jeroselem nâng, Judia phangtang nâng, ngale Samaria, erediko hahtokkhoh phangtang nâng phoangchhoan letma ngangin ephoang thôkoh en.” 9Atema arepa ngatdiko, thin mitkhesok jenjenko rangkhethung nâng tôansietwên wah, ngale phoamma thin mitkhe jenjen kowah mahbuk wênwah.

10Ate rangkhethung nâng wâng dikomin, thinma mitma rangnâng leksûwên lahma chepwah. Phumma mihnyan wanii khetpo keplahma thintâko hôngchep hokwah 11ngale thinma ngatwah, “Galili wah mihnyan heh, rangnâng sûwên letma aretheko chenrãngma chep eken a? Netâwah toansietwên eka are Jisu pa, nema chenroh rangkhethung nâng wãng lahma khe eken a ererãngrãngjô engak kara.”

Juda Litko Dângte

12Erediko moattat chhoante heh Oliv Hahho wah Jeroselem nâng ngakwâng wah, erepa Jeroselem wah kilo mitatthe taangko dângwah. 13Thin Jeroselem nâng wãng lahma rangkho dângwah thin tongtah humko tôngwângwah: Piter, Jon, Jems, ngale Andru, Filip, Thomas, Bartholomi, Mathiu, Alphaus chha Jems, Diak akan rãngma latte Simon, ngale Jems chha Juda dângwah. 14Thinkhu roantang rangsoam rãng aroamma chîkhôan wah, thindemko dihiaknyu heh, Jisu nyong Mariam ngale atenaa hehmin chîhokwah

15Jâthe jânii diko putedâlemte heh ngoangthun rãng khôanwah, eko chentô tungko châthe roaknii dângwah, ngale Piter nginthôrãng tôanchepwah. 16Atema ngatwah, “Ngalemruchha heh,” “Joban nyapraangpa toangtang dangeka, Asâthôanju ma Devit nâng, Juda ma Jisu khhekte heh lemsên hokrãngma jabthuk tahpa toangtang dangeka. 17Juda pa nãngkhu demnâng dângwah, ngale nãngkhu demnâng moatlem moatrãng rênwah.”

18(Atema kaamchhih molahma ngun chohtah pumma Juda ma pitthin riieka, ere pitko atea khokesongma ritah; ate wok pa khapoak lahma puk adi heh phangtang loatjâwah. 19Erepa Jeroselem wah sôngte mihnyan hehma chentôma tatwah, ngale erohwah, thinjabma ere pitko Akeldama ngama mîn eka, are ngaeka pa, “Hiema riakwah Pit” ngaeka.)

20“Erohwah Rangsoamsê titab nâng aroh raangeka,,

‘Ate humpa sekhota chendangjâa;

ere humko henjô nekchen songeka.’

Ngale arohmin raangeka,

‘Ate moatlempa ahanma chenmoa.’

21-22“Erohwah hen komin wathe Teso Jisu ngakhîn nginkongpa phoangthô rãng nãngdemnâng johchepmin. Ere mihnyan pa Teso Jisu nãngdemnâng phoangkhoamtah sanpoatko nãngdemnâng roantangma johkhôamwah mihnyan dângmin, ngale Jon ma baptijem kep ngin bengphoang thôtah thuma nãngdemnâng dângwah mihnyan dângmin ngale nãngdem kowah Jisu rangkhethung nâng toansietwên tah jâkotuk nãngdemnâng dângwah mihnyan dângmin.”

23Ephumma thinma wanii mihnyan rênwah: Josep, atenâng Barsabas ngama ngatwah (ngale atenâng Justus ngamemin ngatwah), erediko Mathias rênwah. 24Erediko thinma rangsoam wah, “Teso, nangma chentô hung rinpa jet, are wanii kowah nangma henpa 25Juda litko moattat chhoante rãngren eko erepa ninâng khesokkat hi. Erepa Juda ma ate theko chhoanrãng thînphe thienwah.” 26Erediko thinma longkendoh lahma wanii kowah rênwah, ereko Mathias pa hôngwah. Ephumma echhi wathe moattat chhoante heh demko Mathias moattat chhoante rãng johdângwah.

NIEMNYAN

©2010 Bible Society of India

More Info | Version Index