Search form

Moatlem 13

Barnabas ngale Sol Nii Renlahma Chienchhoan

1Antiok wah Asâthem hehnâng mõng ngale hethôte heh roanche dângwah: Barnabas, Simon (ngale atenâng mangnyekjat ngamemin roowah), Lukius (atea Kren wah), Manan (atea Govono Hirot demnâng aroamma humthewah roamdông aloatwah), ngale Sol. 2Chenthu thinma lephhek lechhah thangma Teso nâng rangsoam poatko, Asâthôanju ma thinnâng ngatwah, “Barnabas ngale Sol nii, ngama moatlem moatthukrãng rootek heh moatrãng reethien en.”

3Thinma lephhek lechhah thangma rangsoam wah, ngale thindekpa atenii khohko lolahma rangsoam kolahma chienchhoan wah.

Sipras nâng

4Asâthôanju ma chienchhoan lahma Barnabas le Sol nii Seliuka nâng katwah, ngale enângwah jogari ma jotung wah Sipras hahnâng katwah. 5Chenthu thin Salami hahnâng hokko, thinma Joban jabkhab enângwah Sanagog nâng thôkoh wah. Atenii nâng chohsok rãng Jon Mak min atenii demko dângwah.

6Thinma jotung wah hahpa danlahma Pafos hahnâng katwah, enâng thinma mõng ngama phoangthôrii lahma jâdu jette Jews mihnyan atemin pa Bar - Jisu chohmînwah. 7Atea ere jotung wah hah Govono Serges Paulas lemruchha dângwah, ngale Govono pa nyahrãng jet ajien dângwah. Phumma Govono pumma Joban ngin jettat hunlahma Barnabas le Sol nii ate tâko roowah. 8Rohkomin jâdu jette Ilimas ma atenii lelatnâng danglahma jektâng wah (arepa Bar - Jisu nâng Griik jabma mîn lahma dângwah), ngale Govono ma Jisu nâng putedâlem pa atema jeksietrãng phungwah. 9Erediko Sol - ngale atenâng Pol ngamemin rooeka - atenâng Asâthôanju mênchong dângwah; atema jâdu jetteko thongsû lahma 10ngatwah, “Nanga joakchha! Nanga rongrup asenli heh ran. Nangnâng rongrup buthi mongthem chhih heh tongho, ngale roangtang nangma Teso toangtang nginpa mothô khoanglep rãng litdângthuk hun eko! 11Athângheh Teso ma nangnâng ewat ho; ngale nanga poatthe rãng mitdoak lohma chenjô lekhemin ngale rangwo phiak pejô lekhe edango.”

Phumma lemlienma Ilimas mitpa nyekjâwah, ngale henma komin ate dekko lolahma phoangsiette lêm tumlit phoangkhoam wah. 12Phumma Govono ma erepa khelahma putedâlem wah; ngale Teso ngin hethôeka heh tatlahma nyahrãng bâritwah.

Pisida wah Antiok nâng

13Pol le ate lemru heh Pafos wah Pamfalia diakwah Perga hahnâng jogari ma katwah, enâng Jon Mak phethien lahma Jeroselem nâng ngakkat wah. 14Thin Perga diaknâng hokwah ngale Pisida wah Antiok hahnâng hokwah, ngale Pientông jâko Sanagog nâng wãngwak lahma johtông wângwah. 15Mosa Niemarang ngale mõng hehma raangwah hehwah loatweih diko, Sanagog wah Sahhabwa pumma thinnâng chhienkat thukwah: “Lemruchha heh, nememin mihnyan hehnâng chenni komin rîn akhahthin metong hènko tarîn en.” 16Phumma Pol toanchep lahma ate dekma hakkat lahma loatjabwah:

“Ngapho anaa Isrial heh ngale chentô Jews ledangte arekowah Joban nâng soam atôte heh: Ngangin jetat tanha! 17Isrial mihnyan heh Joban pumma nãngte nãngwa heh Igip nâng mihdiakte danglahma sông poatko renlahma jet ajien thukwah. Joban ma ate chaanma Igip wah loatsietchhoan wah, 18ngale atema rangpâ roakbelii thin demnâng hungmôngsiet lahma dangwah sehahkho nâng. 19Atema Kanan hah wah diak engit chhihsiet lahma erediak heh ate mihnyan hehnâng kohwah. 20Are chentôpa 450 rangpâ khenko dângwah.

“Arediko atema thinnâng mõng Samoel sanpoat tôko lândangroh hah pênte kohlahma pênthukwah. 21Ngale chenthu thinma lowang thâ phumma, Joban ma thinnâng Benjamin jatwah Kish chha Sol rangpâ roakbelii rãng thin Lowang dângthukwah. 22Sol Lowang wah rephe diko, Joban ma thin Lowang rãng Devit lithôan wah. Joban ma ate junma aroh jabwah: ‘Ngama Jisi chha Devit pa nga hungma lem ekang rãngrãng mihnyan lâchohtek, ngama atenâng chenni moathuk hun ekanga ereheh phangtang atema emoa.’ 23Joban ma toamsem tah rãngrãng atema Isrial mihnyan heh Pângte rãng Devit pôali wah Jisu dangthuk eka. 24Jisu ma ate moatlem moatmako, Jon ma chentô Isrial mihnyan hehnâng pap wah hungngaklit letma baptijem kepen ngama phoangthô kohwah. 25Ngale Jon ma ate moatlem heh tâmoat nemnemko, atema mihnyan hehnâng ngatwah, ‘Nema nga a hen edanga ngama thonghun eha? Nga nema bemla ekenpa dangmek. Rohkomin nga nginpa jetat tanha! Atea ngadiko ekara, ngale nga ate daphâng putkohrãng jômin punmek.’

26“Ngapho anaa Isrial mihnyan heh, Abraham chhuchha heh, ngale chentô Jews ledangte Joban nâng soam atôte heh: Are khope nginsen pa nãngkhu nâng thôhok kohwah! 27Chenrãngma ngako Jeroselem wah sôngte mihnyan, ngale thin khhepho phannang hehma atea nãng Pângte ngama jetmah, ngale Joban pientôngjâ roakweih mõngheh jabkhab weihwak eka hehmin jetmah. Rohkomin thinma Jisu ritphe lahma mõngheh jabkhab pa toangtang dangthuk eka. 28Ngale thinma Jisu lânrit pheroh chennângjô thelahma lechohlo medang akomin, thinma Jisu ritphe rãng Pilat nâng chienwah. 29Ngale Joban nyapraangma ate junma chentô jabtah heh thinma moatdiko, thinma bãngphak kowah jâtoan lahma mangruk nâng rukatwah. 30Rohkomin Joban ma ritwah ngakhinsiettah, 31ngale melâng rangwo ate demko Galili wah Jeroselem nâng johwângte heh tânâng hongloattah. Ere mihnyan hehma athângheh ate ngin pa Isrial mihnyan hehnâng phoangthôkoh eka. 32-33Ngale nima nenâng nginkongsen pa thôhû koheka: Joban ma nãngte nãngwa hehnâng chenni moatkoh rãng toamsem tah a erepa thin pôali Jisu pa ngakhinsiet lahma athângheh atema nãngrãng mokoh ehi. Rangsoamsê titab khedi kowah ko aroh raangeka,

‘Nanga nga Chha;

thejâ nga nang Wa lâdangtek.’

34Ngale ate ritwah ngakhin eka le mangruk nâng lesãnjâ dangeka heh junko Joban ma aroh jabwah:

‘Ngama nangnâng alinlin asâthôan rang ekoh e,

erepa ngama Devit nâng toamhôan wah.’

35Atema rangsoamsê titab ahan nângmin jabeka:

‘Nangma nangnâng toangtangma putedâlemte haapa mangruk nâng lesãnjâ thukmin.’

36Chenrãngma ngako Devit ma Joban moatlem heh ate roandông poatko motah, ngale erediko riilahma, ate te awa heh demnâng johbîn katwah, ngale ate mangpa mangrukko sânjâwah. 37Roh-komin Joban ma ngakhinsiettah Jisu pa mangrukko sanjâho. 38-39Ngapho anaa Isrial mihnyan heh nekhu phangtangma arepa senthemthem jet en, Jisu junma nenâng pap dângwah map chohngin pa thôkoh eka; ngale nema arepa jet en, henhenma atenâng putedâlem eka ereheh Mosa Niemarang ma leta pesiet dangtah heh phangtang wah pesiet eka. 40Erohwah jetletma tongen, mõng hehma jabtah nginpa nekhoh nâng nekchenchat ehèn:

41‘Sûtan en, Joban rãngma chhihjabte heh! bârii letma erii en!

Chenrãngma ngako thejâ ngama chenni moekanga erehehnâng nema lepute min,

mihmejô methôkoh hèn komin nema putemet!’ ”

42Phumma Pol le Barnabas nii Sanagog kowah ngakchhoan ko, mihnyan hehma ahokminwah Pientôngjâ komin ngakhû letma arerãngrãng ngin heh thôhû kohhi ngama roatsep wah. 43Mihnyan heh phanchhoan diko, Pol le Barnabas nii erediko Jews heh ngale Jews ledangte Judiejem rãng litdângwah heh jahmõang junkhoam wah. Moattat chhoante hehma Joban mînchenchaan pa roantang kepletma tongen ngama thôkoh wah.

44Eredijâ kowah Pientông jâko erehah wah mihnyan heh phangtang Teso jabkhab pa jetatrãng hokwah. 45Chenthu Jews hehma mihnyan heh khe phumma thinma mitchekwah; ngale Pol ma thôeka ngin heh junma ate demnâng chhiakmîn lahma Pol nâng dûmmek wah. 46Rohkomin Pol le Barnabas niima lechei thangma jêngjah jâhthô thôkoh wah: “Khebeng thôanko Joban jabkhab pa nenâng bengthôkoh pa alemthôan dângwah. Rohkomin nema erepa lekep dâng phumma, ngale roantang roanjêng roandông lehun dâng phumma, nima nenâng lethôkoh thangma Jews ledangte hehnâng thôhûkoh eki. 47Chenrãngma ngako Teso ma ninâng aroh moatrãng thôkoh ehi:

‘Ngama nanga Jews ledangte heh wenphiak rãng hôaneki,

erejunko hahtokkhoh kowah heh phangtang khope min.’ ”

48Chenthu Jews ledangte hehma are nginpa tatphumma thinma Joban nginko rôwakwah; ngale henhenma roantang roanjêng roandông chohrãng rentah a ereheh putedâlemte rãng dângwah.

49Teso jabkhab pa erediak phangtang nâng chohtatwah. 50Phumma erehah wah Jews hehma khhepho phannang heh erediko jews ledangte jat dihiaknyu hahdaang niemarang junko adongjat heh Jews hehma chepsietwah. Phumma thinma Pol le Barnabas nii nâng chêmsiet lahma erehah kowah sietphe chhoanwah. 51Moattat chhoante hehma thin dawah bumheh enângwah mihnyan heh lelatnâng finekthien lahma Ikoniem nâng katwah. 52Antiok wah putedâlemte heh nyahrãng khuhah nâhah dângwah, ngale thinnâng Asâthôanju mênchong dângwah.

NIEMNYAN

©2010 Bible Society of India

More Info | Version Index