Search form

Moatlem 14

Ikoniem nâng

1Ererãngrãngjô Ikoniem nângmin dângwah: Pol le Barnabas nii Sanagog nâng hûlahma thinnâng thôko lahma Jews ngale Jews ledangte heh phangtang putedâlemte rãng litjâ wah. 2Rohkomin lepute dâlemte Jews hehma Jews ledangte heh chepsiet lahma putedâlemte heh lelatnâng dângwah. 3Enâng moattat chhoante heh melâng rangwo tôngthienwah, thinma chenni ranjô lechei Teso nginpa phoangthôwah, ngale ate mînchênchaan ngin thôeka pa toangtang ngama jetthuk rãng thinnâng patritli ngale bâritli moatlem heh moatthukwah. 4Erehah kowah mihnyan heh phanjâ wakwah: Khakapa Jews heh demnâng dângwah, ngale khakapa moattat chhoante heh demnâng dângwah.

5Erediko Jews ledangte ngale Jews heh thin khhepho phannang heh demnâng roamlahma moattat chhoante hehnâng chêmthuk ngale longma ritpetrãng thômîn wah. 6Chenthu moattat chhoante hehma erengin pa leptat phumma erehah kowah huhchhoan lahma Likonia wah Listra le Dirbi erediko erehah kêanâ hahnâng katwakwah. 7Enângmin thinma Nginkongsen pa thôkoh wah.

Listra ngale Dirbi

8Listra nâng achhatmejû dakò chha lahma chenthumin lethat jienkhoamte mihnyan wathe dângwah. 9Atemin eretheko tonglahma Pol nginpa jettat lahma dângwah. Ngale Pol ma ere mihwa pumma Joban ma tasensiet hang ngama putedâlem pa khelahma, atenâng thongthong sokkatwah 10ngale chaanmõang raklahma ngatwah, “Toanchep lohma nang dapa chen o!” Ephumma mihwa pa toangchep lahma tumlit phoangkhoam wah. 11Chenthu Pol ma moeka pa mihnyan hehma khe phumma, thin Ikoniem jabma, “Joban pa mihnyan rãngrãng danglahma nãng tâko kaera!” ngama rakwakwah. 12Thinma Barnabas nâng Zius ngama mînwah, ngale Pol nâng Hirmis ngama mînwah, chenrãngma ngako atea Nginkongsen thôte hehwah adongthôan dângwah. 13Zius joban rangsoamhum pa hahdaang panlienko dângwah, phumma erekowah soam aroakte pumma hahdaang pankâsek thongko mânpong ngale chongpô heh keplahma hokwah, chenrãngma ngako ate ngale mihnyan hehma moattat chhoante hehnâng soam aroak rãng hunwah.

14Chenthu Barnabas le Pol niima mihnyan hehma themawa ekapa tatphumma, atenii khet heh koakphe lahma mihnyan heh chhangko raklahma chhoankat wah, 15“Nema chenni re eken a? Nimin nerãngrãng mihnyan jôba! Nia ako nekhu nâng Nginkongsen pa thôko lahma, nekhuma ledangli moatlem moeken kowah ahîn Joban, ngale rangkhethung, hahtokkhoh, josi, ngale josi khenwah chentô hôante Joban tânâng ngaklitsiet hokrãng netânâng hûeri. 16Khemako atema chentô mihnyan hehnâng mâmâ hungsiko dângthukwah. 17Rohkomin atema roantangma nga a ahin ngama moatlemsen molahma khesok eka: atema nenâng rangkho wah rangpat patthuk era ngale too achhah heh amun sanpoatko munthuk eka; atema nenâng phhekchhah kohlahma nehung nâng khuhahthuk ehèn.” 18Moattat chhoante hehma mihnyan hehnâng are ngin heh thôkoh nungnung komin mihnyan hehma atenii nâng soam aroak hokpa achaanma mamjek tângwah.

19Jews khuthe Pisida diak Antiok hah ngale Ikoniem wah hokwah; thinma mihnyan heh thin demnâng rusiet lahma Pol nâng longma petwah, ngale riitah ngama thonghun lahma thinma hahdaang wah panlien nâng sietphekat wah. 20Phumma chenthu putedâlemte heh ate tumlit khôanchep hokphumma ate toangchep lahma hahdaang nâng ngakwâng wah. Eredijâko Barnabas enii Dirbi hahnâng wângwah.

Syria Diakwah Antiok hahnâng Ngakhok

21Pol le Barnabas niima Dirbi nâng Nginkongsen pa phoangthô kolahma melâng mihnyan heh dijunte rãng dângthukwah. Erediko thin Lastra, Ikoniem, ngale Pisida wah Antiok nâng ngakwâng wah. 22Pol le Barnabas niima putedâlemte hehnâng toangtang dangletma rongtêngtêng putedâlem rãng rîn akhah wah. Thinma hethô wah, “Nãngma ajahthem chêmchei heh dannekthien lihma Joban Hahsông thenâng wângmin.” 23Thinma chentô Asâthem hehnâng khhepho phannang heh renthien rewah, ngale lephhek lechhah thangma rangsoam lahma ere mihnyan heh, thinma tok anaa eka Teso deknâng chohkoh wah. 24Thinma Pisida diak pa dankhoam lahma Pamfalia nâng katwah. 25Thinma Pirga nâng nginkongsen pa thôthien lahma Atalia nâng katwah, 26ngale enângwah Antiok nâng jogari ma ngakkat wah, erethepa thinma tamo lahma Joban deknang ate mînchenchaan ma chensû chenrea ngama kohthien wah.

27Chenthu thin Antiok nâng hokko, thinma Asâthem heh khôansiet lahma Joban ma thin demnâng chentô motah a erengin heh phangtang thôkoh wah, ngale Jews ledangte hehma putedâlem rãng Joban ma chenroh lemlaang kotah a erengin hehmin thôkoh wah. 28Ngale enângwah putedâlemte heh demnâng thin rangwolo tôngthienwah.

NIEMNYAN

©2010 Bible Society of India

More Info | Version Index