Search form

Luk 17

Pap

(Mathiu 18.6, 7, 21, 22; Mak 9.42)

1Jisu ma ate dijunte hehnâng ngatwah, “Mihnyan heh pap dângthukthin pa metkep hôngmin, phumma pap dângthukte hehrãngma chentô chhih dângmin a! 2Are chentô noma arinthôan mihnyan hehwah wathe pap dângthuk noma ate bohko longdong khhek lahma josiko mejâtoakka akoba ate rãngma asen edanga. 3Erohwah nema chenni moeken a erepa jetletma mo en!

“Nepho anaa ma pap memo ako, atenâng ritngat re en, ngale ate hung melit ako, atenâng mapkoh en. 4Atema jâtheko nangrãngma pap dep engit molahma, dep roakweih nang tânâng kalahma, ‘nga lâthetek,’ ngama mengaka hoko, nangma atenâng mapkoh o.”

Putedâlem

5Moattat chhoante hehma Teso nâng, “Ni putedâlem pa dongsiet kohhi” ngama ngatwah.

6Teso ma dânthâng wah, “Nenâng putedâlem pa jokangken dôngtô metong hènko, nema are mulbary bãngko, ‘nangdede bãngthong rinma phurii lohma josiko nangdede khietrii kao!’ ngama mechien enkomin ne ngin ekephèn.

Haa ma moatthin Moatlem

7“Chenjô komin nekhuwah wathe nâng haa lâtongthen, ngale ere haa pumma hanbê, ba saak heh lâsû lâretah. Phumma chenthu haapa pitwah hokko, nema lemlienma phhekchhah chhahrãng rângchien en a? 8Eroh chenthujô chienmet! erenoma, ‘nga phhekchhah heh khoakhem kohhang, ngale sôngdângkhet keplohma nga phhekchhah poatko bemtonghang; erediko ba nangma taphhekchhah o,’ ngama rângnga en. 9Haa pumma nginkepkep dângdi dangkoh a ngat lemmah, roh akole atema rânglem a? 10Nemin eroh jôba; chenthu nenâng moatrãng chien ehèn moatlempa phangtang meta motetko, nema enga en, ‘Nia haa dangkoh e; nima moatthin moatlem ba moeki.’ ”

Jisu ma Delawa Waechhi Mesiet

11Jisu Jeroselem nâng wângko, Samaria le Galili nii jatrii tungma dânwângwah. 12Ate hahdaang wanthenâng hokko angêm khoanchet ma chêm lahma mihnyan waechhi chohmînwah. Angêm khoanchette heh ataangnâng cheplahma dângwah 13ngale thinma rakkatwah, “Jisu! Hethôte! Ninâng mammînchen hi!”

14Jisu ma thin khelahma thinnâng ngatwah, “Wãngen soam aroakte hehma chenthatsû tanhèn.”

Thin lemnâng wângpoatko angêm khoanchet pa sênwah. 15Chenthu thin khuchhang wah wathema atea senchoan kherii lahma, Joban nâng dangkoh a ngama chaanmõang rakroo lahma ngakkatwah. 16Ate dedema Jisu dathongko hahko khupjup kalahma Jisu nâng dangkoh a ngatwah. Ere mihnyan pa Samaritan mihnyan dângwah. 17Jisu ma ngatwah, “Waechhi sentet pela; ahan waekhu pa chenkoa? 18Chenrãngma are mihdiak mihnyan pumma lolo Joban nâng dangkoh a ngaknga kaera?” 19Ngale Jisu ma atenâng ngatwah, “Chep o, ngale chhoan o; nang putedâlem pumma sensiet eho.”

Joban Hahsông Kat Ngin

(Mathiu 24.23-28, 37-41)

20Farasi khuthema Jisu nâng Joban Hahsông pa chenthu katmin a ngama chhienwah. Jisu ma dânthâng wah, “Joban Hahsông pa mihnyan mitma kheli katmin dangmah. 21Henmemin, ‘sûtan en, Joban Hahsông pa anã!’ ba, ‘ireko tonga!’ ngama lengamin; chenrãngma ngako Joban Hahsông pa ne hungkhenko tonga.”

22Erediko atema dijunte hehnâng ngatwah, “Nema Mihnyan Chha sanpoat kowah rangwo hehwah wothe komin chohkhe lihmele ngama hun rangkuh ehûra, rohkomin nema ere rangwopa leta chohkhemin. 23Erediko mihnyan hehma nenâng engahèn, ‘Ireko sûka tan en!’ ba, ‘Anâng, sûka tanrên!’ rohkomin nema nekphoang sûchhoan en. 24Rangdeng khiapda ma rangkho nâng sukka ma sukka nâng rângdanliap arãngrãng, Mihnyan Chha katjâ rangwo pemin eroh edanga. 25Rohkomin khebângko atema nyahrãng chêmchoh mêngmin ngale arerôan wah mihnyan hehma ate roak atoak leweih edanga. 26Noa sanpoatko chenroh dangtah a ererãngrãng Mihnyan Chha sanpoat komin erohjô edanga. 27Noa khôankho khenko tôngwâng sanpoat tôko anga nga jokphhek chhah lahma dângwah, ngale dihiak dela kepmin lahma dângwah, ngale erediko jodôngma lumhû lahma phangtang ritphewah. 28Ngale Lot sanpoatko chenroh dangtah a ererãngrãng edanga. Anga nga jokphhek chhah lahma dângwah, seng alengte, ariak achâte, khiet alîte toatmin, humpa toatmînhoan lahma dângwah. 29Phumma Sodom hahdaang kowah Lot loatchhoan jâko rangkhethung wah wen jâka lahma phangtang ritkhâm wah. 30Ererãngrãng jôba Mihnyan Chha katjâ komin edanga.

31“Erejâ rangwo ko henpa ate humkho nâng dângtea erepumma min humkhen nâng kalahma ate sêmmak heh letoan kamin; ererãngrãngjô pitnâng dângte hehmin humnâng lengakwãng min. 32Lot tangnyu pa thonghuntan en! 33Henhenma atedede roandông pêpângrit huneka erehehma mahphe erea; ngale henhenma atedede roandông mahphe eka erehehma thin roandông pa eta pesiet a. 34Ngama nenâng thôkoh eka, erejâ rangpenko, mihnyan wanii jupthin wanthenâng eroamjup a: Phumma wathepa sietwên erea, ngale wathepa phethien erea. 35Ngale dihiaknyu waniima chhah eroam thua, phumma wathepa sietwên erea ngale wathepa phethien erea.”

37Dijunte hehma Jisu nâng thôngphâ wah, “Teso, arepa chenko dângmin a?”

Jisu ma thinnâng dânthâng wah, “Chenriangko mang tongeka, eretheko mangphhekte hogunwo heh ekhoanjâa.”

NIEMNYAN

©2010 Bible Society of India

More Info | Version Index