Search form

Luk 9

Jisu ma Echhi Wanii Dijunte Chienchhoan

(Mathiu 10.5-15; Mak 6.7-13)

1Jisu ma echhi wanii dijunte heh aroamma roolahma juchhih junloat rãng ngale khoanchet heh mesietrãng chaan kohwah. 2Erediko atema Joban Hahsông nginpa phoangthô ngale khoanchette min mesiet en ngama chienchhoan wah, 3Jisu ma thinnâng ngatwah, “Nedemnâng chenijô nekkepchhoan en: menthun min nekkep en, tõng, phhekchhah, ngun akem min, chhemchong bâmmin nekkepen. 4Chenreko tãngroo lahma jekthuk ehèn a, erehah kowah mangak ngakchhoan mãnthethinko tongen; 5Chenreko ne letangroo dang ehèn a, ere hah kowah ngakchhoan re en, ngale neda wah khep eka bumpa thinnâng nea achhih ngama ranchâthiak pa finekthien re en.”

6Dijunte heh chentô hahdaang nâng phoangchhoan lahma Joban Nginkongsen pa phoangthô ngale chentô thenâng khoanchet heh mesiet rewah.

Jisu Jun ma Hirot Mokrit

(Mathiu 14.1-12; Mak 6.14-29)

7Chenthu Hirot, Galili pênte pumma are ngin heh phangtang chohtat phumma, ate nyahrãng mokritwah, chenrãngma ngako wawathe mihnyan hehma Jon baptis ngakhin eka ngamemin ngatwah. 8Wawathema Ilija hongeka ngatwah, ngale wawathema tewa rôanpa thuwah mõng dangtah hehwah ngakhin eka ngatwah. 9Phumma Hirot ma ngatwah, “Ngama Jon khophang pa thahdoaktek; phumma ngama are chohtat ekang mihnyan pa hen a?” Ngale atemin Jisu demnâng chohmîn hunwah.

Jisu ma Hahjat Bangâ Mihnyan nâng Phhekchhah thuk

(Mathiu 14.13-21; Mak 6.30-44; Jon 6.1-14)

10Moattat chhoante heh ngakhû lahma thinma chentô motah heh Jisu nâng thôkoh wah. Erediko Jisu ma ate demko sietchhoan lahma Batsida ngama ngaeka sumhahko wângwah. 11Chenthu mihnyan hehma erepa leptat phumma thinmin Jisu diko junchhoan wah. Ngale Jisu ma tãngroo lahma thinnâng Joban Hahsông nginpa thôkoh wah, ngale henhenma khoanchetsên huneka ereheh mesiet rewah.

12Sannyupkat rienrienko, echhi wanii dijunte heh Jisu tâko hûlahma atenâng ngatwah, “Mihnyan heh chienchhoan eko, nãng kêanâ wah duken ngale hahdaang hehnâng chhoan lahma thin phhekchhah ngale jupthin chenlem chhoanwak a, chenrãngma ngako aretheko mihnyan henjô songmah.”

13Phumma Jisu ma thinnâng ngatwah, “Nema thinnâng chenni komin phhekchhah thuk en.”

Thinma dânthâng wah, “Ninâng bankên wanbangâ ngale ngah lanii loloba etonghi. Phumma are loangchhang phangtangrãng phhekchhah richhoankoh en ngama hun ehia?” 14(Ereko hahjat bangâ mihnyan rãng dângwah.)

Jisu ma ate dijunte hehnâng ngatwah, “Mihnyan heh roak bangâ roak bangâ ma tongthuk en.”

15Dijunte hehma eroh tôngthuk diko, 16Jisu ma bankên wanbangâ ngale ngah lanii pa semlahma rangkhethung nâng sûwên lahma, Joban nâng dangkoh a ngalahma rangsoam wah, ngale atema bankên pa chhupsiet lahma ate dijunte hehnâng mihnyan hehnâng phenkoh en ngama kohwah. 17Thin anga ngama phoatphoat phhekchhah wah, ngale dijunte hehma bâachâ heh echhi phânii khôantôanwah.

Piter ma Jisu Pa Ahin Joban Chha Ngama Loatjab

(Mathiu 16.13-19; Mak 8.27-29)

18Jâthe Jisu atelolo rangsoam thuko, dijunte heh ate tâko hokwah. Phumma atema thinnâng thôngphâ wah, “Mihnyan hehma nga hen edanga ngama ngawak ehanga?”

19Thinma dânthâng wah, “Wawathema Jon baptis ngaeho, wawathema Ilija, ngale wawathema tewa rôanpa thuwah mõng dangtah hehwah ngakhin eka ngama ngaeho.”

20Phumma Jisu ma thinnâng chhienwah, “Roh medang ako nema nganâng chenroh ngaeha?” “Nema nga hen edanga ngama ngaeha?”

Piter ma dânthâng wah, “Nanga Joban wah Misaia.”

Jisu ma Ate Chêmchei ngale Arit junma Loatjab

(Mathiu 16.20-28; Mak 8.30—9.1)

21Erediko Jisu ma are ngin pa hennâng min nekthôkoh en ngama thinnâng ngatwah. 22Jisu ma thinnâng thôkoh wah, “Mihnyan Chhama nyahrãng chêmchohmin, ngale khhepho phannang, soam aroakte adong, erediko Niemarang hethôte hehma ate roak atoak leweihmin. Atea ritphe erea, rohkomin jârem diko ngakhîn erea.”

23Ngale Jisu ma thin phangtang nâng ngatwah, “Nema ngadijun hun medang enko, nedede lekpherit mêngmin, ngale rangwo roakweih ne bãngphakpa peletma ngadijun ha. 24Chenrãngma ngako nema nedede roandôngpa pêpangrit mehun enko, nema amahphe ere en, rohkomin nema ne roandôngpa ngarãngma memahphe enko, nema ne roandôngpa eta pepângen. 25Nema rangkhen hahtok phangtang nerãng takep letma nedede roandôngpa mahphe ba jienrit mere enko nema chenni chohmin a? chenjô chohmet! 26Ne ngarek nâng rêsê erediko ngama hethô ekang nginkong ko rêsê mere enko, Mihnyan Chhamin ate Wa chaan keplahma Asâthôan ngintatte heh demnâng katjâko thinnângmin rêsê erea. 27Ngale ngama nenâng linlin thôkoh eka, Joban Hahsông thepa lechohkhe thangma ako leriite mihnyan khuthe tongen.”

Thhenphãng Litjâ

(Mathiu 17.1-8; Mak 9.2-8)

28Jisu ma are ngin heh jabtahwah haptathe diko, Piter, Jon ngale Jems ate demko sietlahma hahhokho nâng wãng lahma rangsoam wah. 29Jisu ma rangsoam thuko, ate thhenphãng litjâwah, ngale ate khet pemin potutu pôjâwah. 30Lemlienma eretheko mihnyan wanii Jisu demnâng jabmîn lahma dângwah. Thin a Mosa ngale Ilija dângwah. 31Ngale nyahrãng phiakto phiakja phiak lahma hongwah, erediko ate Jeroselem nâng riilahma chenroh Joban jabkhab pa toangtang jiendângmin a erengin heh Jisu demnâng thômîn wah. 32Piter le ate lemru heh nyahrãng mokjup wah, phumma jupwah chhin lahma Jisu dongthuk lahma chohkhe wah, ate demwah chepte wanii pemin chohkhe wah. 33Mihnyan heh Jisu tâwah loatchhoan diko, Piter ma Jisu nâng ngatwah, “Hethôte, nãng aretheko tôngpa chentôsên a! Nima tembu humwah phangrem hoan e, nangrãng wanthe, Mosa rãng wanthe, ngale Ilija rãng wanthe hoan e.” (Atema chennijab ekanga ere pejô senthemthem lejet thangma hôngjabwah.)

34Piter ma jabjenjenko, phoam bukhu lahma mahbukwah; ngale phoam pa thinkhoko bukhok phumma dijunte heh chei rewah. 35Phoam kowah jabkhab hôngjab katwah, “Arepa nga Chha, ngama ate lârentek - ate ngin kepen!”

36Chenthu ere jabpa jekphumma, eretheko Jisu lolo dângwah. Ngale dijunte hehma erepa thinhung nâng thienwah, ngale thinma ere sanpoatko chenni khetah a ereheh hennâng min thôho.

Jisu ma juchhih Lupte Dela Chha Wathe Sênsiet

(Mathiu 17.14-18; Mak 9.14-27)

37Eredijâko Jisu le ate dijunte warem pa hahhokho kowah jâkhôam katwah, ngale mihnyan heh jahmõang Jisu demnâng chohmînwah. 38Loangchhang kowah mihnyan wathe hôngrakwah, “Hethôte! Ngama rosepki, ngachhako mamsû mêngtan - atea ngachha ate lolojû! 39Juchhih ma lemlienma hongrak lahma atenâng chiloeka, eko ate thunwah thoakwoak heh hong chire eka; atenâng melo tahko chhoan lehuntu chilek loeka! 40Ngama nang dijunte hehnâng junloat kohrãng roatsep wah, phumma thinma tajunlomah.”

41Jisu ma dânthâng wah, “Nema putedâlem met, ngale nea mihnyan chhih! Chentôloat nga nedemnâng eta johtonga? ngale chentôlek ngama nenâng eta chohsûa?” Erediko Jisu ma mihwako ngatwah, “Nang chhapa anâng sietwênro.”

42Letapa khôamwâng thuko juchhih ma lolahma hahko loangsietwah. Phumma Jisu ma juchhih pa junloatwah, ngale letapa sensiet lahma ate wa nâng ngakkohwah. 43Joban ma moatlemdong moatjunko chentô mihnyan heh bârit rewah.

Jisu ma Ate Rit junko wîenthe Jabwah

(Mathiu 17.22, 23; Mak 9.30-32)

Jisu ma moatlem moeka heh khelahma mihnyan heh bârit rewah. Jisu ma ate dijunte hehnâng ngatwah, 44“Ngama nenâng thôkohmin nginpa nema neklekphe en! Mihnyan Chhapa mihnyan nyuchha heh deknângkoh lâthângtah.” 45Phumma dijunte hehma atema chenni nâng ngaeka arepa jet ho. Are nginpa thinnâng lethôkoh thangma huhriem lahma thien junko thinma jetloho, ngale thinma atenâng thôngphâmin chei rewah.

Henpa Adongthôan a

(Mathiu 18.1-5; Mak 9.33-37)

46Dijunte hehwah henpa adongthôan dângmin a ngama thinkhu tungko chhiakmîn wah. 47Thinma chenni thonghun eka erepa Jisu ma jetloatwah, ephumma Jisu ma naachha wathe sietlahma thintâko chepthuk wah, 48ngale thinnâng ngatwah, “Henma komin are naachha pa ngamînko tãngroo eka, erepa nganâng tãngroo ehang; ngale henhenma nga tãngroo ehanga, atema nga chienkatte pemin tãngroo eka. Chenrãngma ngako nekhuchhang wah henpa arinthôan a ere peba adongthôan.”

Henhen Ne Lelatnâng ledangtea erepa Nerãng

(Mak 9.38-40)

49Jon ma hongjabwah, “Hethôte, nangmînko mih wathema juchhih junlo lahma khetih, phumma nima atenâng jektangtih, chenrãngma ngako atea nidemwah dangmah.”

50Jisu ma atenâng ngale dijunte ahan hehnâng ngatwah, “Atenâng nekjek tangen,” “Chenrãngma ngako, hen ne lelatnâng ledangtea erepa nerãng.”

Samaritan Hahdaangte hehma Jisu nâng Tãngrooho

51Jisu rangkhethung nâng toansietwên sanpoat namhok phumma, atema Jeroselem nâng wângrãng thonghun lahma wângwah. 52Jisu ma ate mako nginmatte Samaria hahdaangko aterãng rongrup khoakhêmrãng chienwên lâwah. 53Rohkomin ere hahdaang wah mihnyan hehma ate tãngrooho, chenrãngma ngako atea Jeroselem nâng wângte ngama Samaria wah mihnyan hehma jetwah. 54Chenthu dijunte Jems le Jon niima eroh khe phumma, thinma ngatwah, “Teso, are mihnyan heh rokphêrãng nima rangkhethung wah wen jâroo ea?”

55Phumma Jisu litphong lahma thinnâng ritngatwah. 56Erediko Jisu le ate dijunte heh hahdaang hannâng dânchhoanwah.

Jisu Di Tâjunte

(Mathiu 8.19-22)

57Thin lemnâng khôamthuko, mihwa wathema Jisu nâng ngatwah, “Nang chennângjô mechhoan okomin nga nangdiko ejunkhoam e.”

58Jisu ma atenâng ngatwah, “Hien hehnâng thin tôngrãng ken tonga, ngale phoangpukte wo hehnângmin thinrãng arup tonga, rohkomin Mihnyan Chharãng chenkojô ate boantông rãng the aho.”

59Jisu ma mihhan wathe nâng ngatwah, “Ngadijun hang.”

Phumma mihwa pumma dânthâng wah, “Hethôte, khebengko ngama kalekma ngawa mang rukamêng ang.”

60Jisu ma dânthâng wah, “mangpa mang rôande chenrumîn a. Nangma chhoan lohma Joban Hahsông nginpa phoangthô chhoan o.”

61Ahan memin ngatwah, “Hethôte, ngamemin nang dijun e; phumma khebengko ngama kalekma nga humte tangkâ hehnâng ngin rânthô kamêngang.”

62Jisu ma atenâng ngatwah, “Henma komin hanbê lahma khedinâng ngiaksukat eka erepa Joban Hahsông nâng lekepmin.”

NIEMNYAN

©2010 Bible Society of India

More Info | Version Index