Search form

Mathiu 15

Nãngte Nãngwa hehma Hethô wah Niemarang

(Mak 7.1-13)

1Erediko Farasi ngale Niemarang hethôte heh Jeroselem wah kalahma Jisu nâng chhienwah, 2“Chenni rãngma nang dijunte hehma nãngte nãngwa hehma hethô wah Niemarang heh lekep re eka? Thinma phhekchhah chhah mako dek senthemthem soanmah!”

3Jisu ma dânthâng wah, “Nema chenni rãngma Joban nginpa lekep thangma nededema thôeken junko dangekena? 4Chenrãngma ngako, Joban ma aroh ngaeka, ‘Nang nyong nangwa nginkepkep dango,’ ngale ‘henhenma mâmâ nyong awa nâng tem athoak eka, arepa ritphe rêmin.’ 5Phumma nema mâmâ nyong awa nâng chohsok thiakpa, ‘Joban nâng lâkohtih’ ngama hethô eken, 6Ephumma thinma thinnyong awa ngin keptumah. Eroh nema Joban nginpa chhihsiet letma nededema thôeken junko songtong eken. 7Ahuhkhoanglep heh! Isaia ma nerãngma profisi hôantahpa toangtang dângwah!

8Joban ma ngaeka, ‘Are mihnyan hehma nganâng thunma loloba soamtô ehang,

Phumma thin hungpa linlinko nga tâwah ataangnâng.

9Thinma nganâng soamtô pejô mahto nâng soamtô wak ehang,

chenrãngma ngako, thinma mihnyan ma hôaneka niemarang heh nganiem ngarang rãngrãng hethôeka!’ ”

Mihnyan Hung Ngeksiet thin Sêmmak

(Mak 7.14-23)

10Erediko Jisu ma mihnyan heh ate tânâng roolahma thinnâng ngatwah, “Tat en, ngale jetlo en! 11Mihnyan thunko chenni chhahwen eka erepumma niemarang junko ate ngeksiet mah; ate thunwah chenni loatchhoan eka ere pummeba ngeksiet eka.”

12Erediko dijunte heh ate tânâng hûlahma Atenâng ngatwah, “Nangma jet ekole, nangma chennijab eko erepumma Farasi heh hungnâng chet reka?”

13Jisu ma dânthâng wah, “Rangkhethung wah Ewa ma lekhiet bãng chentôpa phuphe rêmin,” 14“Thinrãngma neksekmah en! thin a mitdoak, ngale mitdoak heh lemsênte; ngale chenthu mitdoak wathema ahan mitdoak lem mesen ako waniinii jongnâng ejâriiwak a.”

15Piter ma dânthâng wah, “Are nginpa ninâng senthemthem thôkoh tanhi.”

16Jisu ma thinnâng ngatwah, “Nea athângheh min ahan heh noma chhin achhiak dangmetne. 17Nema jetmetne? mihnyan thunko chenni chhahwên eka, arepa ate woknâng kaeka, ngale ate phoangwah loatchhoan reka. 18Phumma mihnyan thunwah loatjab ekapa ate hungkhen wah loatjabwên era, ngale ere jabkhab pumma mihnyan pa ngeksiet eka. 19Chenrãngma ngako, ate hungkhen wah buthi mongthem chhih hongeka, erejunko atema mihritphe, mihtangnyu demnâng kaamchhih moat, ngale lirup kaamchhih moat; mihwahnyen, mothô khoanglep, erediko mihphoang chhihthô. 20Ereheh meba mihnyan pa ngeksiet eka. Phumma, thinma ngaeka rãngrãng nema deklesoan thangma chhahrãngma mihnyan pa ngeksiet mah.”

Dihiaknyu Putedâlem

(Mak 7.24-30)

21Jisu erethe kowah loatchhoan lahma Tair ngale Sidon hah ngenâng katwah. 22Ere diaknâng sôngte Kananet dihiaknyu ate tânâng hûlahma raksepwah, “Devit Chha!” “nganâng mammînchen hang! echha dihiaknya sekko juchhih lupeka, phumma nyahrãng cheili chêmeka.”

23Rohkomin Jisu ma Atenâng khabthemin rânjabho. Phumma ate dijunte heh ate tâko wãng lahma roatsep wah, “Dihiaknyu pa chienchhoan eko! Atema nãngdidi ko junkhoam lahma are chentôpa chaptin eka!”

24Ephumma Jisu ma dânthâng wah, “Nga a amahkhôamte saak rãngrãng Isrial mihnyan mahhâm eka heh tânâng loloba chienkat ehang”

25Ephumma dihiaknyu ma Jisu dathongko khupjup kalahma ngatwah. “Teso, nganâng mamchoh sûhang!”

26Jisu ma dânthâng wah, “Leta heh phhekchhah pa hu hehnâng joakli dangmah.”

27Dihiaknyu ma dânthâng wah, “Teso erepete edanga,” “rohkomin thin tângtewa ma jâphe eka chempha heh hu hehma rângchhah a.”

28Ere diphumma Jisu ma Atenâng dânthâng wah, “Nanga putedâlem dong dihiaknyu! nangma chenni hun eko erepa edang kohho.” Phumma ere sanpoat poatko ate chhapa mewah.

Jisu ma Mihnyan Jahmoang Mesiet

29Jisu erethe kowah loatchhoan lahma, Galili josi ngenâng katwah. Phumma hahhokho ko kowâng lahma tôngwâng wah. 30Mihnyan hehma ate tânâng dakò, mitdoak, dekke dake, aba jabmuh, ngale lihân khoanchetma chêmte heh siethû lahma ate dathongko thienhok wah, phumma atema mesiet wah. 31Aba jabmuh jienjab, dekke dake heh sen, dakò heh jienkhoam, ngale mitdoak hehma jienkhe rewah; erepa khelahma mihnyan heh bârit wah; ephumma thinma Isrial heh Joban nâng dangkoh a ngalahma choangpe wah.

Jisu ma Hahjat belii Mihnyan nâng Phhekchhah thuk

(Mak 8.1-10)

32Jisu ma ate dijunte heh roolahma ngatwah, “Ngama are mihnyan hehnâng nyahrãng mînchen ekang, chenrãngma ngako, nga demnâng jârem lâjohkhoam wakthang, ngale ade phumma thinnâng phhekchhah thin chenmin ahotu. Chenmin lephhek chhahthuk thangma chienchhoan hunmek, chenrãngma ngako thin humnâng wânglemko bôanrit môangrewak a.”

33Dijunte hehma Atenâng chhienwah, “Are hahran khokowah aretô mihnyan hehnâng lanle phhekchhah thukroh chenwah phhekchhah chohmin a?”

34Jisu ma thinnâng chhienwah, “Nenâng bankên chentô tonghèn a?”

Thinma dânthâng wah, “Ninâng bankên wanengit, ngale, ngah arinchha heh roanche tonghi.”

35Ephumma Jisu ma mihnyan hehnâng hahko tongen ngama chienwah. 36Erediko Jisu ma bankên wanengit ngale ngah heh semlahma Joban nâng dangkoh a ngat rangsoam soamlahma chhupsiet wah, erediko atema dijunte hehnâng kohwah; ngale dijunte hehma mihnyan hehnâng phenkoh wah. 37Thin chentôma phoatphoat phhekchhah wah. Erediko dijunte hehma bâachâ heh phâengit chõngchõng khôantôan wah. 38Erekowah phhekchhahte mihnyan heh dihiak ngale leta lechhih heh leweih thangma hahjat belii dângwah.

39Erediko Jisu ma mihnyan heh chienchhoan lahma, atea khôankhoko chhangka lahma Magadan diaknâng katwah.

NIEMNYAN

©2010 Bible Society of India

More Info | Version Index