Search form

Mathiu 17

Thhenphãng Litjâ

(Mak 9.2-13; Luk 9.28-36)

1Jâerok diko Jisu ma ate demnâng Piter ngale pho anaa Jems ngale Jon sietlahma hahho choang khonâng wângwah, ereko thinlolo dangwah. 2Thin mitkhe kheko, Jisu litjâ lahma khewakwah: Ate thhenphãng pa san rãngrãng phiakwah, ngale ate khetpa nyahrãng potutu pôphiakwah. 3Erediko dijunte warem pumma Mosa le Ilija nii Jisu demnâng nginthômîn lahma khewah. 4Ephumma piter ma Jisu nâng ngatwah, “Teso nãng aretheko tôngpa chentôsên a! nangma mehun oko, ngama ako hum phangrem hoan ang, nangrãng phangthe, Mosa rãng phangthe, ngale Ilija rãng phangthe hoan ang.”

5Ate jabmîn thuko, thinkhoko phoam phiakjaja bukhok wah, ngale phoam kowah jabkhab hongjab lahma ngatwah, “Arepa nga Chha linlin, ngama Atenâng nyahrãng hun ekang, ngale nga ate demnâng nyahrãng rinme ekang-ate ngin tat en!”

6Dijunte hehma ere jabkhabpa tat lahma, nyahrãng cheiwak lahma hahko khupjup wah. 7Jisu thin tânâng kalahma, thinnâng sahlo kalahma ngatwah, “Chepen” “Nekchei en!” 8Ephumma, thinma toansok wênko ahan henjô lekhetu thangma Jisu leklek chohkhe wah.

9Thin hahkongkho wah ngakkatko, Jisu ma thinnâng ngatwah, “Mihnyan Chha ritwah mangak ngakhinko, are nema chohkhe tetpa hennâng min nekthôkoh en.”

10Erediko dijunte hehma Jisu nâng ngatwah, “Chenni rãngma Niemarang hethôte hehma Ilija khekho katmin ngama ngaeka?”

11Jisu ma dânthâng wah, “Ilija pa linlin khekho ekara,” “ngale rongruppa atema ekhoakhem a. 12Rohkomin ngama nenâng thôkoh eka, ‘Ilija râkatha’ phumma mihnyan hehma ate lejet thangma thinma chenroh huneka eroh Atenâng hôanjôan wah. Erohjô Mihnyan Chha komin thinma ehôanjôan a.”

13Erediko ba atema thinnâng Jon baptis junma thôkoh wah ngama dijunte hehma jetloat wah

Jisu ma Juchhih Lupte Dela Chha Sênsiet

(Mak 9.14-29; Luk 9.37-43a)

14Chenthu thin loangchhang tânâng ngakhokko, mihnyan wathe hûlahma ate mathahko dakuh thôhok wah, 15ngale atema ngatwah, “Teso, ngachha ko mammînchen mêngo! atea wobuhte ngale cheili loangrii lahma roantangma wen ngale jonâng chijârii eka. 16Ngama nang dijunte heh tânâng siethok wah, rohkomin thinma tasensiet mah.”

17Jisu ma dânthâng wah, “Nema putedâlem met, ngale nea mihnyan chhih! Chentô rangwo nga nedemnâng eta johtonga? ngale chentô rangwo ngama nenâng eta chohsûa? naa pa ngatâko sietwênro!” 18Jisu ma juchhih ko chhoanrãng chien phumma naa sekkowah loatchhoan wah, phumma ere sanpoatko naa pa sênwah.

19Erediko dijunte heh Jisu tânâng thin lolo hûlahma Atenâng thôngphâ wah, “Nima chenrãngma juchhih pa letajunlo rekia?”

20Jisu ma dânthâng wah, “Nenâng putedâlem pa ajah aho dângkowah nema letajunlo reken” “Ngama nenâng nginlinlin thôkoh eka, nenâng jokangken dôngtô putedâlem metong hènko, nema are hahkong komin, ‘arekowah ireko kao!’ ngama tanga en, eko are hahkong pa eka a. Nema chenmin tamo en!”

Jisu ma Ate ritjunma Wîenthe Jabwah

(Mak 9.30-32; Luk 9.43b-45)

22Dijunte heh Galili nâng phangtang roamkhôan hokko, Jisu ma thinnâng ngatwah, “Mihnyan Chhapa ate ritphete mihnyan heh deknângkoh lâthângtah 23thinma ate ritphe erea; rohkomin, jârem diko ate ngakhîn erea.”

Ephumma dijunte heh nyahrãng hungchhih wah.

Rangsoamhum Thãkhokoh

24Chenthu Jisu le ate dijunte heh Kaparnam hahnâng hokko, rangsoamhum thã thãkho thâte hûlahma Piter nâng thôngphâ wah, “Ne hethôte ma rangsoamhum thã thãkhokoh ekale?”

25Piter ma, “Koh eka” ngama dânthâng wah,

Chenthu Piter humkhen nâng lupwângko, Jisu ma ranjabkho ranjabwah, “Simon nangma chenroh thonghun eko? Are hahtokkhoh wah lowang hehrãng moatlem pa henma mokoh eka, ngale thinnâng thãkho henma koheka? ate diakwah mihnyan hehma koh ekale, mihdiak wah mihnyan hehma koheka?”

26Piter ma dânthâng wah, “Mihdiak wah mihnyan hehma koheka”

Jisu ma wîen dânthâng wah, “Sen a,” “eroh medang ako are diakwah mihnyan hehma lethummin. 27Rohkomin nãngma are mihnyan heh hungkethuk hunmih. Erohwah ngahnôan janphoan pa kepletma josiko noankat en. Nema khebâng thôan chohnôan eken ngah thunkâko ngunpha echoh en, ere ngunphapa ngarãngmin, ngale nekhu rãngmin rangsoamhum thãkho lânle thumroh edanga. Erepa kepletma nãngkhu anga ngarãng thumwên en.”

NIEMNYAN

©2010 Bible Society of India

More Info | Version Index