Search form

Mathiu 28

Angakhîn

(Mak 16.1-10; Luk 24.1-12; Jon 20.1-10)

1Pientông rangwo dijâko, dobatjâ wowen khoko, Mariam Makdalani, ngale ahan Mariamnii mangruk nâng kalahma sokkatwah. 2Phumma lemlienma hahtii dong hôngtiiwah; rangkhethung wah Teso ngintatte kalahma long kâsekpa loangphe kalahma ere khohko tôngkatwah. 3Ate thhenphãng pa rangdãng khiapda rãngrãng dângwah, ngale ate khetpa mien rãngrãng potutu dângwah. 4Abemte sipâhi heh nyahrãng chei lahma atii rewakwah, ngale riichoan mihnyan rãngrãng dângwah.

5Rangkhethung wah ngintatte ma dihiaknyu niinâng ngatwah, “Nekchei en,” “Ngama ajet nema rittek retah Jisu pa lemeken. 6Ate aretheko ahotu; atema ngatah rãngrãng ngakhintah. Wãngletma ate thientah theko sûwãng tanrên. 7Athângheh sitsiak wãngletma ate dijunte hehnâng thôkoh en, ‘atea ngakhintah, ngale ate athângheh nekhu mako Galili nâng wãnglaeka; enâng nema ate echohkhe en!’ Ngama nenâng chenni thôkotah a erepa thonghun en.”

8Ephumma mangruk wah sitsiak loatchhoan wakwah, ngale cheimin rewakwah, erediko khuhah nâhah chhoanwãng waklahma ate dijunte hehnâng thôkoh wah.

9Lemlienma Jisu thin demnâng chohmîn lahma ngatwah, “Khuhah nâhah dangen.” Phumma thinkhu Jisu tâko wãng lahma, ate dako lowãng waklahma rangsoam wah. 10Jisu ma thinnâng ngatwah, “Nekchei en,” “Wãngletma nga naa hehnâng Galili nâng wângrãng thôkoh en, ngale enâng thinma nga echoh khewak hang.”

Mangruk Bemte hehwah Ngin

11Dihiaknyu heh wangthuko, mangruk bemte hehwah hahdaang nâng wãng lahma chenni dangtah a ereheh phangtang soam aroakte adong hehnâng thôkoh wah. 12Soam aroakte adong heh khhepho phannang heh demnâng chohmîn lahma thômîn wah; Ngale thinma sipâhi hehnâng jahmõang ngun kohwah 13Ngale thinma ngatwah, “Nema aroh thô en, ni rangpen jupthuko ate dijunte heh hûlahma mangpa huh pechhoan tah ngama. 14Are nginpa Govono ma metat ako, nima atenâng ethôkoh e, ererãngma ne chenjô sekmah patritthin aho nima epânga.”

15Sipâhi hehma ngunpa tha lahma thinnâng chenroh thôkotah a ererãngrãng thôwakwah. Ngale erohwah, thenep thejâ nângmin jews hehma nginpa eroh phoangthô eka.

Jisu Ate Dijunte heh tânâng Hôngloat

(Mak 16.14-18; Luk 24.36-49; Jon 20.19-23; Moatlem 1.6-8)

16Jisu ma thinnâng wângrãng thôkotah Galili wah hahhoko ate dijunte echhi wathe pa wângwah. 17Chenthu thinma Jisu chohkheko atenâng rangsoam wah. Rohkomin khuka pumma lepute dângwah. 18Jisu thintâko hehka lahma thinnâng ngatwah, “Nganâng Rangkhethung le hahtokkhoh kowah chentô Chaanpa lâkoh thang. 19Erohwah chentô mihnyan nyuchha, ngale chentô thenâng chhoan en, ngale ngadijunte rãng dangthukwak en: Ngale Wa mînko, Chha mînko, erediko Asâthôanju mînko baptijem koh en, 20Ngale ngama nenâng chentô thôkotah ngin heh keprãng hethô en. Ngale nga nedemnâng roantang roanjêngma athôan kotuk ejoh tonga.”

NIEMNYAN

©2010 Bible Society of India

More Info | Version Index