Search form

Mathiu 8

Jisu ma Mihnyan Mesiet

(Mak 1.40-45; Luk 5.12-16)

1Jisu hahhokho wah jâkhoamkat rienrien, mihnyan heh jahmõang ate diko junkhoam wah. 2Eko angêm khoanchetma chêmte wathe ate tâko hûlahma dakuh thohû lahma ngatwah, “Teso nangma mehun oko, nga eta sensiet hang.”

3Jisu ma atedek loatsiet lahma angêm wako sahloatwah, ngale atema ngatwah, “Ngama sensiet huneki,” “sen o!” phumma lemlienma angêm khoanchet kowah senwah. 4Erediko Jisu ma Atenâng ngatwah, “Tattan! hennângjô nekthôkoh, tintin wãnglohma soam aroakte nâng khesok wãngo, atema chenthatsû tanho; ngale nanga sentoh ngama anga ngama jetrãngma, Mosa ma chienwah soam aroak thinpa kohwen o.”

Jisu ma Roman Sipâhi Haa Mesiet

(Luk 7.1-10)

5Chenthu Jisu Kaparnam hahnâng hokko, Roman sipâhi sahhab chohmînhû lahma Jisu nâng chohsok rãng roatsep wah: 6Atema ngatwah, “Teso, ngahaa pa kôasô ma cheili chêmlahma jupthinko tonga.”

7Jisu ma ngatwah, “Ngama wãnglekma ate emesiet wãngang.”

8Sipâhi sahhab ma dânthâng wah, “Teso, eroh dangmah, ngama nanga ehumkhenko tâsiet hoktô mihnyan dangmek, jabkhab melolo chien o, ekojô ngahaa pa esen a. 9Ngamin nganoma sahhabdong khenko moekang, ngale ngakhen komin sipâhi heh tonga, wathe nâng ngama, ‘kao!’ menga angko, ate rângka a, ngale wathe nâng ‘wãngro, ngama meroo angko, ate rângwãngra! ngahaako,’ arepa mo o, ngama mechien angko, atema rângmoa.”

10Chenthu Jisu ma erepa chohtatko, ate bârit rewah, erediko Jisu ma ate diwah junkhôamte hehnâng ngatwah, “ngama linlin thôkoh eka, Isrial diak khenko are mihnyan rãngrãng dâlemsen machohkhe ekang. 11Ngama linlin thôkoh eka, jahmõang mihnyan sankat ngewah, sannyup ngewah hûlahma Abraham, Isak, ngale Jakob demnâng rangkhethung wah Joban Hahsông theko aroamma ephhekchhah wak a. 12Rohkomin Joban Hahsông thenâng tôngte jatlinlin heh rangnyek khennâng petphê katmin, eretheko pâchupkek lahma seplahma etongwak a.” 13Erediko Jisu ma sipâhi sahhab wako ngatwah, “humnâng wãngo, nangma chenroh dâlem eko ererãngrãng edang kohho.”

Ngale ere sanpoatko sipâhi sahhabwa haapa mewah.

Jisu ma Mihnyan Jahmõang Mesiet

(Mak 1.29-34; Luk 4.38-41)

14Jisu piter humnâng wãng lahma piter tangnyu nyong pa chetloatma jupthinko khunlahma khehokwah. 15Jisu ma ate dekko sahloatko khoanchet pa mewah. Ephumma atema toansat lahma Jisu nâng khoakhêm wah.

16Chenthu rangjâthah hokko, mihnyan hehma Jisu tâko juchhih lupte mihnyan heh siethokwah. Jisu ma juchhih heh jabkhab ma junloatwah, ngale chentô khoanchette heh mesiet rewah. 17Atema ere moatlem pa Isaia mõng ma jabtah pa toangtang dângkatrãng moatwah, “Ate dedema nãngkhun atam pa kep eka, ngale nãng khoanchet pa sahèn phetah.”

Hen Jisu dijunte Tâdângmin a

(Luk 9.57-62)

18Jisu ma ate tûmlitko mihnyan heh jahmõang khelahma, ate dijunte hehnâng joranka nâng danwâng rãng chienwah. 19Niemarang jettema ate tâko kalahma ngatwah, “Hethôte, nang chennângjô medang okomin nga nangdem demko ejoh chhoan e.” 20Jisu ma atenâng dânthâng wah, “Hien hehnâng thin tôngrãng ken tonga, ngale wo hehnâng thinrãng arup tonga, rohkomin Mihnyan Chharãng chenkojô ate boantông rãng the aho.”

21Dijunte ahan wathema ngatwah, “Hethôte, khebengko ngakka lekma ngawa mang rukamêng ang.”

22Jisu ma dânthâng wah, “Nangma ngadijun hang, mangpa mang rôande chenrumîn a.”

Jisu ma Pông Apat Mesiet

(Mak 4.35-41; Luk 8.22-25)

23Jisu khôankhoko chhangwah, ngale ate dijunte hehmin ate demko johchhoan wah. 24Lemlien ma pôngdong patdongma josiko metlahma khôankho pa thumjâ nemnem dângwah. Ere sanpoatko Jisu juplek dângwah. 25Dijunte heh ate tânâng kalahma satsiet katwah, thinma ngatwah, “Teso pânghi!” “nia lâmahrii eki!”

26Jisu ma dânthâng wah, “Ne chenrãngma aretô patrii eken a? nenâng dâlempa atôrînne!” erediko Jisu toanchep lahma pông apat pa jeksietwah, phumma kihchepchep jekwah.

27Anga ngama barii lahma ngatwah, “Arepa chenni mihnyan a? pôngpat memin ate nginkep eka!”

Jisu ma Juchhih Lupte Mihnyan Wanii Sênsiet

(Mak 5.1-20; Luk 8.26-39)

28Chenthu Jisu josi ranka wah Gadara diaknâng hokko, enângwah mihnyan wanii mangruk kenwah loatwãng lahma chohmîn wah. Ere mihnyan waniiko juchhih luplahma nyahrãng cheili dângwah, ngale erelem pumma henjô lechin dankhoam dângwah. 29Lemlien ma thinma hongrak lahma ngatwah, “Joban Chha, nangma ninâng chenni rehun ehia? sanpoat mathângma nichêmsiet rãng kaeroa?”

30Erekowah chentô letaangko wak jahmõang phhekchhah joaklahma dângwah. 31Ephumma juchhihma Jisu nâng roatsep wah, “nangma ni mejunlo hiko, irewak chhangko lupkathuk hi”

32Jisu ma thinnâng ngatwah; “Ka en,” phumma mihnyan kowah loatchhoan lahma wak chhangko lupkatwah. Erediko wak heh phangtang ka pumma jâchhoan kalahma josiko mahritkat wah.

33Wak heh sok arête mihnyan heh huhchhoan lahma hahdaang nâng wângwah, erediko thinma nginpa phangtang loatthôkoh wah, ngale juchhih lupte mihnyan heh nginpa thôkoh rewah. 34Ephumma hahdaang kowah chentô mihnyan heh Jisu chohmînrãng hokwah; chenthu thinma Jisu kheko, Atenâng nihah kowah chhoan o, ngama roatsep wah.

NIEMNYAN

©2010 Bible Society of India

More Info | Version Index