Search form

MATHI 26

Yisu Tepsettsü Tasa Asaba

(Mar. 14.1,2; Luk. 22.1,2; Yoh. 11.45-53)

1Kodang Yisui item o ajak jembima, pai pei nütsüngtem dang ashi, 2 “Anogo ana lir kümtettsü benjong alitsü ta nenoki metet aser Nisung Chir kangki nung angenloktsü asoshi bendanga agütsütsü.” 3Idangji putiungertem aser nübur tamburtem temaba putir, shiba dang Kaifa ta aja, par kima külemi sentep. 4Aser parnoki tekülak agi Yisu aputsü aser tepsetdaktsütsü asoshi bangjemtep; 5Saka parnoki ashi, “Asenoki benjong mapang nungbo ya meinyaktsüla. Asenoki ya inyakra, rongrongshishi adoktsü.”

Bethani Nung Totzü Mezütsüba

(Mar. 14.3-9; Yoh. 12.1-8)

6Tang Yisu Bethani nung zütsüra adokba Simoner kidang alidang, 7 tetsür kati sen aika alangba teronem totzü bongdang ka bener Yisu dangi aru; aser pa chiyungdak mena alidang, tetsür jagi Yisu kolak nung aji shilokja mezütsü. 8Saka nütsüngtemi aji angudang, parnoki ain adoka ashi, “Kechiba ya oda lalur? 9Kechiaser iba totzü ya sen aika yong yoker sensaker nem agütsütetla.” 10Saka Yisui aji meteta parnok dang ashi “Kechiba nenoki tetsürji timtemdaktsür? Kechiaser lai kü dak mapa tajung ka inyakogo. 11 Kechiaser sensakerbo nenok den teti alitsü, saka ni nenok den teti malitsü. 12Kechiaser lai kü mang nung totzü mezütsüba nungi ni leper nung aremtsü atema renemtsütsü asoshi lai inyak. 13Atangji ni nenok dang ashir, alima ajak nung kongsa iba Osangtajung sayutsüngidir, iba tetsüri inyakbaia la indang bilemteta jembitsü.”

Yihudai Yisu Ashioktsütsü Mulungtetba

(Mar. 14.10,11; Luk. 22.3-6)

14Tang nütsüng terana rongnung ka, tenüng agi Yihuda Iskariot, puti-ungertem dangi ao, 15aser ashi “Ni nenok nem pa bendanga agütsüra nenoki kü nem kechi agütsütsü?” Aser parnoki pa nem taribi sen semer züngzüka agütsü. 16Iba mapang nungjagi pai pa parnok nem bendanga agütsütsü asoshi mapang tajung ka bushi.

Nütsüngtem Den Kümtettsü Benjong Achiba

(Mar. 14.12-21; Luk. 22.7-14; Yoh. 13.21-30)

17Tang piyazü meinokba amtsük benjong tetenzükba anogo nung nütsüngtemi Yisu dangi arua ashi, “Na asoshi Kümtettsü Benjong onoki kong renemdaktsünür?” 18Yisui langzü, “Yimti jagi ir nisungba dangji shiang, Tesayuri ashir, Kü nütsüngtem den ne kidang ni Kümtettsü Benjongji chiyungdi.” 19Aser Yisui parnok dang ashiba ama nütsüngtemi inyak, aser parnoki Kümtettsü Benjongji renem.

20Tang nikongtsütsü atongdang nütsüng terana denji Yisu chiyungdak mena liasü. 21Aser parnok chiyungdang pai ashi, “Atangji ni nenok dang ashir, nenok rongnung kati ni ashioktsütsü.” 22Idangji parnok kanga jashia aküm aser nisung shiai pa dang ashitsü tenzük, “Kibuba aji ni asü?” 23 Aser pai ashi, “Shiba kü den su ka nung pei teka amoker, iba nisungjagi ni ashioktsütsü. 24Nisung Chir, pa indang zülua aliba ama aotsü; saka shiba ajanga Nisung Chir ashioktsüdir, iba nisung asoshi aiatai! Iba nisung asoshi pa mesoi ali tajungba süla.” 25Aser pa ashioktsüba Yihudai ashi, “Tesayur, aji ni asü?” Yisui pa dang ashi, “Nai shiogo.”

Kibuba Benjong Tenzükba

(Mar. 14.22-26; Luk. 22.15-20; 1 Ko. 11.23-25)

26Parnok chiyungdang Yisui amtsük agia moatsü aser aji sangsa-a pai nütsüngtem nem agüja ashi, “Agiang, chiang, ya kü mang.” 27Aser pai marok ka agi, aser tenüng asang, aser parnok nem agüja ashi, “Nenok ajaki ya jemang; 28kechiaser ya kü tezüngzüktepba azü, koba jenti pur temenen atoktsü asoshi tokshir. 29Saka ni nenok dang ashir, nenok den ni Kü Bu Yimli nung tsükmenatzü tasen majem tashi tang nungi ni iba tsükmenatzü majemtsü.” 30Aser parnoki ken ka tener Oliv tenem leni ao.

Peteri Menangzüktsü Indang Shinba

(Mar. 14.27-31; Luk. 22.31-34; Yoh. 13.36-38)

31 Idangji Yisui parnok dang ashi, “Taonung nenok ajaki ni toktsür jena aotsü, kechiaser ya zülua lir, ‘Ni sannüker dak azüktsü aser san telok prokshidaktsütsü.’ 32Saka ni shia arur külen, nenok dang tama ni Galil-i aotsü.” 33Peteri pa dang langzü, “Ajaki na toktsür oaka, nibo kodanga na toktsür majentsü.” 34Yisui pa dang ashi, “Atangji ni ne dang ashir, taonung ani makongdang nai asemben tashi ni menangzüktsü.” 35Peteri pa dang ashi, “Ni ne den tasütsüsa liaka, ni na menangzüki malitsü.” Yamajisa nütsüngtem ajaki ashi.

Gethsemane Nung Sarasademba

(Mar. 14.32-42; Luk. 22.39-46)

36Idangji Yisui parnok den Gethsemane ta ajaba tesem kati arua pa nütsüngtem dang ashi, “Ni ajagi oa sarasadem dang nenok yangi menang.” 37Aser pai Peter aser Zebedi chir ana pa den ani aser temulung kanga shiranga timtemmeso. 38Idangji pai parnok dang ashi, “Kü taküm tasütsü ama kanga jashir, nenok yangi ata-a liang aser kü den saksalema liang.” 39Pai tejaklen tatsüka oa, pa tejak rembanga sarasadema ashi, “Oh Oba, ya kokra iba marok ni nungi agiendakjang; aji saka ni mulungba ama masü, saka nai mulungba ama sang.” 40Pai nütsüngtem dangi arudang parnok amua oa ngua, Peter dang ashi, “Nenoki ghonda ka kü den saaka meliteter no? 41Tatitang nung metsüktsü nenoki saksalemang aser sarasademang; Tanelai jangrar, saka shi nung tashi mait.” 42Ano pai tanaben oagi sarasadema ashi, “Oh Oba, ni ya mejemi ya anentsü mokokra, ne mulung sang.” 43Pa tanaben aru aser parnok amua oa angu, kechiaser parnok tenük chilar liasü. 44Pai tana parnok toktsür oa tasembena o kasaji shia sarasadem. 45Idangji pai nütsüngtem dangi arua parnok dang ashi, “Joko mejangang, aser nenok anisüngzükang, ajiang, mapang tonga aitogo, aser Nisung Chir temenenpur ket nung ashioktsütsü. 46Aramesoang, asenok odi. Ajiang, ni ashioktsüba anasa lir.”

Yisu Ashioktsüba aser Apuba

(Mar. 14.43-50; Luk. 22.47-53; Yoh. 18.3-12)

47Pai jembia alidang, Yihuda terana rongnung ka aser pa den puti-ungertem aser nübur tamburtem nungi telok tulu kati nok aser süngsü bener aru. 48Tang pa ashioktsübai parnok nem temaitsü ka agüja ashi, “Ni shiba dak tebang mesepdir, ibaji pa; nenoki pa puang.” 49Idangji pai Yisu dangi arua ashi, “Tesayur, junga liang!” Aser pa dak tebang mesep. 50Pai pa dang ashi, “Temba, na kechi inyaktsü aru, aji inyakang.” Idangji parnoki arua Yisu dak teka ia apu. 51Aser ajiang, Yisu den alirtem rongnung kati pa teka songtoka pei nok atsüteter, temaba putir kilir dak alep aser pa tenarong leptoktsü. 52Idangji Yisui pa dang ashi. “Ne nok pei alidak tanaben yuang, kechiaser shiri nok amshidir, parnok ajak nok agi samatsü. 53Mesüra kü Bui tanga kotak nungi tenyartem meyirijang aika yoktsüsa ni pa dang mepishitsü makok ta nai bilemer asü? 54Aji süra Laishiba kobai yamai asütsüla ta ashir aji kechi koda ataloktsü?” 55 Iba mapang nungji Yisui telok dang ashi, “Nenoki rakzükraktemer anema arur ama nok aser süngsü bener ni aputsü arur no? Tenla kidang ni anogo shia sayua liasü saka nenoki ni mapu. 56Saka ya ajak ainkartemi züluba Laishiba ataloktsü asoshi arur.” Idangji nütsüng ajaki pa toktsü aser ajen.

Mungdang Madak Yisu O Bendangba

(Mar. 14.53-65; Luk. 22.54-71; Yoh. 18.13-14,19-24)

57Yisu apurtemi pa temaba putir Kaifa kidangi anir ao, kong tezülurtem aser nübur tamburtem külemi sentepa liasü. 58Idangji Peteri temaba putir kima tashi oji oji ta pa sülen anitak. Aser pai kilungi ai aser Yisu dak kechi atalokdir aji metettsü asoshi tanükertem denji amen. 59Tang puti-ungertem aser mungdang ajongai Yisu südaktsütsü asoshi tiyazü kuli bushi. 60Aser tiyazü kuli aika aruaka, parnoki kecha mangu. 61Saka tesülen nisung ana aru aser ashi, “Iba nisungi ashi, ni Tsüngrem tenla kiji raksatsü aser aji asemnü nung yanglutsü akok.” 62Idangji temaba putiri noktak aser Yisu dang asüngdang, “Nai kecha melangzür no? Na anema parnoki kechi kuli bener arur?” 63Saka Yisui kuka mesüi ali, aser temaba putiri pa dang ashi, “Taküm Tsüngrem tenüng nung ni na azüngashidaktsür; na Tsüngrem Chir Khristaji asü masü? Onok dang shiang.” 64 Yisui pa dang langzü, “Nai aji oda shiogo; saka ni ne dang ashir, tang nungi nenoki Nisung Chir Tsüngrem ain tajichilen mena aliba aser anüng mepet nung mener aruba angutsü.” 65Idangji temaba putiri pei süoshi shisa-a ashi, “Pai Tsüngrem atala-a jembiogo! Asenok asoshi kuli tali kechi tenüngdaktsü. Tang pai Tsüngrem atalaba nenoki angashiogo. 66Nenokia kechi bilemer?” Parnoki langzüa ashi, “Pa tasütsü tetemsü.” 67Idangji parnoki pa jak nung metsü metsüloktsü aser pa dak maoktsü, aser ano kari pa dak maokja ashi, 68“Hai, Khrista, ne dak azükbaji shiba? Onok dang shina shiang.”

Peteri Yisu Menangzükba

(Mar. 14.66-72; Luk. 22.56-62; Yoh. 18.15-18,25-27)

69Tang Peter kima kilempok nung mena liasü, idangji kilitsür kati arua pa dang ashi, “Na-a Galil nunger Yisu den liasü.” 70Saka Peteri parnok ajak madang menangzüki ashi, “Nai kechi ashir ni memetet.” 71Aser pa kikümi tugudang, tangar aiür kati pa angu aser idakji alirtem dang ashi, “Iba nisung Nazaret nunger Yisu den liasü.” 72Tanaben pai azüngashia menangzüki ashi, “Nisungbaji shibar ni memetet.” 73Kenpiga lir, anasa noktakertem arua Peter dang ashi, “Atangji na parnok rongnung ka, kechiaser ne osü agi na jungkai adokdaktsür.” 74Idangji pai atakatemtsü aser azüngashitsü tenzük, “Nisungbaji ni memetet.” Idangyongji ani akong. 75“Ani makongdang nai ni asemben menangzüktsü” ta Yisui ashiba oji Peteri bilemtet. Aser pa tugua ku kua ajeb.

Ao Naga Bible 2010

©2004 Bible Society of India

More Info | Version Index