Search form

Ngiokhem 1

Ngioya

1Yordan Haiu yankü ajepek etsai liutsa nai, Süf shimkü Yordan tsamei nai noitaoko haiu etsai Paran noksong naiuso haiu etsai Tofel, Laban, Hazerod naiuso Dizabod noksong nouso jetko Mosaüh Israel thsoso tü chitetsün ngio nouso nung thsam nouko noin. 2Edom king goumchi yam tsangkü khunai Sinai King ainou Kades Barnea saokü khuau ajekhaiu chekü tsaknyi theji. 3Ngüsoüh Ijip wankü khuküta pon aopüle alei chekü tsak ajekhaiuve ayalonyi nouko Mosaüh Apaou nou apa tü thoiluttsün alum Israel khaiuniahoi nouso hau chiten. 4Nung Amor hai nokpao Sihon sauüh Hesbon noksong nai nokshingkü noiküla, naiuso Bashan nokpao Og sauüh Astarod naiuso Edrei noksong nai nokshingkü noiküla nung Apaou nou thashiolokütün phiai noiküla. 5Khaiuniahoi nouso Yordan ajepek nai Moab goumchi ai noitaoko Mosaüh Apaou ün ngiokhem nouso thanekü chiteau tsalo.

Apaüh ngiom, 6“Tilai sam Sinai King nai noiküla, sam Goa, Apaou, nou sam tü ngiom, ‘Asam nung king nouko saiukü kihlowaniu. 7Asao- thang laopeng küta tsalokü lükhu. Amor hai goumchi, nung lemkü noitsün khiamkhan nouso, Yordan tsamei nai, king naiuso anyap goumchi nai, ajepekki khiamkhan nai, naiuso Mediteranian Haiu asong saokü, Lebanon King nouso yankü, haiu asong Eufrates saokü, asam Kanan goumchi nai lükhu. 8Nung goumchi nouso apem Ngo Apaou, asam paosipo, Abraham, Isak, naiuso Yakob Goa nou ngüso thsaosithsoso hau kiuao thaloutaiutsün nungai khukü nung goumchi nai lükihlo.’”

Mosaüh Mikhemhoi Shingthioji:

(Aniasan 18:13-27)

9Mosaüh khaiuniahoi nouso tü ngiom, “Sam Sinai King nai noi taoko ngo asam tü ngio-iu, ‘Asam niakeiau jü thaiutha thsale thatü thsüokü noin, ngo nung pemsa nou chhiao tsüshio. 10Apaou asam Goaüh maou nai kianthsüo nousoli asam ouk kiu-iu. 11Apaou asam paosiposo Goa nou asam mechiai heng tsak nou piakü naiuso tsüomeikü, apaüh thaloutaiutsünli asam ashankiu! 12Lüko ngo jüpemsa nou asam ngemelattsün thsale titi thekü lothat kiuao shio-e? 13Asam mele pungkü ainou mongyang noitsün, angela naiuso chhisiya nai monkü noitsün ajantso achosan, küta ngo asam khako ahei au shankiu-e.’ 14Nung sam thaiutha meikü noin ta asamüh ngü tü mongchiokü ngiom. 15Nungtiphe ngo asam kau nouso ainou asamüh chosantsün mongyang noitsün naiuso chhisiya nai montsün eheihoi nouso loküta asam khako ahei theau taiukiu. Khaiunia ajantso heng tsak khako ahei theao, ajantso tsom khako ahei theao, naiuso ajantso aopungo khako ahei theao, naiuso ajantso che khako ahei theao taiukiu. Ngo loüh kau pungkü nai amao ahei hoi lüko ajantso taiukiu.”

16“Nung taoko ngo ngüso tü ayam hankü ngiom, ‘Asam khaiunia ongko ngemelatkü sungtsün tü lüanglu, nung asam khaiunia thaiutha lu lüko tsüdekünai asam ongko kihatsün me- lemao hai thaiutha saokü mongthio hakü noi nai, angemelattsün mi pungkü ngiotsüo nai lükhemkiu. 17Asamüh janthattsün ko phaphi phamong ti lachhi, apa sau thalünou khaiunia pungkü ta wekü lükhem- kiu. Asam saulün hatkü lanoi, tititenai asamüh khemkiutsün nung Goa ainou shiji. Angemsingem ajantso asam thaiutha thatü chekkü sungtaoko, nung jü dongai kankü ashi, küta nung ngo janthat kiu-e.’ 18Nung taokolu asamüh chhisiya ao noitsün alum thaiutha asam hau ayamhan alum kiu-iu.”

Kades Barnea ainou Akauthahoi Hongpengji:

(Haove 13:1-33)

19“Sam Apaou Goa nou sam tü thoiluttsün samüh chhin. Sam Sinai King wankü khuküta Amor hai king goumchi yam ahatau lümeikü noitsün liutsa lang yankü khukü noiküla. Tilai samüh Kades Barnea nai shisaom, 20-21Ngo ngiom, ‘Sam Goa Apaou, sam paosiposo Goa nou sam hau kiutsün Amor hai king goumchi nai asam lo shikü noin. Athaplu, nung nungko noin. Apaüh thoiluttsünli khukü nungko lükihlo. Lahenyi tsüdekünai lahat.’” 22“Lüko asam jü dongai shiküta ngiom, ‘Sam khuau yam ameiting naiuso nungko ti in noknio nouso noin, nungh goumchi sailu küta shiau samüh akautha khaiuniahoi sam khako hongko.’”

23“Nung chhiau mein ta yangküta ngo khaiunia chekü nime kau pungkü ainou tsak tsak chosan. 24Ngüso king goumchi nai Eskol tsamei saokü khuküta nung kautha lokü shin. 25Ngüsoüh nungai epiutsün shep ajantso sam hau kankü yashin, küta Apaou sam Goa nou sam hau kiutaiutsün goumchi thatü memei goumchi noin ta ngio kankü shin.”

26“Lüko asamüh Apaou asam Goa nou thoiluttsün thako khengshi, nungphiai asam athaloutsün goum- chi nai tsünap. 27Asam tsaküh tsak tü namnamkü ngiom, ‘Apaou nou sam chinyanji. Apaüh sam Ijip ainou Amor hai hau kiukü loat-iau niasan. 28Sam nungai tiauta khu-e? sam hatji, nung khaiuniahoi nou sam chiai kongsimongkü naiuso konsi- theng laiukü noin. Ngüso noknio nouso maou sungyapkü be nou bejeikü noin ta samüh hongtsün khaiuniahoi nousoüh sam hau chitekü noin. Ngüsoüh nungai akonghoi nouso epm.!’”

29“Lüko ngo ngiom, ‘Nung khaiunia nouso lun hatkü lanoi. 30Apaou asam Goaüh asam yam nia-e, naiuso asamüh apa chhi Ijip nai naiuso liutsa nai epkü shitsünli, apa asam thaiuthako likiu-e. 31Pohai tsaküh meshen thso paokü shitsünli apaüh asam yam thathonkü nung athang shisaokü kipsankü shitsün asamüh epiu.’ 32Lüko ngo tilüsong ngiolünou, naiuso asam noi-iau thaiutha asao thang yamao apa asam khako asaita khukü noi lüko asamüh apa da amonglam tsünoi. 33Asam hau yam hanau, apa asam khako asoh taoko In kheam tsangkü naiuso anyi taoko thengmia kheam tsangkü khukü noiküla.

Apaou nou Israel hai hau Angja kiuji:

(Haove 14:20-45)

34Apaou nou asam namnamtsün lula küta mongmat-iu; 35‘Asam paosiposo tü ngo thaloutsün memei goumchi nai nung akhengshi vetao khaiunia tsaktso tsünappe. 36Jefune thso Kaleblu nungai nappe, apa ngü tü mong saitha nouko noikü shin, küta apaüh kauthakü shitsün goum- chi ngo apa naiuso apa thsaosithsoso hau kiu-e.’ 37Asam shioko Apaou ngüko lüko mongmatkü shin, ‘Mosa, ni lüko nung goumchi nai tsünappe. 38Lüko Nun thso Yihusua ni hachutsün mongyang lokongkü lülomong. Apaüh Israel hai niakü nung goumchi nou thalou-e.’”

39“Nai Apaou nou asam apem tü ngiom, ‘Athsoso sauhai lo thatü henkü athe amei mongelakü noin, nungsolu nung goumchi nai nappe, lo ni methso ta ngiotsünso asam ehoi nou thaloukü kanlükhunane. Ngo goumchi nou ngüso hau kiu-e, naiuso ngüso nungko kihlo-e. 40Lüko asam khaiuniahoi nouso to Agaba yam tsangkü laokü khukü ta liutsa nai lünap.’”

41Asamüh thalan, “Mosa, samüh Apaou thako angei sunlo-iu. Lüko lo samüh sam Goa nou thoiluttsünli ngüso komane. Nungai king goumchi nou shioloau thatü chekkü tsüde ta yangkü asam khaiunia pungkü ehliau lükhemlo.”

42Lüko Apaou nou ngü tü ngiom, “Ngüso tü nungso lükom ta lülotsüo, tititenai ngo ngüso ko tsünoi-e, naiuso ngüso ehsoüh ngüso shiolowane.” 43Ngo asam hau Apaou nou ti ngiom, nung chite-iu, lüko asamüh anglu ao tsümongkiu. Asamüh apa thako khengshi, naiuso asam abülom nou asam king goumchi nai nap. 44Nungai Amor hai sauhai nung king goumchi nai kihkü noiküla, ngüso noum hoili shikü asam Horma saokü komkü khu naiuso nung king goumchi Edom nai asam shiolowan. 45Nungtiphe asamüh Apaou tü ahachu thaiutha welüko, apaüh asam tü angluao mong tsükiukü noiküla. 46Nung shioko sam Kades nai atao laiukü noian.

ASIO THSAMLAI

©2005 Bible Society of India

More Info | Version Index