Search form

Ngiokhem 10

Mosaüh Athoiluttsün Epshiji:

(Aniasan 34:1-10)

1“Nungai Apaou nou ngü tü ngiom, ‘Aya naili lungkhio nime alangsan naiuso nungso thiokü taiuao paidan tsak lüshan, küta king nai jüdongai kankü asong; 2naiuso ni tisübao ngiokhem lungkhio nouso lopaian nungli lo ngo nung lungkhio nouso da satlute, küta ni nung paidan nai taiuao noin.’

3“Nungtiphe ngo akacia pai nou paidan tsak shan, naiuso aya naili lungkhio nime langlo küta nungne king nai kankü sungh. 4Naiuso aya sattsünli apaüh ngiokhem che nung lungkhio nai sat- nung ajekhaiu asam kamshikü noitsün taoko Apaou nou king nai In ainou asam ko chite, naiuso nung lungkhio nouso Apaou nou ngü hau kiu. 5Küta ngo king ainou laokü saokü, ngo shantsün asio paidan nai lungkhio nouso thiokü taiu, naiuso Apaou nou ngü tü thoiluttsünli, nungso losaokü nungko noin.”

6(Jaakan hai ün temkhao nouso ainou Israel hai tsalokü Mosera ai khu. Nungko Aron ean küta khanan, naiuso apa thso Eleazar apa liko meson tsalo. 7Nung ainou ngüso Gudgoda ai khu, naiuso loüh nung ainou khiam saiukü noitsün athang tsak Jotbatha ai khu. 8Nung king nai Apaou nou mesonli apa yathsüoau, naiuso apa nianko ouk saoau, naiuso Athalou-e Paidan paotsangau Levi mele shinglutkü taiukiu. Nung lonyi saokü ngüso chhisiya haoson noin. 9Nung shioko Levi mele nou amao mele nousoüh eptsünli gouthang haoson mothikü tsüep, ngüsoüh ti ep nung Apaou ainou asam Goaüh thalotaiutsünli meson haoson aküo amei nou ep.)

10“Ngo aya nai noikü shitsünli king nai aopülenyi naiuso aopülesoh noiküla. Asam tsülomowanao ngo ko- jakiutsün ta Apaou nou mongchiokü thala. 11Nungai ngü tü apaüh asam paosiposo tü apaüh thalotaiutsün goumchi tengkam kamau asam nialokü lükhu ta ngiom.

Goa nou Ti Saoji:

12“Israel khaiuniahoiso, Apaou asam Goaüh asam ainou ti saoji nung anglu: Apaou lüamkham naiuso apaüh thoiluttsün apem lüchhi. Asam mongpem apem nou apa lütsüojin, naiuso lüyathsüo, 13naiuso apa ngiokhem nouso apem angio lüang. Ngo lonyi nungso asam alesan noiau thaiutha kiuji. 14Aün atsokting nouso lüko Apaou haoson noin, naiuso goumchi nou apa ün nou naiuso nungko noitsün alum apa ün noin. 15Lüko Apaou atsüojin asam paosiposo thaiutha thatü songkü noiküla, nungshioko amao khaiunia- hoi liko apaüh asam chosan, naiuso asam loto apa achosan khaiuniahoi noin. 16Nungtiphe lo nai yaküto asam Apaou ngio angkü anoi naiuso mong kongkü noitsün ainou alaolo. 17Apaou asam Goa to goa nouso khako akhengting naiuso oukong apem khako oukongting Goa noin. Apa to asong naiuso oukong, naiuso apa lün to hattau noin. Apaüh phaphi phamong tsükankeiji, naiuso apaüh nekhem paopei nouso tsülouji. 18Apaüh mejetthso nouso naiuso jihinyiu nouso tü wekü kankeiji, apaüh sam khaiuniaso ko kihatsün gohmao khaiuniahoi nouso tsüojinji, naiuso ngüso hau eheshiu naiuso neshe kiuji. 19Nungtiphe asamüh nung gohmao khaiunia nouso hau atsüojin lühan, tiautenai asam lüko jam Ijip nai gohmao khaiuniahoi noiküla. 20Apaou asam Goa da lüang naiuso apalu lüamkham. Apa tü mong kiukü lünoi naiuso asam athalou-e apa niankolu lüshan. 21Apa lülom, apa asam Goa noin, naiuso apaüh asam khako ahatao chhisiya asong chhitsünso thaiutha asam pemüh epiu. 22Tilai asam paosiposo Ijip nai khu, nung taoko ngüso mepem aochinyatlu noiküla. Lüko loto Apaou asam Goaüh asam maou nai kianthsüo nousoli piakü iula-i-iu.”

ASIO THSAMLAI

©2005 Bible Society of India

More Info | Version Index