Search form

Ngiokhem 11

Apaou ün Asong:

1Apaou asam Goa lütsüojin naiuso apa ngiokhem nouso apem angio angkü lüthe. 2Apako tsakeitsün tsangkü asamüh Apaou thaiutha lonyi ti ngelo nung lüyangsan. Nung ngetsün asam thsoso tsüdekü, asam pem noin. Asamüh Apaou ün asong, apa oukong si akong nou, 3naiuso apa ii chhisiya nouso epiu. Asamüh Ijip nokpao naiuso apa goumchi athum tü ti chhin nung epiu. 4Apaou nou Ijip hai süpai hoi tilai ngüsoüh asam tü kom- kü noiküla, nungai Aseng Khiamnok nai ngüso mokthso naiuso tsamkei nouso hakü moisemkü mowanitsün asamüh epiu. 5Asam nungai moshingoikü nou khako liutsa nai Apaou nou asam thaiutha ti chhikü noiküla nung asamüh ngeji. 6Reuben kau ko Eliab thsoso Dathan si Abiram tü apaüh ti chhikü noiküla nung asamüh lüyanglu. Khaiunia apem nou epkü ngüso si ngüso tsammong, ngüso nejenkhio, ngüso tsamkei, naiuso thainian nouso apem hakü goum nou paiküta mowan. 7Nung Apaou nou chhitsün chhisiya asong nouso apem epkü shitsün asam noin.

Athaloutsün Goumchi nai Ouk nouso:

8“Ngo asam hau lonyi kiutsün ngiokhem nouso apem angkü lüthe. Nungaito asamüh haiu nou yanao shio-e, naiuso asam napao noitsün goumchi nou thalo-e. 9Nungai Apaou nou asam paosiposo naiuso ngüso thsaosithsoso tü thalotaiutsün memei naiuso atsüomei goumchi nai aakih atao laiukü kih-e. 10Goumchi sübao asamüh thaloau noin nungto asam nung khako kihkü shitsün Ijip goumchi li tsüde. Ijip goumchi aito, asamüh lelo nou tilai lethio-e, asamüh khiam nou tsatsakü kongkü chhiau noiküla, 11lüko asam napkü thaloau noitsün goumchi to king naiuso tsamei saokü ah ou nou penkü gohthan aakü noitsün goumchi tsak noin. 12Apaou asam Goaüh nung goumchi tü paotsangji naiuso nung goumchi khütha nai asaita apaüh jimkü noiji.

13“Nungtiphe ngo asam hau lonyi kiutsün athoiluttsünso angio angkü lüthe; Apaou asam Goa lütsüojin naiuso amongpem apem nou lüyathsüo. 14Asamüh nung angkü chhi naito, apaüh asam goumchi nai thsanyan nyim si thsamthuk taoko pokü sungnai ah ou nou honge, nungaito asam hau chih nou, theng nou, naiuso Olip khiam nou, 15naiuso asam thainianso thaiutha khengliu nou sunge. Asamüh aiutsün chihsikhiam asamüh eppe. 16Asam Apaou Goa ainou amao goa amkhamao naiuso yathsüo au lanialükhun-i. 17Asam nialükhuni naito, Apaou nou asam ko mong- mate.Apaüh ah ou nou lolaokü wan naito, asam goumchi chihle khiamle sungao tsüshiokü goh thatü waikü noi-e. Nungai asam goumchi sübao apaüh asam hau kiuji nungto amei tsak noilüko nungai asam eane.

18“Nung athoiluttsünso yangsan- kü asam mongai tsübeantingkü lütaiu. Nungso ayangsanau thaiutha asam pha tü kelutkü naiuso asam khakheng nai leplutkü lütaiu. 19Nungso asam thsoso hau lütsande, asam tsamai noi taoko, yamai tsakei taoko, aalo taoko naiuso chhisiya taoko nungso thaiutha lüchite. 20Nungso asam tsam koukhan nouso naiuso bekhan nouso tü satlutkü lütaiu. 21Naito asam naiuso asam thsoso asam paosiposo tü Apaou asam Goaüh kiu-e ta thalotaiutsün goumchi nai aakih tao laiukü kih-e. Goum khütha nai maou nou noitsün lektso asam nungai kih-e.

22“Ngo asam hau kiutsün ngiokhem nouso apem mong kiukü angio angkü lüthe: Apaou asam Goa tü lütsüojin, apaüh thoiluttsünso alum lüchhi, naiuso apa tü mong kiukü lünoi. 23Naito asam khutsün ko asam chiai mele asong naiuso oukong asong mele nouso apem ko- mane, naiuso nung goumchi asamüh thalo-e. 24Asamüh yanlükhuntsün goumchi apem asam ün noi-e. Asam elung ajepekki nai singtso goh nou tü yalo nou ajenapki nai Lebanon king saokü noi-e, naiuso ajepek nai Eufrates Haiu tü yalo nou ajenap nai Mediteranian khiamnok tü thalutkü noi-e. 25Apaüh thalokü taiutsünli, asam nung goumchi tilüsongai khu-e, Apaou asam Goaüh asam lün khaiu- niahoi nouso hatkü iula-i-e, naiuso asam sauüh thayangau tsüshio-e.

26“Lonyi ngo asam hau ouk tsüdekünai athesan tsak cholo-iau kiuji: 27Ouk nou: Lonyi ngo asam hau kiutsün nung Apaou asam Goaüh thoiluttsün asamüh angio ang naito, 28lüko athesan nou: asamüh nung athoiluttsünso angio tsüangkü nung khako tilaitso tsüamkhamkün amao goa nouso amkhamao laokü khu naito. 29Tilai Apaou nou asamüh thaloau noitsün goumchi nai niathiokü shi-e, asamüh Girizim King ainou ouk welutao noin, naiuso Ebal King ainou athesan welutao noin. 30(Nung king nime nou ne Yordan Tsamei nai kihtsün Kanan hai goumchi nai Yordan Haiu ajepek nai noin. Nungso ajenap dongai nai, More ün asio pai nouso ainou laiukü tsükhukü Gilgal noksong shimkü noin.) 31Asam lo Yordan Haiu yankü khuau noin küta Apaou asam Goaüh asam hau kiutsün goumchi nou thalou-e. Tilai asamüh nung goumchi thalou-e, küta nungko kihlo-e, 32ngo lonyi asam hau kiutsün ngiokhem nouso apem angkü kankei-e ta asamüh lüyang.”

ASIO THSAMLAI

©2005 Bible Society of India

More Info | Version Index