Search form

Ngiokhem 12

Amkham thaiutha Athang Tsaklu:

1Apaou asam paosiposo Goa nou asam hau kiutsün goumchi nai asam tilektso kihlünou nung lektso angio angkü kankeiau nung ngiokhem nouso noin: Nungso tü angkü lüthe! 2Asamüh thalotsün goumchi nai, khaiuniahoi nousoüh ngüso goa nouso tü king si choi naiuso paikhem nouso nai amkhamtsün athang nouso apem lülothean. 3Ngüso amthang nouso lothekü lüwan naiuso ngüso ün asio lung kheam nouso nelangkü thiopekkü lüwan, Ashera sotsom nou In nai lüjahwan, naiuso ngüso ün amao sotsom goa nouso henekü lüwan, nungaito ngüsoüh nungso athang nouso nai laitso tsü amkham shi-e.

4“Asamüh Apaou asam Goa tü nung khaiuniahoi nousoüh ngüso goa amkhamtsün saisileli la amkham. 5Asam kau nouso kihtsün goumchi nai Apaou nou khaiuniahoi shikü apa tü amkham i-au athang tsak chosane, nungai apa khako asam shiküta amkhame. 6Nungko asamüh ajah chaithio nouso naiuso amao chaithio nouso, asam ekve chaithio nouso, Apaou tü thalokü taiutsün paopei nouso, asam amongchio chaithio nouso, naiuso chongting puntsün thainian naiuso onnemok nouso thioau noin. 7Nungai asam hau ouk kiutsün Apaou asam Goa khako, asam naiuso asam tsam- mongsoüh chhisantsün ainou amei monglingkü heshiu-e.

8“Tilai nung atao shi-e, asamüh nung khako chhikü shitsünli tsüchhi-ela, lo saokü nouko asamüh asam mongchio nai amkhamkü shi-iu, 9tiautenai asam aalokü kih au Apaou asam Goaüh asam hau kiutsün goumchi nai asam monap. 10Tilai asamüh Yordan Haiu yane, Apaou nou asam hau nung goumchi thalo-itsün nai asam kih-e. Apaüh asam ehoi apem ainou kipsankü taiu-e, naiuso asam aalo nai kih-e. 11Apaou nou apa amkham iau athang tsaklu chosane, naiuso asamüh ngo thoiluttsün alum nungai kankü shiao noin. Jahkü amkhamao noitsün chaithio nouso, ekve chaithio nouso, naiuso amao chaithio nouso, naiuso asamüh Apaou tü thalotaiutsün amao chaithio nouso. 12Asam thsoso ko, tsamki nouso ko, naiuso asam noksong nai kihatsün Levi haiko aikü nungai Goa khako asam lümongling, Levi haiüh ngüso tengkhaiu goh haoson tsütaiu ta lüyangsan. 13Asamüh aloat chaithio nouso asamüh chosantsün athang nai tsüthio-e; 14lüko asam kau ongko tsak sübao ko Apaou nou chosane, nung athang nouko asamüh ajah chaithio nou lüthio, naiuso nungko ngo asam tü thoiluttsün chhi nouso lüchhi.

15“Lüko asam tilüisongai kih-e asamüh asam thainian nouso loat- küta heau asam ti akiap tsünoi. Apaou nou asam hau titi piakü kiu-e nungti asamüh heau shio-e. Asam apemüh amkham nai losiokü lüko tsüdekünai tsülosiokü lüko, asamüh jinchai tsüdekünai chiu nyih hetsünli nungso nyih heau shio-e. 16Lüko asamüh nungso she eheshiu chihsikhiamli tsükankei-ela, lüko nung ashe nouto asamüh goh ai khiamli lüthsa-an. 17Asam kihtsün athang nouso ai Apaou hau chaithio kiutsün nungso tsüheau noin: asamüh thiotsün khülam ekve, theng chaithio, Olip chaithio, naiuso aya puntsün thainian ainou, asamüh thalotaiutsün paopei nouso, among- chio chaithio nouso, tsüdekünai amao chaithio nouso, naiuso onnemok chaithio nouso ainou titso lahe. 18Apaou asam Goa tsangkü chosantsün amkhamthang tsak nai, Apaou asam Goa khako asam, naiuso asam thsoso, asam tsamkiso, naiuso Levi hai sauhai asam noksong nouso ko kihakü noin ngüso ko hakü lu nung chaithio nouso heau noin. Naiuso asamüh nungko asamüh chhisantsün apem tü monglingkü theau noin. 19Asam goumchi nai kihtsün lektso Levihai tsüpao- tsangkü tsüwanao tsüokü lüthe.

20“Tilai Apaou asam Goaüh apaüh thalotaiutsünli asam goumchi losungkiu-e, asamüh nyih nou asamüh mongchiotsünli heau shio-e. 21Amkham thang tsak nou thatü laiukü jetekü naito, nungai tilai asam mongchiosane, asamüh Apaou nou asam hau kiutaiutsün thainian tsüdekünai onnemok tisübao lünou loatkü, ngo asam tü ngiotsünli, asamüh asam tsamai nyih nou heau shio-e. 22Amkham nai siokü tsüdekünai tsüsiokü saulünou, jinchai si chiu nyih hetsünli apaüh nung nyih heau shio-e. 23Ashe sunkü noitsün nyihlu asamüh lahe, tititenai aa nou she nai noin, küta asamüh aa nou nyih nouko hakü tsüheao noin. 24Ashe nou eheshiu liko lakankei, nungliko to goh nai khiamli lüthsa-an. 25Asamüh nung athoilut nou angkü thenaito, Apaou nou monglinge, naiuso asam si asam thsaosithsoso thaiutha aküo meikü noi-e. 26Asam chaithio naiuso paopei nouso asamüh Apaou tü thalokü taiutsün amkhamthang tsak nai kankü lükhu. 27Nungai Apaou amthang nai thumkü jahkü kiutsün chaithio lu lüthio. Asamüh hetsün nyih naiuso ashe nou, amthang nou tü satluttsün chaithio nouso lüko akiu. 28Ngo asam tü thoiluttsün alum nouko mong kiukü angio angkü lükankei, naiuso asam si asam thsaosithsoso thaiutha aküo meikü khu-e, tiautenai nungko Apaou asam Goa ti nou monglingi-e nung ayam thanou asamüh chhi-e.

Sotsom goa nouso thako Alotsüo:

29“Asamüh ngüso goumchi komhetsün taoko Apaou Goa nou mele nouso apem lotheane, naiuso asamüh nung thaloküta nungko kihlo-e. 30Apaou nou nung mele nouso lomowankü phiai, asam ngüso don yam nouko tsühoilut au tsüokü lüthe, tiautenai nungko hoilut naito asam thaiutha nung aküothe tsak noi-e. Asamüh ngüso goa titi amkhamji nung yamsanau lakowe, kowe naito nung saisile lilu asamüh lüko amkhame. 31Asamüh Apaou asam Goa, ngüsoüh ngüso goa amkhamtsün saisile li la amkham, tititenai ngüso goa amkhamtsün ko to, ngüsoüh Apaou nou chinyantsün chhisiya nouso apem chhiji. Ngüsoüh ngüso amthang nai ngüso thsoso saokü in nai aloat chaithio thioji.

32“Ngo asam tü thoiluttsün alum asamüh lüchhi, nungtü titso lahoilut tsüdekünai nung ainou titso lalowan.

ASIO THSAMLAI

©2005 Bible Society of India

More Info | Version Index