Search form

Ngiokhem 15

Pon Chinyat:

(Levi 25:1-7)

1“Pon chinyat nou thontsün pungkü asamüh asam tü sauhaiüh chai laiutaiukü noin nung- so chailaiu leanau noin. 2Naiuso nung chailaiu leantsün yam nungti noi-e: Khaiunia pungkü sauhaiüh meshen khaiunia Israelhai hau chailaiu kiukü noin; nung chailaiu leanau noin, apaüh chai nou saoloshiao tsükowe au noin, Apaou apa pemüh nung chailaiu leanau welutkü noin. 3Asamüh melemao hai chailaiu kamloshiau shio-e, lüko asamüh asam meshen khaiuniaüh laiutsün to tsaktso tsükamlo-ela.

4Apaou asam Goaüh asam hau kiutsün goumchi nai apaüh asam ouk kiu-e. Asam khaiunia tsaktso tsosilu tsünoi-e; 5asamüh apa ngio angkü naiuso ngo lonyi asam hau athoilut kiutsün alum mongkiukü kankei naito. 6Apaou nou apaüh thalokü taiutsünli asam ouk kiu-e. Asamüh mele piakü hau chai laiukiu-e, lüko asamüh to sauko lünou tsülaiu-e; asamüh mele piakü khaiuko nok shinge, lüko ti meleüh asam khaiuko nok tsüshinge.

7Apaou asam Goaüh asam hau kiutsün goumchi nai noksong ajantso ko, nungai meshen khaiunia Israel hoi ajantso pokü noi nai, nungai apa tü hachuau tsümongchiokü nankü lanoi. 8Nunglikoto, apaüh potsünli thatso apa hau laiukiuao mongchio- san kü lüthe. 9Chailaiu leantsün pon shimkü shitsün shioko apa hau tso tsak tsülaiukiukü lanoi. Nungtin tsümeikün mongyang tsaktso asam mongai lanapi. Ni apa hau laiukiuao chailaiu nanan naito, apaüh athako Apaou tü we-e, naiuso ni aphio ta thalo-e. 10Apa hau mongchiokü naiuso tsüchekkü lükiu, nungaito Apaou nou achhisiya alum ko ouk kiu-e. 11Nungai Israel hai asaita angjakü naiuso pokü nai ajantso to noi-e, nungtiphe ngo asam ngüso tü hachuau mongchiokü lünoi ta thoilutji.

Sua nouso Kankeiau Ayam:

(Aniasan 21:1-11)

12“Meshen Israel khaiunia tsak melo tsüdekünai menyiuhaiüh meshen aa asam hau sua tsakli janan nai, apaüh asam pon louk yathsüo- kütün phiai apa sokau noin. Tilai pon chinyat nou shiji, nungai asamüh apa leshiau noin. 13Tilai asamüh apa jashi-e, apa phakeng tsühongau noin. 14Apaou nou asam onnemok hoi, khülam naiuso theng ouk kiutsün ainou apa hau mongchiokü lükiu. 15Asam Ijip nai sua noiküla naiuso Apaou asam Goaüh asam soktham- kiu ta asamüh lüyangsan, nung shioko ngo lo asam hau nung athoilut nou kiuji.

16“Lüko asam suaüh asam leankü khuau tsüaiukü apaüh asam si asam tsammongko monglingkü noiau aiunai, 17nungai apa koukhan dongai nialokü khuküta apa noukhan nai lülap; nungphiai apa aakih thathonkü thaiutha asam sua noi-e. Asamüh menyiu sua nouso lüko nung khekkülu lükankei. 18Tilai asamüh asam sua leane yangelatkü lanoi, meiba tsümeiba, amai kiukü tuhtsün tsamki mai apaitso to apaüh asam pon luok yathsüokü shi-iu. Nungti lüchhi, naito Apaou asam Goaüh asam chhisiya alum ko ouk kiu-e.

Jang naiuso Onnemok Chongting Puntsün:

19“Asam jang naiuso onnemoküh chongting puntsün apong nouso apem Apaou asam Goa thaiutha mothikü ataiu; nung jang nouso tsaktso chhisiya thaiutha lakankei, naiuso nung onnemokthso tsaktso apun latippan. 20Pon pungkü ni naiuso atsammongsoüh nungso Apaou khako amkhamthang tsak nai heau noin. 21Lüko nung thainian nouso ko tsotsak tsaosilao- achione, aniopek, tsüdekünai alothe pokü noi naito, asamüh nungso loatkü Apaou asam Goa hau chaithio tsükiuao noin. 22Asamüh nungtin thainian tsamai heanau shio-e. Asam apem amkham yamko yanthsüokü tsüdekünai tsü- yanthsüokü noi lüko, asamüh chiu si jinchai hetsünli lühe. 23Lüko nung ashe eheshiu thaiutha lakankei, lüko nung khiamli gohai lükhepan.”

ASIO THSAMLAI

©2005 Bible Society of India

More Info | Version Index