Search form

Aniasan 13

Nioyamchong chet Losiotsün:

1Apaou nou Mosa tü ngiom, 2“Chongting apong chettsün ngü hau alosio, tititenai chongting Israel thsoso melothso yamchong ainou naiuso thainian ong ainou chettsün apong apem ngü nou noin.”

Phoplao Tsüthiokün Themtsai Sümai:

3Mosaüh khaiuniahoi nou tü ngiom, “Asam Ijip goumchi wankü khutsün ajekhaiu sua noitsün athang nung ajekhaiu ko lüyangsan. Nung ajekhaiu nai asam Apaou nou Apa oukong asong tsangkü niasan. Nung ajekhaiu ko phoplao thiotsün themtsai tsaktso tsüheau noin. 4Abib alei chongting nouko, lei yan ajekhaiu nouko nai asam Ijip goumchi wankü khuji. 5Apaou nou asam paosiposo tü nung Kanan hai, Hit hai, Amor hai, Hiv hai, naiuso Jebus hai goumchi asam hau kiuau ngiomong shingkü thalou-iu. Tilai Apaüh asam nung memei naiuso tsüomei goumchi nai niakü shi-e, asamüh pon pungkü chongting alei nouko nung sümai saohe au noin. 6Ajekhaiu chinyatnyi asamüh phoplao tsüthiokün themtsai heau noin, küta chinyatnyi nouko Apaou lomsankü sümai saohe au noin. 7Ajekhaiu chinyatnyi asamüh phoplao thiokü shantsün themtsai titso tsüheau noin, asam goumchi ko nung taoko nai phoplao thiotsün themtsai tsütaiu au noin. 8Tilai asamüh nung sümai yalou-e, asamüh Ijip goumchi ainou tsalou taoko asam thaiutha Apaou nou ti chhin nung apem asam thsoso hau tsangsheikü lüchite. 9Nung chhi kankeitsün nou asam pha nai naiuso khakheng nai tsotsak kelut taiutsünli ayangsaniau tsak noi-e, nungüh asam hau tsülaokü thanshi-iau naiuso Apaou Ngiokhem nouso yamiau yangsan- i-e, tiautenai Apaou nou asam apa oukong asong tsangkü Ijip ainou niasan. 10Nung sümai pon pungkü ataothat tsak kolu saoheau noin.”

Chongting Chettsün:

11Apaou nou asam naiuso asam paosiposo tü ngiomong shingekü taiutsünli, Kanan hai goumchi nai asam niathio-e. Tilai Apaüh nung asam hau kiu-e, 12asam melothso yamchong pungkü Apaou hau chaithio kiuau noin; tsam thainian lüko chongting apong puntsün pungkü Apaou ún haoson noin, 13lüko asamüh apa ainou chongting gado thso apong puntsün pungkü, onnemokthso tsak chaithio tsangkü laokü tuhloushiau noin. Asamüh nung gado nou laokü tuhlo shiau tsüaiu künai, apa sang lülotheankiu. Asamüh asam melothso yamchong pungkü laokü tuhshiau noin. 14Khaai ashiau tao tilai asam thsosoüh nung ayangshi chhi kankeitsün ko nung athat ti ta sangnai, ‘Sua athang ainou Apaou nou apa oukong asong tsangkü sam Ijip ainou niasan ta ngüso tü thashi-e. 15Tilai Ijip nokpao mong kongkü iula, sam khu-iau nankü noiküla. Apaou nou Ijip goumchi nai khaiunia naiuso thainian thsoyam- chong apong pungkü loat an. Nung shioko samüh thainian apongthso yamchong nou pungkü Apaou hau chaithio kiuji, lüko asam melothso yamchong nouso laokü tuhshi. 16Nung chhi kankeitsün nou sam pha nai tsüdekünai khakheng nai tso kelut taiuküta yangsanitsün tsakli noi-e; naiuso nungüh Apaou oukong asong tsangkü Apaüh sam Ijip ainou niasan ta yangsani-e.’”

Thengmia Kheam Naiuso In Kheam:

17Tilai Apaou nou Israel hai khu-i, Filistia sai ai sungkhutsün yam anyapting lüko nung tsangkü ngüso niakü tsükhu. Goa nou yang, “Tilai khaiuniahoi nou ngüso ehli au khutsün eppe, ngo khaiuniahoi nouso mong Ijip nai laokü khushiau phokleiau tsümongchio.” 18Nunglikoto, Apaüh Aseng Khiamnok dongai khutsün liutsa yankü yamlaiu nai nialokü khu. Israel thsoso ehli au thaiutha shitho khemlokü noiküla.

19Yosepüh Israel thsoso tü ngiomong shinge tsak thaloutaiu- tsünli, Mosaüh Yosep mea apako kankü khu. “Tilai Goa nou asam jüosane asamüh jü ou nung athang ainou asam ko kankü khuau noin” ta Yosepüh ngiotaiukü noiküla.

20Israel thsoso Sukot ainou khuküta liutsathun athang tsak nian nou Etham tü jontsün ko aalokü shaman. 21Anyi taoko Apaou nou ngüso hau yam hanau ngüso khako thengmia kheam tsak mongko khu-i, naiuso asoh taoko Apa ngüso khako awon kiuau thaiutha In Kheam tsak mongko khu-i kü noiküla, nung- shioko ngüso asoh si anyi tsakeiau shiokü noiküla. 22Thengmia kheam anyi taoko ngüso khako asaita noiküla, nungti In Kheam nou asoh taoko noiküla.

ASIO THSAMLAI

©2005 Bible Society of India

More Info | Version Index