Search form

Aniasan 14

Aseng Khiamnok Yanji:

1Nungai Apaou nou Mosa tü ngiom, 2“Israel thsoso tü phiai laokü shikü ta Mikdol si Aseng Khiamnok jetko, Baal-zefon shimkü Pihahirot khako ashaman ta lüngio. 3Tiautenai nokpao nou Israel hai goh nai tsakeikü ngüso liutsa lang nou khuojeiankü noin ta yange. 4Ngo apa mong kongikü shane, küta apaüh asam tü kome, naiuso nokpao si apa akonghoi khako jü ashiolotsün nou ngü tü alomsan kankü shi-e. Nungai Ijip haiüh Ngo Apaou, nou noin ta nge-e.” Nungai Israel thsosoüh ngüso tü ngiotsünli chhikü noiküla.

5Tilai Ijip nokpao au Israel thsoso jashianiu ta chite, apa naiuso apa khemko asonghoi nou ngüso mongai yangheshiküta ngiom, “Samüh ti chhin? Samüh Israel thsoso ja-aniu, küta sam sua ko sam mowaniu!” 6Nokpao nou apa ün ehli tsamkei nouso naiuso apa akonghoi khemlo. 7Apaüh meshen ehli tsamkei nouso ameiting 600 nungso asonghoi nou ngiokhem ko khemlokü tsalou. 8Apaou nou nokpao mong kongi, küta apaüh ashio epkü khutsün Israel thsoso tü komkü khu. 9Nungai Ijip haiüh ngüso phiai komkü khukü, nokpao ün mokthso akonghoiso, naiuso tsamkei nouso, Baal-zefon khako Pihahirot shimkü khiamnok sai nai ngüsoüh kamnoikü taiu.

10Tilai Israel thsosoüh nokpao naiuso apa akonghoi nousoüh ngüso thako komkü shitsün ep, ngüso hattatkü Apaou tü akipsanau wekü jon. 11Ngüsoüh Mosa tü ngiom, “Ijip nai etam tsünoilü süne? Ni sam nung liutsa nai eaniau nialokü shin süne? Athaplu, sam Ijip ainou nialokü shitsün tsangkü ni ti chhin! 12Sam motsaloukün khako nung thawao-e ta samüh ni tü tsüngio süne? Sam Ijip hai sua thekü lu noiau sam chija awanan ta samüh ni tü ngiom. Sam nung liutsa nai eantsün likoto Ijip nai sua thekü noinai chenela.”

13Mosaüh thalakü ngiom, “Asam lahat! Tsülemlemkü tsakü anoi, naiuso asamüh lonyi Apaou nou asam kipsanau ti chhi-e nung eppe, asamüh nungso Ijip hai tilaitso müjam tsüepshi-e. 14Apaou nou asam thaiutha ko ehli likiu-e, naiuso asam thaiutha nungko chhiha au ti pokü tsünoi-e.”

15Apaou nou Mosa tü ngiom, “Asamüh tiauta akipsan thaiutha weji? Khaiunia nouso tü kha ai lükhu ta lüngio. 16Apailai loksanküta khiamnok chiai apha lülolu, khiam nou janthat e-küta Israel hai gohwai nai khiamnok yankü tsakeiau shio-e. 17Ngo Ijip hai Israel khaiuniahoi phiai khuau mong kongkü shane, küta ngo jü ashioloutsün tsangkü nokpao khako, apa akonghoi khako, apa tsamkei khako, naiuso apa aniakeihoi khako alomsan nou lesane. 18Tilai ngo ngüso shiolo-e, Ijip haiüh Ngo Apaou nou ta nge-e.”

19Goa ün hongthon sau Israel hai akonghoi khako khukü noiküla, soikü shiküta oulokongau phiai tsakei. Thengmia kheam nou 20Ijip hai naiuso Israel hai jetko moshingoikün lektso soikü shin. Thengmia kheam nou Ijip hai thaiutha anyakhem shankiu, lüko Israel khaiuniahoi au to awon kiu, nungtiphe Ijip hai akonghoi nouso tsaküh tsak dongai shimkü shiau tsüshiokü noiküla.

21Mosaüh khiamnok khütha nai apa pha loksan, küta Apaou nou shingngan ahsheih akongting tsak nou asoh chikü sheikü khiamnok nou lailokü khuwani, küta khiamnok nou gohwai tsak iula-i. Khiamnok nou janthat, 22küta Israel thsoso uai si tsatai khiam nou dio ai li noikü goh wai chiai tsakeikü yankü khu. 23Ijip haiüh ngüso phiai komkü ngüso mokthso apem, ehli tsamkei nouso apem, aniakeitsünso apem hakü khiamnok nai nappan. 24Ah shiochan Apaou nou In Kheam naiuso Thengmia Kheam ainou Ijip akonghoi tü thapi küta ngüso alekkat tsak iula-i. 25Apaüh ngüso ehli tsamkei hok nouso yangjei-i, nungtiphe ngüso thatü chekkü tsakei. Ijip haiüh ngiom, “Apaou, nou Israel thsoso thaiutha sam thako likiuji!”

26Apaou nou Mosa tü ngiom, “Apha khiamnok khütha nai aloksan, naiuso khiam nou Ijip hai naiuso ngüso ehli tsamkei naiuso aniakeitsünso chiai laokü shi-e.” 27Nungtiphe Mosaüh apa pha khiamnok khütha nai loksan, naiuso ahom to khiam nou aya naili lu iulakü noiküla. Ijip haiüh khiam ainou aasanau kowe, lüko Apaou nou ngüso khiamnok nai awem ko nai lakü khuwan. 28Khiam nou laokü shiküta ehli tsamkei nouso, aniakei nouso, naiuso khiamnok nai Israel thsoso tü thaiuhkü komkü shitsün Ijip akonghoi nouso tsaktso tsüpoisankü limlowan. 29Lüko Israel haito khiamnok nou yankü gohwai chiai uai si tsatai khiam nou dio ai ao thekü tsakeikü khu.

30Nung ajekhaiu nai Apaou nou Israel khaiuniaso Ijip hai ainou kipsan, naiuso Israel haiüh ngüso haiukok nouso ai eankü ep. 31Tilai Israel haiüh Apaou oukong asong nou Ijip hai shiolotsün ep, ngüso Apaou lun hatkü tsakü ta Apaou naiuso apa yathsüotsün Mosa da monglam.

ASIO THSAMLAI

©2005 Bible Society of India

More Info | Version Index