Search form

Aniasan 17

Lung ainou Khiam Shiuhshi

(Haove 20:1-13)

1Israel thsoso hoikam apem Sin liutsa ainou tsaloukü Apaou nou ngiokhem kiutsünli athang tsak ainou tsak ta noian noian kü khu. Ngüso Refedim nai shaman, lüko nungko ashiuau khiam tsünoiküla. 2Ngüsoüh Mosa tü namnamkü ngiom, “Sam hau ashiuau khiam akiu.” Mosaüh thalakü ngiom, “Asam tiauta namnamji? Tiauta Apaou liluji?”

3Lüko khaiuniahoi nou thatü le phe Mosa tü tsülaokü namnam. Ngüsoüh ngiom, “Ale nou sam si sam thsoso naiuso sam tsam thainianso ean-iau Ijip goumchi ainou sam tiauta niakü shiji?” 4Mosaüh Apaou nou tü kojakü misaokü ngiom, “Nung khaiunia nouso tü ngo ti chhi-e? Ngüso ngü tü lung nou yakkau khemlokü noin.” 5Apaou nou Mosa tü ngiom, “Ni ko Israelhai ahei nouso ajantso nialokü hoi nouso kha ai lükhu. 6Ngo Sinai King ai lung tsak chiai akhako tsa-e, nungko ni lung nou tü lüshiuh, nungai nung lung ainou khiam khaiuniahoi nou shiuau chetsane.” Mosaüh nung Israel aheihoi khako chhikü noiküla. 7Nung athang tü Masa naiuso Meriba ta jon, tiautenai Israel thsosoüh, “Apaou samko ha süne tsüha?” ta namnamkü Apa lilukü ngiom.

Amalek haiko Ehli

8Nung taoko Amalek hai shikü Israel haiko Refedim nai ehli kü noiküla. 9Mosaüh Yihusua tü ngiom, “Lühom khukü Amalek haiko ehli au khaiunia ajantso achosan. Ngü tü Goa nou lükan ta ngiotsün Pailai semkü ngo kingkhaiu nai tsa-e.” 10Nungai Mosa si Aron naiuso Hur so kingkhaiu nai sungkü noinai Yihusuaüh apa tü Mosaüh thoiluttsünli khukü Amalek haiko ehli. 11Mosa pha loksankü taiutsün lektso Israel thsosoüh shiolo, lüko apa pha nyapkü saowan nai Amalek haiüh shioloau tsalo. 12Tilai Mosa pha tankü iula, Aron naiuso Hur neüh Mosa thaiutha lung tsak kankü shikü nung chiai noi-i, nungti ngüso apa dongko tsakü aje monapkün lektso apa pha yamlukü loksankü taiu. 13Nungli Yihusuaüh Amalek hai shilepkü shiolowan.

14Nungai Apaou nou Mosa tü ngiom, “Nung ashiolotsün yangshiau thaiutha ngiolat thsam tsak ko satkü lütaiu, Ngo Amalek hai moisemkü lomowane ta Yihusua hau lüchite.” 15Mosaüh amthang tsak shan, küta nungtü “Apaou jü Nisan” ta jon. 16Apaüh ngiom, “Apaou Nisan tsokkü aloksan! Apaou nou Amalek hai ko vetao si vetao tsülaokü ehli li-e!”

ASIO THSAMLAI

©2005 Bible Society of India

More Info | Version Index