Search form

Aniasan 2

Mosa Chetji:

1Nung taoko nai Levi kau ainou khaiunia tsaküh meshen mele ko nou menyiu tsak tsamsigoh yang, 2nungai nung menyiu nou apa hau melothso tsak chetkiu. Tilai menyiu nou nung methso amei tsak ta epsan, apaüh methso nou alei süme tsangkü wan. 3Lüko tilai apaüh nung methso loto atsangshiau tsüshioshi, apaüh haiumongai noitsün kutpai nouso loküta nung tanlep nou lepjeikü khiam tsünapiau kim tsak shan. Menyiu nou methso nungko lokthio küta sangpun laiukü samtsün haiukuk nai taiukiu. 4Methso nou nyai nung methso nouko intso jettekü nung methso tü ti thawao-eko ta thapkü tsa-i.

5Nokpao menyiuthso haiu nai khiampengau sao, nungai apa tsamkihso haiusai nai tsakeikü noiküla. Alekta apaüh sang ongai kim taiutsün epkü apa sua menyiuthso tsamki nouso tü nung kim loau hong. 6Nokpao menyiuthso nou nung soktham nai nungko melothso tsak napkü ep. Nung methso nou shapkü noiküla, naiuso menyiuthso nou apa thaiutha mong tsümeikü yangelat; küta apaüh ngiom, “Nung Ibri hai methso ongko tsak noin.”

7Nungai methso nou nyaiüh meso noutü sangkü ngiom, “Ngo khukü apa paotsangau Ibri nyiuhai tsak ajonkiu tümo?”

8Meso nou thalakü ngiom, “Tsüojinyangkü achhikiu.” Nungtiphe meso nou khukü tü methso nou nyiuting nialokü shin. 9Nokpao menyiuthso nou nyiuhai nou tü ngiom, “Nung methso nialo küta jü thaiutha apaotsangsankiu, ngo nihau amai kiu-e.” Nungti nyiuhai nou methso nou nialokü paotsangsan. 10Atao intso noiküta tilai methso nou shekü iula, nyiuhai nou apa nokpao menyiuthso dongai nialokü khu, tititenai nung menyiuthso nou methso nou meshen thso ta theau thashesanitsün noiküla. Nung menyiuthso nou ngiom, “Ngo apa khiam ainou tensan, nungtiphe apa nian Mosa ta niane.”

Mosa Midian ai Khulükhun:

11Tilai Mosa pim nai shekü iula, apa meshen Ibri hai khaiuniaso tü sailuao khu, nungko apaüh meshen khaiuniaso hau chhisiya kosikokü chhi-itsün epsan. Apaüh Ijip hai tsaküh meshen khaiunia Ibri hai loattsün lüko ep. 12Mosaüh apemai lemkü thapnai khaiunia sauüh apa tsüep ta ngeküta, apaüh Ijip hai nou loat küta mia nou singtso ongnai khankü wan. 13Nungthan nyi apa khushinai Ibri hai ongkolu khaiunia nime li-etsün ep. Nungai apaüh tsak tü sau aphio noin, “Ni meshen Ibri hailu tiauta tsanatji ta sang?”

14Nungai nung khaiunia nou thalakü ngiom, “Sam mi khemau naiuso sam khako nokpao theau ni sauüh shankiu? Ijip hai nou loattsün li ni ngü lüko loatte ta süne?” Nungai Mosa hatkü meshen chija yanghe, “Ngo ti chhin, nung khaiuniahoi nou epsananiu.” 15-16Tilai nokpao nou thawaokü shitsün lula, apaüh Mosa loattau kowe, lüko Mosa khulü- khunkü Midian hai goumchi ai kih.

Nyitso Mosa temkhao tsak dongko mokkü noinai, Midian hai meson Jethro menyiuthso chinyat nou ngüso po ün onnemok naiuso won nouso thaiutha khiam khaiushikü ngüso khiam ai nouso meankü khaiulo. 17Lüko onnemok jimhoi ajantsoüh Jethro menyiuthsoso koman, nungai Mosa ngüso kipsanau khu, küta ngüso thainianhoi hau khiam khaiushen. 18Ngüso po dongai tilai ngüso laokü shin, ngüso poüh sangkü ngiom, “Asam lonyito tiauta nungti piamkü laokü shiji?”

19Ngüsoüh thalakü ngiom, “Onnemok jimhoi ainou Ijip hai khaiunia tsaküh sam kipsan, naiuso apaüh sam thaiutha khiam khaiukiu loüh sam thainian hau lüko khaiushen.”

20Jethroüh apa menyiuthsoso tü sangkü ngiom, “Apa tiai noin?” “Asamüh nung khaiunia nungai tiauta lean? Khukü apa samko hakü heshiuao lüjon.”

21Mosa nungai kih au mongchiokü iula, küta Jethroüh apa menyiuthso Zipora tsamsigoh yangkiu, 22naiuso apa hau melothso tsak chetkiu. Mosaüh ngiom, “Ngo nung goumchi ko gohmao khaiunia tsak noin, nungtiphe apa nian Gershom ta niankiu.”

23Pon piakü noikütün phiai Ijip hai nokpao ean, lüko Israel thsoso to losaokü ngüso sua aküo nai ngetkü naiuso ahachu thaiutha wewekü noiküla. Ngüsoüh wetsün nou Goa sungsao. 24Apaüh ngüso ngettsün lula naiuso Apaüh Abraham ko, Isak ko, naiuso Yakob ko Athalu-e noitsün yangsan. 25Apaüh Israel thsoso sua aküo epküta ngüso thaiutha yangkiukü noiküla.

ASIO THSAMLAI

©2005 Bible Society of India

More Info | Version Index