Search form

Aniasan 24

Athalu-e Ngiokhem Thanglut

1Apaou nou Mosa tü ngiom, “Ni, naiuso Aron, Nadab, Abihu, naiuso Israel ahei aochinyat nouso, jüdongai king nai asungh, naiuso tilai asam shimkü shiao intso jetekü noi-e, kauthiokü a amkham. 2Amaohai sau tsühakü apimsalu jüdongai shimkü shiao noin. Khaiuniahoi nou kinghok nai lüko tsüsungao noin.”

3Mosa shiküta Apaou athoilut- tsünso naiuso ngiokhem nouso apem khaiuniahoi hau chite, naiuso khaiuniahoi nou aikü thalakü ngiom, “Apaou nou chitetsün ngio chikü samüh chhiko.” 4Mosaüh Apaou athoiluttsünso apem satlo. Nungthan nyi ahom beta apaüh kinghok nai amthang tsak lahshan, küta Israel kau chekü nime nouso pungkü thaiutha lung tsak tsak kihkü taiu. 5Naiuso apaüh Israel oum khaiunia nouso Apaou hau ajahtsün chaithio naiuso jangtsopong loatkü aalo chaithio kiuao hong. 6Mosaüh thainian she haoson tsak loküta chio nouko thio, naiuso apoi haoson tsak nou amthang nou tü satlut. 7Küta apaüh athalu-etsün thsam tisübao nouko Apaou athoiluttsünso satkü noiküla nung loküta, khaiunia nousoüh lulakü sangh songkü wekü han. Ngüsoüh ngiom,

“Samüh Apaou tü angio ange naiuso apaüh thoilut taiutsün alum chhi-e.”

8Küta Mosaüh chio nai thio taiutsün she nou loküta khaiunia hoi tü satlut. Apaüh ngiom, “Subao Apaou nou asam ko apa athoiluttsünso kiukü noiküla, nung taoko apa athalu-etsün nai nung she nou thanglut.”

9Mosa, Aron, Nadab, Abihu, naiuso Israel hai aheihoi aochinyat nouso king nai sungh, 10nungai ngüsoüh Israel hai Goa ep. Apa hok khem nai Safir lung asangnya maou lengli, tülinglingkü noiküla. 11Nung Israel khaiunia aheihoi nouso tü Goa nou tsütawai, ngüsoüh Goa ep, naiuso ngüso kamkü heshiukü noiküla.

Mosa Sinai King nai

12Apaou nou Mosa tü ngiom, “King nai Jüdongai asungh, naiuso ni nungai noinai, khaiuniahoi hau ayam hanao thaiutha Ngo satkü taiutsün ngiokhem nouso chikü sunkü lungkhio nime ni hau kiu-e.” 13Mosa naiuso apa hachutsün Yihusua khemlo, küta Mosa asio King khaiu nai sung au tsalo. 14Mosaüh aheihoi nouso tü ngiom, “Sam müjam asam dongai moshikün lektso nungko taiukü anoi. Aron naiuso Hur ne asamko noin, asam jetko tsüjeiaikü angem sungnai ngüne dongai khuau shio-e.”

15Mosa Sinai King ai sung- khuwan, küta King nou thengmia tsaküh khojeian. 16-17King nai APAOU noitsün hankü asalo awon nou saom. Israel thsoso hau to awon nou kingkhaiu nai In nyai tsak khekkü epi. Nungai thengmia nou king ajekhaiu louknyi loijei, naiuso chinyatnyi nouko APAOU nou Mosa tü thengmia ainou jon. 18Nungai Mosa thengmia ong ai sungkhu, küta apa nungai ajekhaiu aopülenyi naiuso aopülesoh ta noiküla.

ASIO THSAMLAI

©2005 Bible Society of India

More Info | Version Index