Search form

Aniasan 26

Apaou noitsün Nejenkhio

(Aniasan 36:8-38)

1APAO Nejenkhio among nou ne ashethop oukü che nou asangnya leng, paipun ashethop naiuso aleng emok nou lüshan. Nung tü akoi nime pokü noitsün thainian sotsom nou lüchiolut. 2Ne pungkü atheng atham wewekü lüthe, alaiu nai phasab eknimekü petjei naiuso atham nai phasab nime. 3Nung ne anelang pungo nouso tsak hao thekü lüchioshi, naiuso amao pungo nou tü lüko wekü lüchio. 4Achioshi pungkü nai achiai ne sangnyathun nai kiangkü lüshan. 5Ayating akiang lükhuntsün tü aopungo ngüso ano nousoko aphi nepat nouso lüjeiai-e. 6Ahoi nime nou tsak hao iulakü kamshiao chaiou lakkkeng nou chonsiang aopungo lüshan.

7“Nejenkhio nou sojeiao thaiutha ne chekü tsak wonkoi nou shantsün tsak lüshan. 8Nung ne nouso chikü wekü lüshan, atheng nai phasab aosam naiuso atham nai phasab püle. 9Nungso apem pungo nou tsak hao thekü lüchioshi, naiuso amao louk nouso tsak hao thekü lüchioshi. Louk nouso nejenkhio khütha nai müjam lükhapshi. 10Athon achioshi tsak athun nai ewoi aopungo kiangkü lüchiolut, naiuso amao ewoi aopungo kiangkü chioluttsün amao athun tsak nai lüchiolut. 11Akapjei tsak theao taoson lung nou chonsiang aopungo shankü nime nou jipe ao ewoi chiotsün tü lüchiolut. 12Ayan apoisan nou nejenkhio phiai lüphan. 13Naiuso nejenkhio sojeitsün ne alaiu nai poisan nou etsai phasab tsak naiuso amao etsakai phasab tsak ta loijeiao thaiutha amkham nejenkhio ano tsak ainou khütha nai ne nou phankü taiu-ela.

14“Kengchi nou kappok au onnemok pun thengsengkü tsak naiuso amao tsak nou nyikhun amei tsak ta lüshan.

15“Amkham Nejenkhio langthsakü noiao thaiutha akacia pai nou lüshan. 16Athat pungkü atheng nai phasab che naiuso atham nai phasab tsak küta apaitso athe. 17Athat nou wekü sungiao thaiutha kheam nime me wewekü jipe ao noin. Athat chikü nung kheam jipetsünli theao noin. 18Akei tsak ai hao thaiutha athat eknime lüshan, 19naiuso kheam eknime khemai ni taoson lung aopüle akhowe ao lüshan akhei kheam nou athat pungkü nime me khokü nung ajipe nou lomongao noin. 20Amkham nejenkhio akei tsak ai hao athat eknime lüshan; 21taoson lung kheam aopüle, athat pungkü nime me athio. 22Ajenap nai Amkham Nejenkhio phiai hao thaiutha, athat louk lüshan, 23naiuso athat nime nou aniokun nouso ai athio. 24Nung aniokun athat nouso athan nai jipe küta asungthun saokü ajipe. Aniokun athat nime nouso nung yamko chhiao noin. 25Nungtiphe taoson lung athan nai thekü nou athat petjei noi-e, nungso athat tsak pungkü nai nime thio-e.

26“Akacia pai chekü pungo nou jei-ekü lüshan, Nejenkhio akei tsak ai athat thaiutha pungo, 27naiuso tsakai thaiutha pungo, naiuso ajenapki tsak nouko phiai pungo lüshan. 28Awem ko jei-etsün nung yam wemko athat nouko awewe nou tsak ainou tsak ta Nejenkhio lüshan. 29Athat nou chaiou lakkeng nou lülopok naiuso jei-ekü noitsün ko chaiou khiapthso nou lülolut nung da thalo-e, nungso lüko chaiou lakkeng nou lopokkü ashan. 30Ngo ni tü King nai noi taoko hantsünli Nejenkhio nou ayam nai lüyachu.

31“Nekhongjeitsün ewoi amei asangnya leng nou oukü, shethopkü, naiuso emok ne aseng leng nou lakü lüshan. Akoi nime potsün thainian sotsom nou nungtü lüchiolut. 32Küta tangkason püle taiukü, chonsiang nou kelutkü, akacia pai chaiou nou nyingjeiküta kheam püle chiai nung shiokü lütaiu. 33Nejenkhio tsamkhaio nai chonsiang ing nou khemko nekhongtsün lütaiu, naiuso nung nekhongjeitsün phiko lungkhio nime tü sat taiutsün Athathalu-e Ngiokhem Paidan nou lütaiu. Nekhongjeitsün nou Asio thang nou thatü Asioting thang ainou moda pungekü taiu-e. 34Athalu-e Ngiokhem Paidan nou da akap nou lülolut. 35Asioting thang king chiai puo nou Nejenkhio ajepekki nou thako lütaiu, naiuso tson taiutsün nou ajenapki nai sheikü lütaiu.

36Apaou Nejenkhio nai naptsün ko nekhongjeitsün ashethop ne asangnya leng, matchaikü naiuso emok ewoi aseng nou alengyam yam- lutkü lüshan. 37Nung nekhong- jeitsün thaiutha chaiou lakkeng chonsiang kelutkü chaiou lakkeng nou chukü akacia pai pungo lüshan, küta nung kheam nouso thaiutha anoithang nou taoson lung pungo nou lüshan.”

ASIO THSAMLAI

©2005 Bible Society of India

More Info | Version Index