Search form

Aniasan 3

Goa nou Mosa Jonji:

1Nyitso ajekhaiu ko Mosaüh apa kaio Midian hai nou Meson Jethro onnemok naiuso won nouso jimkü noitao apaüh onnemok hoi nialokü singtso goh tsak yankü asio King Sinai nai shin. 2Nungai Apaou hongthon tsak Paikhemso wem tsakko in nyai tsangkü apa dongai sungh. Mosaüh pai nou tü in nyaikü sungtsün ep, lüko nung paikia tsüchethe. 3Apaüh nung athanga tsak ta yanghe. Tiauta nung paikia tsüchethe, ngo shimkü shiküta nung tü thapluko.

4Tilai Apaou nou Mosa shimkü shitsün ep, Apaüh Mosa tü pai-eng awem ainou sang tsak nou jonkü ngiom, “Mosa, Mosa!”

Apaüh thalakü ngiom, “Hau, ngo nungai noin.”

5Goa nou ngiom, “Shimkü lashi. Ahokkhut lüngiowan, tiautenai ni tsakü noitsün goh asio noin. 6Ngo apaosiposo Abraham, Isak, naiuso Yakob Goa noin.” Nungtiphe Mosaüh apa kha khojei, tiautenai apa Goa tü thapao hatkü noiküla.

7Nungai Apaou nou ngiom, “Ngo jü khaiuniaso Ijip nai titi khosak kü kankeiji nung epiu, ngüsoüh aniasanau wetsün ngo lula-iu. Ngo ngüso omhetsün apem ngela-iu, 8nungtiphe ngüso Ijip ainou kipsanau, naiuso nung goumchi ainou niasan küta atsüomei uomei tsak, jangnyao naiuso liukhiam tsang tsangkü noitsün goumchi nai nialokü khuau thaiutha ngo saom: Kanan hai, Het hai, Amor hai, Periz hai, Hiv hai, naiuso Jebus hai goumchi ai ngüso nialokü khu-e. 9Ngo jü khaiuniasoüh wetsün atsüoting lula-iu, naiuso Ijip haiüh ngüso titi angja omhe kiuji, nung ngo epiu. 10Ngo ni lo Ijip nokpao dongai jü khaiuniaso apa goumchi ainou niasanau hongji.”

11Lüko Mosaüh Goa tü ngiom, “Ngo sau, titi ngo nokpao dongai khuküta Ijip ainou Israel thsoso niasane?”

12Goa nou thalakü ngiom, “Ngo niko ha-e, naiuso tilai ni jü khaiuniaso Ijip ainou nialokü shi-e, asamüh ngü tü nung king nouko amkhame. Nungai ngo ni hong ta nung mitha au noi-e.”

13Lüko Mosaüh thalakü ngiom, “Tilai ngo Israel thsoso dongai khukü ngüso tü, asam paosiposo Goaüh ngo asam dongai hong ta ngio-e, Apa nian sau ta ngüsoüh ngü tü sangnai, ngo ngüso hau ti chiteau noi-e?”

14Goa nou ngiom, “Ngo nung Ngo noin, ni nung ngüso hau chiteau noin. ‘Ngo nung Ngo ta jontsün tsak nou ngü asam dongai hong’ 15ta Israel thsoso hau lüchite, Ngo Apaou, asam paosiposo Abraham, Isak, naiuso Yakob Goa nou ni ngüso dongai hong. Nung jünian athontsüyangkü noin, nungti ashiau noitsün vetao si vetao nousoüh ngü tü jone. 16Khukü Israel thsoso aheihoi alokam, küta ngüso hau Ngo Apaou, asam paosiposo Abraham, Isak, naiuso Yakob Goa nou atsangshei sungh ta lüchite. Ngüso hau ngo asam dongai shin naiuso Ijip haiüh asam tü ti chhiji nung epiu ta lüchite. 17Ngo thatsaniu, Ngo ngüso Ijip nai khosakkü angjatsün ainou Kanan hai, Het hai, Amor hai, Periz hai, Hiv hai, naiuso Jebus hai goumchi tiai jangnyao naiuso liukhiam tsangkü noin nung goumchi nai niakü khu-e.

18“Jü khaiuniasoüh ni ti ngioji nung tü ang-e. Nungtiphe ni Israel aheihoi hakü Ijip nokpao dongai titilünou khukü apa tü nung ngioau noin. Ibri hai Goa Apaou pim sam tü tsangsheikü sungh. Lo sam singtso goh nai ajekhaiu samnyi khuküta Apaou sam Goa hau aa chaithio amkham kiuau yam asopkiu.” 19Ngo ngeji, apa tü liukü choikü tsüdekünaito, Ijip nokpao nou asam tsükhu-i-e. 20Lüko nungai ngo jü oukong kankeikü ahat au chhisiya tsangkü Ijip nai angja kiu-e. Nungphiai apaüh asam khu-i-e.

21Tilai jü khaiuniaso tsalou-e, ngüso phakeng tsükhuau thaiutha Ijip haiüh asam hau asuhat kiuao ngo chhi-e. 22Israel thsoso nyiuhai pungkü apa phao Ijip nyiuhai dongai khukü naiuso Ijip hai menyiu saulünou meshen tsamko kihakü noitsün tü neshe naiuso chaiou lakkeng naiuso tangkason saolou-e. Israel thsoso melothso naiuso menyiuthso nouso hau nung the-i-e, nungti Ijip hai jengtsaiu chaiou kankü khuwane.

ASIO THSAMLAI

©2005 Bible Society of India

More Info | Version Index