Search form

Aniasan 30

Angan nyamtsün Jah au thaiutha Amthang

(Aniasan 37:25-28)

1“Angan nyamtsün jah au thaiutha akacia pai nou amthang tsak lüshan. 2Nung atheng atham wekülu theao noin: atheng nai phasab tsak, atham nai phasab tsak, naiuso atsok nai phasab nime. Nung aniokun püle nai athat nou nungko wekülu noiao noin. 3Ano püle apem nai nung asungthun nou lükapjei, naiuso nung athat nou chaiou lakkeng noulu naiuso nung lemkü chaiou lakkeng nou lükomjei. 4Api-keiao thaiutha chaiou lakkeng nou shankü ang nouso lülolut, naiuso nung paithun api ao shitaiu nai, hekü kankü khuao thaiutha ano nimethun akhei nou lüjippe. 5Nung paithun api ao shitaiutsün nou akacia pai nou lüshan, küta nung chaiou lakkeng nou lülojei. 6Nung amthang Athalu-e Paidan khako nekong taiutsün chiai lütaiu. Nung athang nouko Ngo niko eppe ao noin. 7Tilai Aron tson nouso khem taiuao ahom pungkü shi-e, apaüh nung chiai angan nyamtsün jah ao noin. 8Tilai apaüh asham tson nouso sone, apaüh aya chhi lilu chhisiao noin. Ashiao atao apem nouko nung ajahtsün chaithio ashiosung tsünoikü tsülaokü khuau noin. 9Nung amthang nouko asoyam angan nyamtsün, thainian chaithio, tsüdekünai tsole lüko ti lathio, naiuso nungko theng chaithio titso lathsalut. 10Pon tsak ko jam Aronüh angei thaiutha thainian chaithio she nou amthang athat ano püle nou tü thsalutkü alosiotsün amkham shanao noin. Ashiao noi nou atao apem thaiutha nung pon pungkü chhiao noin. Nung Amthang Ngo, Apaou nou tü thumkü losiokü taiuao noin.”

Apaou noitsün Nejenkhio thaiutha Liukim

11Apaou nou Mosa tü ngiom, 12“Tilai ni Israel khaiuniahoi tü vetao khaiunia welu-e, khaiunia pungkü nou apa aa thaiutha Ngü hao amai kiuao noin, nungtiphe nung vetao khaiunia welu taoko apa tü aküothe ti tsüshiao thaiutha noi-e. 13Apin tsoithat tsangkü nai, khaiunia pungkü sauhai nung vetao khaiunia we nai ha-e, nungsoüh chai athat nou thangoikü kiuao noin. Khaiunia pungkü nou nung Ngü hau chaithio tsakli kiuao noin. 14Khaiunia pungkü nung vetao khaiunia we nai hatsünso nung achet pon eknime tsüdekünai nung khengai nousoüh ngü hao nung chai nou kiuao noin. 15Tilai ngüsoüh meshen aa thaiutha ko chai nou kiu-e, memei khaiunia nou piakü tsükiu-e, tsüdekünai angja khaiuniahoi nou thsaokü lüko tsükiu-e. 16Nung chai Israel khaiuniahoi ainou khailoküta Apaou Nejenkhio chhisiya thaiutha mothikü thumkü lüwan. Nung liukim ngüso aa thaiutha amai noi-e, naiuso ngo ngüso soloau yangsane.”

Taosonchio Kom:

17Apaou nou Mosa tü ngiom, 18“Taoson chio asong tsak taoson nou yakü lüshan. Nung Nejenkhio naiuso amthang jetko lütaiu, küta nung mongko khiam lüthio. 19Nejenkhio nai ngüso mokhukün khako tsüdekünai eheshiu chaithio thioau amthang nai moshikün khako, 20Aron naiuso apa thsosoüh nung khiam ngüso pha naiuso hok tsawanao kankeikü noiküla. Nungaito ngüso tsüloati-e. 21Ngüso tsü eanao ngüsoüh pha naiuso hok tsawanao noin. Nung ngüso si ngüso thsaosithsosoüh asaita kankeiao thaiutha ngiokhem tsak noin.”

Atsomkiutsün Khaiutsom

22Apaou nou Mosa tü ngiom, 23“Laoshang ameiting nou angan- nyamtsün khiam tsoi louk, angan nyam anyaothing nyamtsün painek tsoi süme, 24naiuso apin tsoithat ko thatkü akacia tsoi louk, olip khiam tsoi püle lühoilut, 25küta asio atsom- kiutsün khaiutsom shankü, angan nyamtsünli lülaowe. 26Ngo noitsün Nejenkhio naiuso Athalu-e Paidan tsomkiuao nung lükankei, 27Puo naiuso nungtü suntsün jengtsaiu apem, tson taiutsün naiuso nungtü süntsün jengtsaiu nouso angannyam jahtsün amthang. 28Ajahtsün chaithio thaiutha amthang, nungtü süntsün jengtsaiu apem hakü, naiuso taoson chio noitaiutsün hakü atsom- kiuao lükankei. 29Nung jengtsaiu nouso nungli lülosio, naiuso ngüso thumkü siokü noi-e, naiuso ajantsoüh tsüdekünai tso tsaküh nungso tü thantan nai nung ün asio oukong tsangkü ngüso tawai-e. 30Küta Aron naiuso apa thsoso tsomkiukü, jü chhi nai mesonhoili yathsüoao ngüso asio chhisiya nai lütaiu. 31Nung asio atsomkiutsün khaiutsom ashiao noitsün atao apem thaiutha Ngü yathsüotsün chhi nai kankeiao noin, ta Israel khaiunia tü lüngio. 32Nungto khaiunia athatha nou tü tsütsome, naiuso asamüh nung kankeitsün khekkü amao laowekü ti tsüshanao noin. Nung asio noin, naiuso asamüh lüko nung siokü lükankei. 33Sauhaiüh nung khekkü shankü tsüdekünai kankikü meson tsüde künso tü kankei-e, loto nung jü khaiunia ongko mepem tsak ta tsüwesan ha-e.”

Angannyamtsün

34Apaou nou Mosa tü ngiom, “Nungso anyaothing laoshang ainou pungkü haoson wekü alo- stakte, onika galbanum naiuso angan nyamtsün lu alou. 35Nungso ajah ao lüshan, anyamtsün laowekü lüthe, nung sanglingkü naiuso siokü taiuao jem nou lühoilut. 36Nung haoson ajantso wonneli meikü nelangkü lülone, küta Apaou Nejenkhio mongai kankü anap, küta Athalu-e Paidan khako nung lüsatpeng. Nung ajahtsün thumkü asio ta lüyang. 37Athaiutha ajahtsün shanao nung ayam wekü nou titso lakankei, nung Ngü hao losiokü taiutsünli asio jengtsaiu tsakli lükankei. 38Ajan- tsoüh nung khekkü nai khaiutsom shankü kankei nai, apa to jü khaiuniahoi ongko mepem tsak ta tsüwesan ha-e.”

ASIO THSAMLAI

©2005 Bible Society of India

More Info | Version Index