Search form

Aniasan 32

Chaiou Lakkeng Jangtsopong thso

(Ngiokhem 9:6-29)

1Tilai khaiuniahoi nou Mosa King ainou tsüsaokü atao laiukü noian ta ngesan, ngüso Aron lemkü kamshi küta apa tü ngiom, “Sauüh sam Ijip ainou nialokü shin, nung khaiunia Mosa, apa tü ti thawaokü noin samüh tsünge, nungtiphe sam niakeiao goa tsak ashan.”

2Aronüh ngüso tü ngiom, “Asam tsammongnyiuso, thsoso, naiuso menyiuthso soüh daotsün chaiou lakkeng nuodao losan küta jü dongai kankü ashi.” 3Nungtiphe khaiunia apemüh ngüso chaiou nuodao nouso Aron dongai kankü shin. 4Apaüh nuodao nouso losan küta jek, asaitsün nai chaiou lakkeng nouso thio, küta chaiou lakkeng jangtso- pongthso tsak shansan.

Khaiuniahoi nou ngiom, “Israel- hai, sam Ijip ainou niasantsün nung sam goa noin!”

5Nai Aronüh chaiou lakkeng jangtsopong khako amthang tsak shankü ta welutkü ngiom, “Lühom Apaou lomsanao sümai tsak noi-e.” 6Nungthan nyap beta thainian ajantso ajahtsün chaithio thio, naiuso aalo chaithio kankü shin. Khaiuniahoi nou hekü naiuso shiukü sümai kam, naiuso nung shiu shiukü alum heao naiuso ajisiwop ao iula.

7Apaou nou Mosa tü ngiom, “Liukü laokü lüsao, tiautenai akhaiuniaso, ni sauhai Ijip ainou niasan, ngüsoüh angei sunhe- iu naiuso Ngo wananiu. 8Ngüso hoilutao ngo thoiluttsün yam ngüsoüh wankü khuwaniu, ngüsoüh chaiou lakkeng nou jangtsopong thso tsak saisan küta nungtü amkhamji naiuso nung tü chaithio nouso thioji. Ngüsoüh Ijip ainou niasantsün ngüso goa nung noin ta ngioji. 9Nung khaiuniahoi mong titi kongkü noin nung Ngo ngeji. 10Ngo ngüso tü mongmatji, ngo ngüso lomowane, loto ngü loyangao lakowe. Nai Ngo ni naiuso athsaosithsoso mele asong tsak shane.”

11Lüko Mosaüh apa Goa tü kojakü ngiom, “Apaou, ni Ijip ainou akong naiuso okong asongting ainou kipsankü shin, nung akhaiuniaso ko ni tiau thatü mongkia-e? 12Ni akhaiuniaso Ijip ainou king nai loatao naiuso moisemkü lomo wanao ayangtaiu noikü niasan ta Ijip hai au ngio-iau kiu-e? Mongmatkü lanoi, ni mongmattsün ali-eshi, küta akhaiuniaso khako nung aküothe nou kankü lashikiu. 13Ni yathsüotsün Abraham, Isak naiuso Yakob lüyangsan. Ni ngüso hau thsaosithsoso maou nai kianthsüo nouso tü piakü naiuso ni thaloutsün goumchi apem asaita ngüso tengkamao the-e ta ngüso ko mongkü thalou-etaiutsün lüyangsan.” 14Nungtiphe Apaou nou apa mongyang li-eshikü ta apa khaiuniaso khako aküothe kankü shiao noitsün laolo.

15Mosa, King ainou, Ngiokhem nouso sattsün lungkhio nime nou kankü laokü saom. 16Goa, apa pemüh lungkhio nou shan küta nung chiai ngiokhem nouso satlut.

17Yihusuaüh khaiuniahoi ngem- tsün lula küta Mosa tü ngiom, “Ngo khaiuniahoi saothang nai ali-etsün ngem lulaji.”

18“Nung sangh shiolokü wetsün tsüdekünai tsüshiohekü shaptsün sangh tsüde; lüko nung jih hangtsün sangh noin.”

19Tilai Mosa jangtsopong thso nou naiuso khaiuniahoi jih hangtsün thapluao khaiuniahoi saothang nai shin, apa lekkatkü noiküla. Nungai kinghok nouko, apaüh kankü shitsün lungkhio nouso le-i an naiuso nungh lopai-an. 20Apaüh ngüsoüh shantaiu nou jangtsopong thso sotsom nelangkü thiopek, küta khiam nouko lao-ekü goh naitaiukiu. Küta apaüh Israel hai hau nung shiu-i. 21Apaüh Aron tü ngiom, “Ni ngüso nungti angei thatü sunheau lümeikü nung khaiunia nousoüh ni tü ti chhin?”

22Aronüh thalakü ngiom, “Ngü ko lamongmat, nung khaiunia nousoüh tsümeikün chhiao titi thatsan nung ni ngeji. 23Ngüsoüh ngü tü ngiom, ‘Sauüh sam Ijip ainou niasan, samüh nung khaiunia nou Mosa tü ti tha- waokü noin nung tsünge; nungtiphe sam niakeiao sam hau goa tsak ashankiu.’ 24Ngo ngüso chaiou lakkeng taosilak jüdongai kankü ashi ta ngiom, naiuso sauhaiüh ti taium nung losan küta ngü hao akiu ta ngiom. Ngo nung daosilak nouso in nai jek küta nungai nung jangtsopong thso nou shansan!”

25Aron athatsamtsün ainou shi- khukü, ngüso eh nouso khako ngüso chija maingahoi iula-i ta Mosaüh epsan. 26Nungtiphe apaüh ngüso saothang bekhan nouko tsaküta wekü ngiom, “Sauhai Apaou ko hakü noin nungai jüdongai ashi!” Nungai Levihoi apem apa lemkü kamshi, 27küta apaüh ngüso tü ngiom, “Apaou Israel Goa nou asam khaiunia pungkü tü meshen sah soplokü khaiuniahoi saonoi nai nung bekhan ainou amao bekhan tsak nou saokü khukü momo deisinioso apem, naiuso meshen phaosiposo apem lüloat ta ngiokhem kiuji.” 28Naiuso Levihoi nou angio angkü, nung ajekhaiu ko khaiunia 300 thatso loatkü wan. 29Mosaüh Levihai tü ngiom, “Lonyi asamüh asam chija asam thsoso, naiuso deisinioso loattsün tsangkü Apaou yathsüotsün chhi nai mesonhoili theao losio lo-iu, nungti Apaou nou apa ouk asam hau kiu-iu.”

30Nungthan nyi nai Mosaüh khaiuniahoi tü ngiom, “Asamüh angei nou thsüokü sunhe-iu. Lüko lo ngo Apaou dongai king nai sungshi-e; tsüngean ngo asam angei thaiutha awankiutsün epao shiom.” 31Küta Mosa Apaou dongai laokü khukü ngiom, “Nung khaiunia nousoüh angei nou thsüokü sunlo-iu. Ngüsoüh chaiou lakkeng nou goa shansankü nungtü amkü noiküla. 32Tsüojinyangkü ngüso angei awankiu, ni tsüwankiu künaito, ni akhaiuniaso nian sattaiutsün thsam ainou jünian lüpei-an.”

33Apaou nou thalakü ngiom, “Nungso sauhai jükhako angei sunkü noin, ngüso nianlu ngo jü thsam ainou pei-ane. 34Lo lükhu, küta ngo ni tü ngiotsün athang nai khaiuniahoi nou niakü lükhu. Jü hongthonüh asam yam nia-e ta lüyangsan, tilai ngo nungso khaiuniahoi ngüso angei thaiutha angja-i-e nung atao nou shiji.”

35Ngüsoüh Aron hau chaiou lak- keng nou jangtsopong thso shanitsün thako, Apaou nou khaiuniahoi dongai imkia tsak hongshin.

ASIO THSAMLAI

©2005 Bible Society of India

More Info | Version Index