Search form

Aniasan 33

Sinai King leankü khuau Ngiokhem kiu

1Apaou nou Mosa tü ngiom, “Ni naiuso Ijip ainou niasantsün khaiuniahoi nou nung athang leankü ta Ngo Abraham, Isak, naiuso Yakob tü ngüso thsaosithsoso hau kiu-e ta thaloutaiutsün goumchi nai lükhu. 2Ngo asam niakeiao hongthon tsak honge, naiuso ngo Kanan hai, Amor hai, Hit hai, Periz hai, Hiv hai, naiuso Jebus hai koman kiu-e. 3Asam memei naiuso tsüomei goumchi tsak ai khuji. Lüko ngo jüpem to asam ko tsükhu-e, tiautenai asam mong kongtsün khaiuniahoi tsak noin, ngo khuha naito, ngo asam yamko lomowane.”

4Tilai khaiuniahoi nou nung ngio lula, ngüsoüh loto khiapthso apiamai nouso tsütheshikü mongsaiu ao yalo. 5Tititenai Apaou nou ngüso tü nung “Asam mong kong khaiuniahoi tsak noin ta ngioao Mosa tü thoilut. Ngo asam ko atao tsak thaiutha lüko khunaito, ngo asam moisemkü lomowanela. Lo asam daosilak apiamai nouso angiosan, küta ngo asam ko ti chhi-e nung thalu-e.” 6Nungtiphe Israel khaiuniahoi nou Sinai King wankü khukütün phiai to ngüsoüh daosilak apiamai nou tsütheshi.

Apaou Nejenkhio:

7Ti taoko Israel khaiuniahoi nou ngüso saothang shansane, Mosaüh asio Nejenkhio nou ngüso saothang nouko intso jetekü shan. Nung tü Apaou Nejenkhio ta jonkü noiküla. Naiuso khaiunia sauhai Apaou ko chiteau aiuji ngüso nungko khukü noiküla. 8Ti taoko Mosa nung Nejenkhio nai khuji, khaiuniahoi nou ngüso nejenkhio nouso koukhan nai tsakü Mosa monapkün lektso thap- thiokü noi. 9Mosa nung Nejenkhio nai napkütün phiai, Nejenkhio koukhan nai thengmia kheam nou saokü noi, naiuso Apaou nou Mosa tü thengmia nouko chite. 10Khaiuniahoi nou Nejenkhio koukhan khako thengmia kheam epnai, ngüso kauthiokü noiküla. 11Khaiunia tsak meshen haimei tsak ko chitetsünli, Apaou nou Mosa ko khasikha chite. Küta Mosa asaothang nai laokü shin. Lüko oum khaiunia tsak nou Nun thso Yihusua sau apa hachutsün noiküla, apa to Nejenkhio nai noian.

Apaou nou Apa khaiuniaso ko haao Thalouji

12Mosaüh Apaou tü ngiom, “Nung khaiunia nouso nung goumchi nai nialükhunao ni ngü tü chitetsün nung ngiotsüo noin. Lüko sau ngüko hakü hongao noin nung ni tsüchiteji. Ni ngo meikü ngeji naiuso ngüko mongmeikü noin ta nge-iu. 13Lo, nung atsüoting ni naito, ni thattsünso ngühao achite, nungaito ngo ni yathsüo-e naiuso tsülaokü yathsüo-e. Ni nung mele amele au chosan ta lüko ayangsan.”

14Apaou nou ngiom, “Ngo niko khu-e, naiuso ngo ni hau ashio nou kiu-e.”

15Mosaüh thalakü ngiom, “Ni samko tsükhuha-e tünaito, sam hau nung athang lalean-i. 16Ni samko tsükhuhakü naito, ni akhaiuniasoko si ngüko mongtsamtsün sauüh titi ngela-e? Ni samko hatsün nou goumchi nai amao mele nousoko ainou sam tsangshei sane.”

17Apaou nou Mosa tü ngiom, “Ni sangtsünli ngo chhi-e, tiautenai ngo ni thatü meikü ngeji, naiuso ngo niko mongtsamji.”

18Nungai Mosaüh kojakü sangkü ngiom, “Ngü hau tsüojinyangkü ni hatsün ajinka awon nou a-epi.”

19Apaou nou thalakü ngiom, “Ngo, jü ajinka akhako yankü khukü epi-e, naiuso akhako jü asio nian nge-i-e. Ngo Apaou, nou noin, naiuso ngo shingsantsünso da ngü atsüojin naiuso atsüojinyangtsün hanji. 20Ngo ni hau jü kha tsüepi-e, tiautenai khaiunia nou Ngo epkü aa noiau tsüshio. 21Lüko nungko jüdongko athang tsak noin naiuso nungko ni lung chi nai tsa ao noin. 22Tilai Ngo noitsün ajinka akhako yankü khu-e, ngo ni lungpai nai wane, naiuso ngo moyanlükhun khemkün lektso jüpha nou ni lajei-e. 23Küta ngo jüpha lowane, nungai ni jükhaiuphi eppe, lüko jükha to tsüepe.”

ASIO THSAMLAI

©2005 Bible Society of India

More Info | Version Index