Search form

Aniasan 35

Chinyatnyi nou thaiutha Ngiokhem

1Mosaüh Israel hai hoikam thum jonkam küta ngiom, “Nung samüh chhiao Apaou nou thoiluttsün noin: 2Asam hau chhisiya chhiloau ajekhaiu louknyi noin, lüko chinyatnyi nou to siokü taiuao noin. Nung Ngo Apaou nou tü losiokü taiutsün aalo ajekhaiu lethsangkü tsak noin. Khaiunia sauüh nung ajekhaiu nouko tso chhi-e apa to eaolu noin. 3Chinyatnyi nouko atsamkhaiu ai in lüko lajah.”

Asio Nejenkhio thaiutha Chaithio

(Aniasan 25:1-9)

4Mosaüh Israelhai apem tü ngiom, “Apaou nou thoiluttsün nung noin: 5Asamüh Apaou dongai chaithio lükan. Khaiunia pungkü sauhaiüh chaithioau mongchioji nungso chaithio kankü ashi, chaiou lakkeng, tangkason, tsüdekünai taoson lung, 6ne amatchai nying nyingkü, asang- nya, anyakhaoleng, naiuso emok ewoi aseng, wonpon nou shantsün nepat; 7onnemok pon theng sengkü, nyihkhun amei nou, akacia pai nou, 8tson taiutsün inkhiam, atsomao laoshang naiuso anyaothing nyamkü jahtsün, 9Akhengting Meson phakhut naiuso kongwoi nou tü chiolut ao Karnalian, naiuso amao chaiou apiamai nouso lükan.

Apaou Nejenkhio thaiutha Jengtsaiu

(Aniasan 39:32-43)

10“Asam ongko chhi montsün khaiunia apem shikü Apaou nou thoilut taiutsün chhisiya alum shanao noin. 11Nejenkhio nou, naiuso nung tü koiai si atsai ai lojeitsün, ang nouso, naiuso athanya nouso, nung asiangjeitsün, naiuso kheam nouso, naiuso nung noiluttsünso, 12Athalu-e Paidan, nung pitsün, akap, naiuso alopoktsün nekhong; 13Puo nou naiuso athaloau ang nouso, Goa hau thiotsün themtsai naiuso jengtsaiu nouso apem, 14tson taiutsün naiuso nung shanao jengtsaiu nouso, inkhiam hakü tson nouso, 15angannyamtsün jah ao amthang naiuso nung tü thaloao ang nouso, atsomkiutsün khaiutsom, angannyam jahtsün, Nejenkhio nai naptsün ko akhong- jeitsün ne, 16taoson lung sunkü, athaloau ang potsün sunkü, naiuso nung shanao jengtsaiu nouso hakü, khiampengtsün chiokau naiuso nung noitaiutsün, ajahsün chaithio thioau amthang, 17akiaploau nou nekhongtsün, kheam naiuso anoilutao, amongai napao bekhan nouko nekhong, 18Nejenkhio thaiutha pai naiuso ao nouso, naiuso among nouso, 19naiuso tilai mesonhoi nou Asiothang nai yathsüo-e, nungai thaloau alosungtsün meson neshe sheitho nouso, naiuso meson Aron, naiuso apa thsoso thaiutha asio neshe shitho nouso.”

Khaiuniahoi nou ngüso Chaithio Kankü Shiji

20Israel hai apem Mosa dong ainou pungekü khu, 21Naiuso Apaou Nejenkhio shantsün thaiutha khaiunia pungkü sauhaiüh Apaou hau chaithio kiuao mongchiosan nungti kankü shin. Ngüsoüh amkham nai potsün alum kankü shin, naiuso meson yamai thetsünso neshe chaiou kankü shin. 22Pohai naiuso nyiuhai chikü sauhaiüh mongchiosan, ngüsoüh ne tü aleng chioluttsün, nuodao nouso, khiapthso nouso, lak nouso, naiuso chaiou lakkeng apiamai alum in pungkü kankü shiküta Apaou tü losiolo. 23Khaiunia pungkü sauhaiüh nying nyingkü ne ameiting asangnya, ashethop, tsüdekünai emok ewoi aseng, wonpon nou latsün nepat, onnemok pon thengsengkü tsüdekünai nyihkhun amei, kankü shin. 24Akioau shiotsün apemüh tangkason tsüdekünai taoson lung Apaou hau ngüso chaithio hau kankü shin, naiuso sauhaiüh akacia pai taim, nungso chhisiya ajantso thaiutha po kü noinai kankü shin. 25Menyiu waimon apemüh nying nyingkü ne ameiting ewoi naiuso asangnya ewoi ashethop, naiuso emok ewoi aseng ngüsoüh shan nou kankü shin. 26Naiuso ngüsoüh won pon ewoi nou lüko shan. 27Ahei hoi nou Karnalian naiuso amao haiüh phakhut naiuso kongwoi nou tü chiolutao chaiou apia mai nou kankü shin. 28Naiuso laoshang si khaiutsom tson thaiutha, naiuso atsomkiu ao khaiutsom naiuso angannyam amei nyamao ajahtsün, ta kankü shin. 29Mosa tü Apaou nou chhi chhiao thoiluttsün chhisiya thaiutha Israel khaiunia apem sauhaiüh ngüso chaithio Apaou dongai kankü shiao mongchio nungso kankü shin.

Apaou Nejenkhio thaiutha Tsamlah Montsünhoi

(Aniasan 31:1-11)

30Mosaüh Israel hai tü ngiom, “Apaou nou Yihuda kaumong ainou Hur thsao nou Uri thso Bezalel chosaniu. 31Goa nou apa oukongüh apa meankiu-iu, naiuso apa hau jengtsaiu alum in amomo shan- santsün nai angelatsün, amontsün, chhi shiotsün kiu-iu, 32alengyam amonting shanao naiuso, nungso chaiou lakkeng nai, tangkason nai, naiuso taoson lung shantsün nai, 33naiuso anoilut ao thaiutha chaiou lung; naiuso pai chhiao, naiuso amao in amomo shantsün thaiutha kiu-iu. 34Apaou nou apa hau naiuso Dan kaumong ainou Ahisamak thso Oholiab hau loüh amao hai hau ngüso amontsün tsandeshiao ashiotsün kiu-iu. 35Asatluttsünso chhi, alengyamluttsünso chhi, ne amatchai lashantsünso chhi, asangnya leng nou, anyakhao leng nou, naiuso emok ewoi aseng, naiuso amao neshe shantsün nai in amomo shantsün chhi montsün kiu-iu. Ngüsoüh chhi naiuso alengyam in amomo yamlutkü chhiao shioji.”

ASIO THSAMLAI

©2005 Bible Society of India

More Info | Version Index