Search form

Aniasan 36

1Apaou nou thoiluttsünli, asio Nejenkhio shantsün chhisiya apem titi shane nung monkü ngetsün naiuso angelatsün mongyang noitsünso ko Bezalel si Oholiab neüh chhi-e.”

Khaiuniahoi nou Paopei Piakü Kankü Shin:

2Mosaüh Bezalel naiuso Oholiab naiuso amao chhi montsün khaiunia hoi sauhai hau Apaou nou ashiotsün kium, naiuso sauhaiüh chhisiya nai hachuau mongchiokü noiküla ngüso jon, küta ngüso tü chhi yaloau ngiom. 3Israel thsosoüh asio Nejenkhio chhisiya thaiutha ashanao thaiutha kankü shitsün chaithio apem Mosa ainou lou. Lüko Israel haiüh ahom tsütokü ngüso chhisiya thaiutha tsülaokü kankü shin. 4Nungai amon- tsün khaiuniahoi sauhai chhisiya nai tsakü noiküla 5ngüso khukü Mosa hau chitekü ngiom, “Chhi chhiao Apaou nou shanao kiutaiu nou chiai thatü aphop nou khaiuniahoi nousoüh kankü shiji.” 6Nungtiphe Mosaüh ngüso saothang chikü thapekkü asio Nejenkhio thaiutha ahachu kankü shitsün sauühtso lachhishi ta ngiokhem hongpeng, nungtiphe khaiuniahoi nou loto ahachu kankü tsüshi shi. 7Tisübao kankü shianiu nungüh chhisiya apem khemao ashiotsün chiai shikü noiküla.

Apaou Nejenkhio Shantsün

(Aniasan 26:1-37)

8Amontsünso ongko amonting khaiunia nousoüh Apaou Nejenkhio chhisiya nouso shan. Ngüsoüh nung asangnya leng nou, anyakhao leng nou, naiuso emok ewoi aseng nou tü akoi nime potsün thainian sotsom nou chiolutkü nying nyingkü noitsün ashethop apem che nou shan.

9Ne ehen pungkü akikuk wekü atheng nai phasab eknime kü petjei, naiuso atham pungkü nai phasab püle, ehen ne apem nou athat tsakli noiküla. 10Ehen ne pungo nou tsak hau thekü jipe, naiuso amao ehen ne pungo nou lüko apaüh tsak hau thekü jipe. 11Ngüsoüh ewoi asangnya nou ne thun achi pungkü nai kiangkü shan. 12Chongting ling nouko nekhongjeitsün, chongting nou tü ewoi kiangkü chioluttsün aopungo chiolut. Naiuso ewoi aopungo nouso müjam ling nouko ehen thun nai wao-ekü shan. 13Aling nime nou aling tsak hau theao nou chaiou lakkeng ang aopungo shan.

14Nungphiai nejenkhio lopokkao won pon nou lahtsün nepat anelang chekü tsak nouko nou shan. 15Nung atheng nai phasab aosam naiuso atham nai phasab püle ta ehen ne nou apem wekülu shan. 16Nung hoi tsak hau thekü pungo nou chiowe naiuso amao hoi louk nou tsak hau ta chiowekü shan. 17Aling tsak nouko athunting ehen ne aphiting nou ewoi aopungo nou kiangkü chiolut, naiuso aopungo nou amao aling tsak ta chiolut. 18Aling nime jipeao thaiutha ewoi kiang nou taoson lung aopungo shan, nung akap tsak shanao thaiutha noin. 19Loüh akaptsün nime shan, tsak nou onnemok khun nou thengsengkü naiuso amao nou achikap ao theao nou nyihkhun amei nou shan.

20Nejenkhio thaiutha akacia pai nou langtsakü tsakü kheam nouso shan. 21Kheam pungkü atheng nai phasab che naiuso atham nai phasab tsak küta ayantso, 22kheam nouso jipekü theao thaiutha athat nime wewekü noiküla. Kheam apem nouso tü nung athat nouso noiküla. 23Ajepekki nai hau kheam eknime shan, 24naiuso apia iuai nou kheam aopüle nung kheiai hau shan, athat nime noilutao kheam pungkü kheiai anoilutao nime noiküla. 25Nejenkhio ajenapki nai kheam eknime shan, 26naiuso apiamai athanya aopüle kheam nime pungkü khemai shan. 27Ajenap nai Nejenkhio phiai nou thaiutha kheam louk shan, 28nung kheam nime nou aniokun nouso thaiutha shan. 29Nung aniokun kheam nouso akheiai jippe küta asungthunting saokü nung jippekü taiu. Kheam nime subao nou aniokun nime nai shantsün nungti noiküla. 30Nungai kheam petjei naiuso tangkason athanya chekü louk, nung kheam nime pungkü khemai nime me shan.

31Akacia pai nou kheam pungo jiekü shan, pungo nou Nejenkhio kheam aki tsak thaiutha, 32naiuso loüh pungo nou kheam aki tsakai thaiutha, naiuso pungo nou ajenapki tsakai thaiutha phiai thaiutha shan. 33Awem pai jei-e nou kheam awemko laokü shan, nung Nejenkhio ano tsakai nou ano tsak ta saokü noiküla. 34Nung kheam nouso chaiou lakkeng nou loijei küta nungtü ajei-e nou tü thaloau chaiou nou shantsün ang nouso lolut, nungso lüko chaiou lakkeng nou nyingjeikü noiküla.

35Ne akhongjeitsün tsak nou ashethop, asangnya leng nou lakü, anyakhao leng, emok ewoi aseng, naiuso akoi nime pokü noitsün thainian nou chiolutkü tsak shan. 36Akacia pai nou nekhongjeitsün athaloau kheam püle chaiou lakkeng nou nyingpokkü naiuso athaloau nou chaiou lakkeng nou waokü shan, küta ngüsoüh tangkason nou shantsün kheam noiluttsün püle shan. 37Nejenkhio nai naptsün koukhan nai nekhong tsak ashethop ne nou lahtsün asangnya leng nou, nyakhaokü, naiuso emok ewoi aseng leng thekü jipon nou chioluttsün tsangkü aleng yamlutkü shan. 38Nung nekhongjei-etsün thaiutha kheam pungo athaloau sunkü shan, nung asungthun achi nouso son nou shan, naiuso nung kheam thaiutha taoson lung pungo anoiluttsün shan.

ASIO THSAMLAI

©2005 Bible Society of India

More Info | Version Index