Search form

Aniasan 37

Athalou-e Paidan Shantsün

(Aniasan 25:10-22)

1Bezalelüh Athalouetsün Paidan atheng nai phasab nime küta ayantso, atham nai phasab tsak küta ayantso, atsok nai phasab tsak küta ayantso ta akacia pai nou shan. 2Apaüh nung Paidan amongai si achiai chaiou lakkeng nou chüjei naiuso akok lemkü chaiou lakkeng nou kokjeikü shan. 3Nungtü api kei ao ang püle chaiou lakkeng noulu shanlut küta nungso phasab püle thatso ko jiplut, ano pungkü nai ang nime me lolut. 4Naiuso api kei ao pai nouso akacia pai nou shan, küta nungso chaiou lakkeng nou chüjei, 5nung Paidan ano pungkü nai ang nou ko chinthio. 6Naiuso akap nou chaiou lakkeng noulu atheng nai phasab nime küta ayantso, naiuso atham nai phasab nime küta ayantso ta shan. 7Loüh akoi nime potsün thainian nime chaiou lakkeng nou lang kü aniokun nemthso ai tsak tsak noikü shan. 8Nung akap nouko aikü tsak haulu thekü langkü shan. 9Nung akoi nime potsün thainian nou Paidan kap nou ta khasikha shei-ekü ekok nousoüh nung sojeikü noi-i.

Goa hau Chaithio Kiutsün Themtsai Puo

(Aniasan 25:23-30)

10Apaüh puo nou akacia pai nou atheng nai phasab nime, atham nai phasab tsak küta ayantso, naiuso atsok nai phasab tsak küta ayantso ta shan. 11Küta nung chaiou lakkeng nou athun nouso lemkü chüjei. 12Naiuso akok nou chaiou lakkeng nou lemkü kao süme teikü shan. 13Nung thaiutha api kei ao chaiou lakkeng nou ang püle shanlut, küta puohok nouso dongko ano püle nouko nung lolut. 14Puo pi keitsün pai chinthioau ang nouso akok nou shimkü taiu. 15Nung api keitsün pai nouso akacia pai nou shan küta chaiou lakkeng nou nyingjei. 16Naiuso nung puo nai kankeiao lak, chio, thengkam, khiam meng, naiuso chiothso nouso theng chaithio thaiutha tilüsong akankeiao noin nungso chaiou lakkeng nou shan.

Tson taiuao shan

(Aniasan 25:31-40)

17Apaüh tson taiutsün nung chaiou lakkeng noulu shan. Nung anoiluttsün naiuso tson atengting nou taiutsün pai nou chaiou lakkeng nou langkü shan, nungtü alengyam- luttsün taopon chio naiuso taopon nouso nungko aikülu hoi-ekü shan.

18Nung ano nouso ainou ajung louk nou ano nime nai süme me ta sung. 19Akia louk pungkü tü almon punsantsünli, apunthuk naiuso pai- kia nouso tü taopon alengyam süme khekkü noiküla. 20Tson taiutsün paipem nou da apunthok si paikia sunkü pontsün almon taopon aleng- yam püle pokü noiküla. 21Paikia ib ibkü süme pungkü khemai asun tsak noiküla. 22Asun, akia, naiuso tson taiutsün nung chaiou lakkeng atsüoting nou tsak hau thekü langkü noiküla. 23Apaüh tson chinyat taiu ao tson taiutsün shan, naiuso nung khojeiao si taiuao chio nouso chaiou lakkeng noulu shan. 24Tson taiutsün naiuso nungso jengtsaiu shanao chaiou lakkenglu tsoi aosamkü pungo kankeikü shan.

Angan Nyamtsün Jah ao Amthang shan

(Aniasan 30:1-5)

25Apaüh angan nyamtsün jahkü chaithio thioau amthang akacia pai nou shan. Nung atheng nai phasab tsak, apun nai phasab tsak, naiuso atsok nai phasab nime ta noiküla. Nung athat ano püle nai nouko tsak haulu noiküla. 26Naiuso nung atsok nai, ano püle nouso nai, naiuso athunsithun nai lemkü apaüh chaiou lakkeng noulu chüjei. 27Apaüh api kei ao chaiou lakkeng nou ang nime lolutkü shan, küta nungso akhei athun nime nai jiplut, nung akankeitsün taoko phatha ao noiküla. 28Api ai pai nouso chaiou lakkeng nou nyingjeikü akacia pai nou shan.

Atsomkiutsün Khaiutsom naiuso Angan Nyamkü Jahtsün

(Aniasan 30:22-38)

29Apaüh loüh asio nai tsomkiu- tsün khaiutsom naiuso angannyam nyaothingkü nyamkü jahtsün khaiutsom khekkü laowekü shan.

ASIO THSAMLAI

©2005 Bible Society of India

More Info | Version Index