Search form

Aniasan 39

Mesonhoi thaiutha Neshe:

(Aniasan 28:1-14)

1Apaou nou Mosa tü thoiluttsünli, tilai mesonhoi nou shitho tholokü Asio Thang nai yathsüoe, nung thaiutha neshe ameiting nou ngüsoüh aleng asangnya nou, anyakhao nou, naiuso emok ewoi aseng nou shan. Apaou nou Mosa tü thoiluttsünli, ngüsoüh Aron thaiutha mesonhoi nou thetsün neshe shan.

2Meson asio sheitho nou chaiou lakkeng, asangnya leng, anyakhao leng, aseng leng, naiuso achioluttsün ne amatchai amei nou shan. 3Ngüsoüh chaiou lakkeng nou matchai matchaikü ahoi ahoi yangkü shan, naiuso nung sotsom saitsün nousoüh asangnya leng, naiuso nyakhaokü naiuso aleng aseng nou shanao thaiutha sonao iulakü nung tippek. 4Jenkü shingjeiao, ngüsoüh sang nai woi-itsün shan küta nungso athun nouso ai jipe. 5Apaou nou Mosa tü thoiluttsünli, nung nepat noulu shantsün omkhi ne amei nou lakü tsak hau theao phakhut nou tü jiplutkü shan. 6Karnelian chaiou lung shan, küta nungtü Israel thsoso nian chekü nime nouso thatü meikü lahlut, naiuso chaiou lakkeng noi taiutsün nai taiu. 7Apaou nou Mosa tü thoiluttsünli, ngüsoüh nung Israel mele chekü nime liko phakhut nou tü sang nai woilutkü the.

Kongwoi:

(Aniasan 28:15-30)

8Ngüsoüh kongwoi nou phakhut ne tsak noulu jipon khekkü nou chiolutkü shan. 9Nung atheng nai kom tsak, atham nai kom tsak, ta wewekü naiuso nene khapkü noiküla. 10Nung chiai ngüsoüh lung ahoi püle kelut: chongting ahoi nouko rubi lung, topaz lung, karnet lung; 11aling nime nouko: emerald lung, safir lung, naiuso daimon lung, 12naiuso aling süme nouko: turquoise lung, agat lung, naiuso amethis lung, 13naiuso aling püle nouko: beril lung, karnelian lung, naiuso jasper lung, ta nungso noiluttsün chaiou lakkeng nou lemjeikü shan. 14Lung chekü nime pungkü tü Israel kau chekü nime nouso nian taiuao Yakob thsoso nian tsak tsak nung chiai satkü taiu. 15Kongwoi thaiutha ngüsoüh chaiou noulu sonkhiang chankü shankü taiu. 16Ngüsoüh chaiou lakkeng nime thsa-e naiuso chaiou lakkeng khiap nime ta thsa-e küta kongwoi halai athun nouso jipekü taiu. 17Chaiou lakkeng nime nou chaiou lakkeng khiap nime nou tü jenkü kelut. 18Naiuso sonkhiang nime thun nou chaiou nime thsa-etsün tü kelut, nungli ngüsoüh phakhut alaiu nou sang nai woi-ikü kha ai the. 19Chaiou khiap nime shanküta kongwoi asaothun nou tü jiplut. Phakhut alaiu nou ta thankü phakhut akhei thun nou tü jiplut. 20Ajipetsün shimkü omkhi khengko, chaiou khiap nime shanküta nungso phakhut sangwoi nime kha ai nai asaothun nethun nou tü jiplut. 21Kongwoi nou omkhi nou ta yangjeiao naiuso pih ankü tsüiula ao Apaou nou Mosa tü thoiluttsünli, ngüsoüh sonkhiang asangnya tsak nou kongwoi ang nouso phakhut ang nouso tü thsane.

Meson Sheitho Amao nouso:

(Aniasan 28:31-43)

22Phakhut khei ai thiotsün meson asio ne nou emok ewoi asangnya leng noulu shan. 23Phakhut awim nouko tsüchipekkao thaiutha khaiu thiotsün thunko ewoi meikü uokü nou chioshi. 24-26Apaou nou Mosa tü thoiluttsünli, phakhut thun lemkü ngüsoüh ashethop taopon amei naiuso asangnya leng nou, anyakhao leng nou, naiuso emok ewoi aseng nou chaiou nou lu langtsün la nouso phanlut.

27Aron naiuso apa thsoso thaiutha phakhut nouso shan, 28nungko khaiuke kandeo khep nouso, ashethop ne phakhut nouso, 29chaiou lakkeng sangwoi ne ashethop nou shantsün, asangnya leng, anyakhao leng naiuso emok ewoi aseng nou jipon chioluttsün nou alengyam lolutkü, Apaou nou Mosa tü thoiluttsünli shan. 30Ngüsoüh chaiou lakkeng nou lu thumkü kiutsün asio ii ao alengmei yamluttsün shan, küta nung chiai “Apaou tü thumkü kiutsün” ta nian langlut. 31Apaou nou Mosa tü thoiluttsünli, ngüsoüh khaiuke kha ai ao asangnya tsak nou jenkü kelut.

Chhisiya Khemkü Shitsün:

(Aniasan 35:10-19)

32Apaou Nejenkhio chhisiya apem khemkü shin. Apaou nou Mosa tü thoiluttsünli lu, Israel haiüh chhi- siya alum chhikü shin. 33Ngüsoüh Apaou noitsün Nejenkhio naiuso nung shantsün jengtsaiu apem Mosa dongai kankü shin, nungko nungso jengtsaiu nouso noiküla: akhojeitsün, kheam nouso, sonpe nouso, loüh akih ao kheam nouso, naiuso anoilutao nouso, 34onnemokpon thengsengkü akejeitsün, akapjeitsün nyikhun amei, koukhan nai khongtsün ne, 35Athalou-e Paidan nungko Ngio- khem lungkhio nouso hakü, nung pikeitsün pai nouso, naiuso nung kapjeitsün, 36Puo naiuso nung jeng- tsaiu nouso, naiuso Goa hau kiutsün themtsai, 37chaiou lakkeng noulu shantsün tson taiutsün, tson nouso, nung shantsün jengtsaiu nouso, naiuso tson nai thiotsün inkhiam nouso, 38chaiou amthang, atsomkiutsün khaiutsom, angannyam jahtsün, Nejenkhio nai naptsün bekhan khongjeitsün, 39taoson lung amthang naiuso taosonlung saitsün, nung pi keitsün pai nouso, naiuso nung shantsün jengtsaiu nouso,, chiokaoh asong naiuso nung noitaiutsün, 40Koukhan nai khongjeitsün naiuso akiapjeitsün, naiuso phakhut alaiu nouso, Nejenkhio thaiutha pai nouso, Nejenkhio nai kankeiau jengtsaiu nouso apem, 41naiuso Asio Thang nai mesonhoi nou tholoau nou alengmei neshe nouso, Meson Aron thaiutha asio neshe, naiuso apa thsoso thaiutha. 42Apaou nou Mosa tü thoiluttsünli, Israel haiüh chhisiya alum chhin. 43Mosaüh nungso tü mongtsokü thap küta Apaou nou thoiluttsünli chhi apem ngüsoüh chhitsün apaüh epsan. Nungti Mosaüh nungso ouk kiu.

ASIO THSAMLAI

©2005 Bible Society of India

More Info | Version Index