Search form

Aniasan 4

Goa nou Mosa hau Athanga Oukong kiuji:

1Nungai Mosaüh Apaou tü thalakü ngiom, “Lüko Israel thsosoüh ngü da tsümonglamkü naiuso ngo ti ngioji nungtü tsüanglu-e. Ni ngü tü tsangsheikü tsüsung ta ngüsoüh ngionai, naito ngo ti chhi-e?”

2Nungai Apaou nou apatü sangkü ngiom, “Ni ti semkü noin?”

Apaüh thalan, “Pailai tsak.”

3Apaou nou ngiom, “Nung goh ai lüyaktaiu.” Tilai Mosaüh nung goh ai yaktaiu, nung pao tsak au iulan, naiuso apa nung ainou jingkü khuwan. 4Nungai Apaou nou Mosa tü ngiom, “Kaukü napküta nung ami nai thalokü atsonsan.” Nungti Mosaüh kaukü napküta nung tsonsan, naiuso nung müjam pailai au iulashin. 5Apaou nou ngiom, “Israel thsoso tü Apaou ngüso paosiposo Abraham, Isak, naiuso Yakob Goa nou ni tü atsangshei sungtsün mitha au nung lüchhi.”

6Apaou nou Mosa tü loüh ngiom, “Apha aphakhut khemai lütaiu.” Mosaüh angiotsün angkü chhin, küta apaüh apa pha tensan nai, nung chaikia nyinli thaiukü nou meankü noiküla. 7Nungai Apaou nou ngiom, “Apha loüh aphakhut khemai lütaiu shi.” Nungai apaüh angiotsün angkü chhin, naiuso apaüh nung tensanshi nai apa pha aya lilu meikü iula. 8Apaou nou ngiom, “Ngüsoüh ni tü tsümonglamkü naito, tsüdekünai aya athanga chhi nou tsüthasangkü naito, nungühlu ngüso thasange. 9Loüh nung athanga ii nime nou lüko ngüsoüh ni tü tsümonglamkü, naiuso loüh ni ti ngioji nung lüko tsülukü naito, Nail haiumong ainou khiam intso lülo küta nung goh ta lütsalut. Nung khiam nou she au iula-e.”

10Lüko Mosaüh ngiom, “Nyah, Apaou, ngü to lahong. Ngo tilaitso ngio meikü chitetsün tsak tsüde, tsüdekünai ni atsamki tü chitekütün phiai lüko ngo meikü chitetsün tsak tsüde. Ngo ngiosingio thsaothsaokü, naiuso yamlukü, naiuso henyikü noitsün tsak noin.”

11Apaou nou apa tü ngiom, “Khaiunia hau apa sontham sauüh kiuji? Mainga tsüdekünai noukek nou sauüh shanji Sauüh apa hau epiji, tsüdekünai sauüh apa hau niopek shankiuji? Nung Ngo Apaou nou noin. 12Lo lükhu! Ngo ni singioau hachu-e, naiuso ni ti ngio-e ngo chite-e”.

13Lüko Mosaüh thalakü ngiom, “Nyah, Apaou, tsüojinyangkü amaohai tsak lühong.”

14Nung taoko nai Apaou Mosa tü mongmatkü ngiom, “Levi kau ko adei Aron tsünoi süne? Apaüh meikü chiteau monji ta ngo ngeji. Atsüoting apa lo niko pheteau shiji, naiuso apa niko eppe nai monglenge. 15Ni apa ko chiteküta apa tü ti ngio-e nung lüchite. Ngo aje nemthsoüh chiteau hachu-e, naiuso nemthso tü ti chhi-e nung chite-e. 16Apa athaiutha ko khaiuniahoi nou tü chitekiuau the-e. Nungai ni Goa li apaüh angio thonshi thonshikü noi-e. 17Nung Pailai niko lütaiu; tititenai nungüh ni ii nouso chhi-e.”

Mosa Ijip Ai Laokü Khuji:

18Nungai Mosa apa kaio Jethro dongai laokü khukü apa tü ngiom, “Tsüojinyangkü ngü Ijip nai jü tsammongso dongai ngüso aa noi süne tsünoi ta thapau laokü akhu-i.” Jethro mongchiokü apa tü meikü lükhu ta ngiom.

19Mosa loüh Midian hai goh ai noinai, Apaou nou apa tü ngiom, “Ijip nai laokü lükhu, tititenai sauhaiüh ni loat au yamkü noiküla ngüso apem eaniu.” 20Nungtiphe Mosaüh apa tsammongnyiu naiuso apa melothsoso, gado chiai noi-i, kü Goa nou apa tü ngiotsün Pailai lokü Ijip nai khuau tsammonghoiko tsalo.

21Loüh Apaou nou Mosa tü ngiom, “Loto ni Ijip nai laokü khuji, ngo ni hau kiutsün oukong athanga ii nouso nokpao khako chhikü hanau yangkü lüthe. Lüko ngo nokpao mong kongi-e, naiuso apaüh khaiuniahoi nou tsükhu-i-e. 22Nungai ni apa hau nung lüchite, Ngo Apaou, nou ngioji, ‘Israel hai nung jüthso melothso yamchong nou noin. 23Ngo ni tü jü khaiuniaso akhu-i ta ngioji, nungtiphe apaüh ngü tü amkhame, lüko ni tsümongchio. Loto ngo athso melothso yamchong nou loatane.’”

24Ijip nai khutsün yamai nejen- khio lahkü noitsün athang tsak ko, Apaou nou Mosa ko phete, naiuso apa loatau kowekü noiküla. 25-26Nungai Zipora, apa tsammongnyiuüh akih monkü noitsün lung tsak loküta, apa thso melothso tsashethun laman, küta nungüh Mosa hok nai than. Tsashethun tippantsün amkham kiu nou shioko nyiuhai nou Mosa tü ngiom, “She tsangkü chetsantsün tsammongpo ni noin.” Naiuso nungti Apaou nou Mosa aa poikiu.

27Nung taoko Apaou nou Aron tü ngiom, “Mosa ko pheteau liutsa nai lükhu.” Nungai apa Mosa ko pheteau asio King nai khu, nungko apa Mosa ko phete, nungai apaüh Mosa tü son nai chep. 28Nungai Mosaüh Aron hau apa tü Ijip nai laokü khuau ngiotsün naiuso Apaou nou apa tü ii athanga chhi nouso chhiau thoilut- tsünso alum chite. 29Nungti Mosa naiuso Aron Ijip nai khuküta Israel thsoso aheihoi apem lokam. 30Aronüh ngüso hau Apaou nou Mosa tü chitetsün alum chite, naiuso Mosaüh khaiuniahoi khako ii nouso chikü chhisankü han. 31Ngüsoüh monglam, naiuso tilai ngüsoüh Apaou nou ngüso dongai shikü ngüso tü khosakkü kankeitsün epiu ta lula, ngüso kaukü napkü Apaou tü amkham.

ASIO THSAMLAI

©2005 Bible Society of India

More Info | Version Index