Search form

Aniasan 40

Apaou Nejenkhio lahküta Losiotsün

1Apaou nou Mosa tü ngiom, 2“Chongting alei nouko chongting ajekhaiu nai ni Apaou noitsün Nejenkhio nou lüshan. 3Nung mongko Ngiokhim che nouso naptsün Athalou-e Paidan akhong jeitsün ne nou khongjeikü lütaiu. 4Naiuso ni puo nou kankü anap, küta puo nou chiai jengtsaiu nouso lingthakü ataiu. Naiuso tson taiutsün kankü napküta nung chiai tson nouso ataiu. 5Athalou-e Paidan khako angan nyam thaiutha jahtsün chaiou amthang nou ataiu, küta Nejenkhio nai naptsün bekhan khütha nai akhongjeitsün ne khongkü ataiu. 6Ajahtsün chaithio kiutsün amthang Nejenkhio khako ataiu. 7Atsaowan- tsün chiokaoh nou Nejenkhio si amthang jetko ataiu küta nung khiam nou meankü ataiu. 8Naiuso nung lemkü ni apejei, küta anaptsün bekhan nai akhongjeitsün ataiu.

9“Naiuso ni atsomkiutsün kankü shikü Nejenkhio naiuso nungko noitsün apem tü atsomkiu, nungüh nungko taiutsün jengtsaiu nouso apem siokü iula-i-e.” 10Nungthanko amthang naiuso nungtü suntsün apem tü atsomkiu, naiuso nung apem chiko siokü noi-e. 11Naiuso atsao- wantsün chiokaoh ko hakü nung noiluttsün tü khaiutsom tsomkiu kü losiokü lütaiu.

12“Aron naiuso apa thsoso Nejenkhio bekhan nai nialokü shikü amkham saili khiam lüpeng ta ngüso tü lüngio. 13Ni Aron hau meson neshe shitho nouso lüthokiu, naiuso lütsomkiu, naiuso apaüh meson chhisiya nai ngü yathsüoao thaiutha apa lülosiokiu. 14Apa thsoso niakü shiküta ngüso hau phakhut nouso lüthokiu. 15Ngüsoüh ngü mesonhoili yathsüo au thaiutha, ngüso po tsomkiutsünli, ngüso lüko lütsomkiu. Nung atsomkiutsün nou ngüso ashiao atao apem thaiutha mesonhoi noi-e.”

16Apaou nou thoiluttsünlilu Mosaüh alum chhin. 17Nungtiphe ngüsoüh Ijip wankü khukü phiai nepon chongting alei nouko chong- ting ajekhaiu nai Apaou Nejenkhio noulahshan. 18Mosaüh anoilutao nou letaiu küta kheam nouso kisan, nungtü apejeitsün thiokü kisan. 19Apaüh Nejenkhio nou akhongjei- tsün ne nou sopek naiuso achi khongjeitsün nung achiai lolut, nung Apaou nou thoiluttsünli noiküla. 20Küta apaüh lungkhio nime nou loküta nung Athalou-e Paidan nai thio. Apaüh Paidan tü ang lolut takiutsün nai apitsun pai nou chinthio, küta nung chiai akap nou kaplut. 21Nai apaüh Paidan nou Nejenkhio nai thio, küta akhongjeitsün ne khonglut. Nung Apaou nou thoiluttsünli apaüh Athalou-e Paidan ne nou pejeikü wan.

22Apaüh nekhongjeitsün amongai taiukü ajenapki nai shinkü Nejenkhio nai puo nou lokthio, 23küta Apaou nou thoiluttsünli lu Apaou hau kiutsün themtsai nung chiai taiu. 24Apaüh puo nou thakü ajepekki nai shinkü Nejenkhio nai tson taiutsün nou lothio, 25naiuso Apaou nou thoiluttsünli lu, apaüh Apaou noitsün nai tson nou suon. 26Akhongjeitsün ne khako Nejen- khio nai apaüh chaiou amthang nou shankü thio. 27Naiuso Apaou nou thoiluttsün lilu angannyam nyaothingkü nyamkü jahtsün athang nou lothio. 28Apaüh akhongjeitsün ne Nejenkhio nai naptsün bekhan nai khonglut. 29Küta akhongjeitsün ne khako apaüh ajahtsün chaithio kiuao amthang tsak shantaiu. APAOU nou thoiluttsünli lu apaüh nung chiai chihsikhiam chaithio nouso naiuso ajahtsün chaithio nouso kiukü amkham. 30Apaüh atsaowantsün chiokaoh nou Nejenkhio si amthang jetko taiuküta nung khiam nou lomeankü wan. 31APAOU nou thoiluttsünli lu tilai ngüso Nejenkhio tsüdekünai amthang nai nape, Mosa, Aron, naiuso apa thsosoüh phasihok nouso nungko tsaowankü noiküla. 32Tilai ngüso Nejenkhio tsüdekünai amthang nai APAOU nou thoiluttsünli nape, 33Mosaüh Nejenkhio naiuso amthang lemkü pe nou pesan küta anaptsün bekhan khütha nai akhongjeitsün ne lolut naiuso nung pejei. Nungti apa chhisiya apem khem. APAOU Nejenkhio khütha nai Thengmia (Haove 9:15-23) 34Nejenkhio nou thengmia nou loijei, naiuso APAOU ajinka nou Apa noitsün mean. 35Nung shioko Mosa APAOU Nejenkhio nai napao tsüshiokü noiküla. 36Tilai thengmia nou Nejenkhio loijeitsün leane, Israel haiüh ngüso saothang nou amao athang tsak ai li-eshikü noiküla. 37Thengmia mokhuwankü noitsün lektso ngüso saothang ainou tsü soiankü noiküla. 38Ngüso tsakeitsün atao apem nouko ngüsoüh APAOU Nejenkhio khütha nai anyi taoko thengmia ep naiuso asoh taoko nung thengmia chiai In nyai epkü noiküla.

ASIO THSAMLAI

©2005 Bible Society of India

More Info | Version Index