Search form

Aniasan 5

Ijip Nokpao khako Mosa naiuso Aron:

1Nungai Mosa naiuso Aron ne Ijip nokpao dongai khuküta ngiom, “Apaou, Israel Goa nou ngioji, ‘Liutsa nai ngüsoüh jü thaiutha sümai saoheau jü khaiuniaso akhu-i.’”

2Nokpao nou ngiom, “Apaou sau noin?” “Israel hai khu-iau tiauta ngo apa ngio ang-e? Ngo Apaou nou tsünge; naiuso ngo Israel tsü khu-i-e.”

3Mosa si Aron neüh thalakü ngiom, “Ibri hai Goa nou apa pim samko phete-iu. Sam Goa hau liutsa nai amkham kiuau ajekhaiu samnyi tsakeikü khuau ayam asopkiu. Samüh nung tsüchhikü naito, apaüh sam ehli tsüdekünai akiasiya nou loate.”

4Nokpao nou Mosa si Aron netü ngiom, “Khaiuniahoi chhisiya oulokia au thaiutha ajeüh ti chhi chhiji? Nung sua nouso chhi nai laokü lülolutshi! 5Asam khaiunia nouso Ijip haiko haove tekkü piakü iula-iu. Naiuso lo ajeüh chhisiya nou lolaoau aiuji!”

6Nung ajekhaiukolu nokpao nou Ijip hai sua niakeitsünso naiuso Israel hai chhisiya nai aheihoi tü ngiokhem kiukü ngiom, 7lung sai au khaiunia nouso hau tsokap kiutsün alaowan. Ngüso khukü meshen chija lüyamlo-i. 8Lüko lung tsaktso thsaokü tsüdekü loüh nung khako lilu lung nou haove nai athapungi. Ngüsoüh chhi saiukü mochhi, nung shioko ngüsoüh ngüso Goa tü amkham kiuau akhu-i ta tsülaokü sangkeiji! 9Nung khaiunia nouso hau chhisiya kongkü chhi-ikü ngüso tsükeng tingkü lütaiu nungailu ngüsoüh yaang tsandetsün tü ang-au atao tsünoi-e.

10Sua aheihoi naiuso Israel thsoso ataotumtsünso khuküta Israel thsoso tü ngiom, “Nokpao nou asam hau loto tsokap tsükiushi-e ta ngiom. 11Tilüsongai nung eppe asam chija khukü lülo ta apaüh ngioji, lüko asamüh lung nou tsülothsaokü nung khako lilu ashan ta ngioji.” 12Nungtiphe khaiuniahoi nou Ijip thapekkü tsokap yam pengkü khu. 13Sua ahei nousoüh ngüso tü tsülaokü choikü ngüso tsokap kiutsün atao nai chhitsün lilu wekü lung nou ajekhaiu pungkü shani. 14Ijip hai sua aheihoi nousoüh Israel thsoso ataotumtsün hoi tü shiuh, nungso ngüsoüh chhisiya nai aheiau kiukü taiuküla. Ngüsoüh ngiom, “Asam khaiunia nousoüh nung khako nai chhitsün li lung haove wekülu theau shanji”.

15Nungai ataotumhoi nou Ijip nokpao dongai khukü mong tsümeikü nou ngio-iuji, “Ni tiau sam tü nung chhiji, Oh Asong? 16Sam hau tsokap tsükiu lüko losaokü sam tü lung shanau ngiokhem kiuji! Naiuso loüh sam shiuhatkü noin, nung akhaiuniaso aphio noin.”

17Nokpao nou thalakü ngiom, “Asam cholak naiuso asamüh chhi chhiau tsüaiu, küta nung shioko asamüh ngü tü Apaou tü amkham kiuau akhu-i ta sangji. 18Loto chhi nai tsalokü lükhu! Asam hau tsokap titso tsükiushi-e, lüko asamüh lung haove loüh wekülu shanau noin.” 19Ngüso tü lung haove wekülu ajekhaiu pungkü aya nai chhikü shitsün lilu ashanshi ta ngionai ngüso angja nai noi-e ta ataotumhoi nou ngela.

20Ngüso khukü noitsün taoko ngüsoüh Mosa naiuso Aron ne sauhaiüh ngüso tü taiukü noiküla ngüne ko phete. 21Ngüsoüh Mosa naiuso Aron tü ngiom, “Apaou nou asamüh chhitsün epaniu, naiuso nokpao si apa khemko asonghoi sam chinyanitsün thaiutha asam hao angja kiu-e. Asamüh ngüsotü sam loatao awan kiuwaniu.”

Mosa Apaou thako Namnam

22Nungai Mosa Apaou dongai laokü khukü ngiom, “Apaou, ni akhaiuniaso tü tsümeikü kankei? 23A thaiutha ko ngo nokpao dongai khukü chitetsün lektso, apaüh ngüso thangmangkü kankei. Naiuso ni ngüso hachuau titso tsüchhikiu!”

ASIO THSAMLAI

©2005 Bible Society of India

More Info | Version Index