Search form

Aniasan 6

1Nungai Apaou nou Mosa tü ngiom, “Lo ngo nokpao tü ti chhi-e nung ni eppe. Ngo jü khaiuniaso khu-iau apa tü thsüokü thoi-e. Atsüoting naito, ngo ngüso nokpao goumchi ainou tha-ankü komanau nokpao tü thsüokü thoi-e.”

Goa nou Mosa Jonji:

2Goa nou Mosako chitekü ngiom, “Ngo Apaou noin. 3Ngo Abraham, Isak, naiuso Yakob dongai Akongting Goa tsakli sungh; Ngo jünian Apaou nou tsünge-ikü noiküla. 4Naiuso Kanan goumchi tiko ngüso sansaoli saokü noiküla, nung goumchi ngüso hau kiuau ngo ngüso ko athalu-e shaniu. 5Lo ngo Israel thsoso Ijip hai sua aküo nai noikü ngettsün lula-iu, naiuso ngo jü athalu-e yangsaniu. 6Nungtiphe Israel thsoso tü ngo ngioji ta lüngio, ‘Ngo Apaou noin; Ngo asam Ijip hai thsale ainou niasane, naiuso ngüso sua iulatsün aküo ainou asam kipsane, naiuso ngo jüpha oukongting nou loksankü mikhem asongting kankü shi-e, ngo asam kipsane. 7Ngo asam jü khaiunia au shane, naiuso ngo asam Goa the-e. Asam Ijip sua aküo ainou tilai ngo sokthame asamüh ngo Apaou asam Goa ta nge-e. 8Ngo Abraham, Isak, naiuso Yakob tü ngiomong thaloukü taiutsün goumchi nai ngo asam niakü shi-e; naiuso ngo nung goumchi asam hau atha goumchi au kiu-e, Ngo Apaou noin.’” 9Mosaüh nung ngio nou Israel thsoso hau chiten, lüko ngüsoüh apa tü tsüanglu, tiautenai ngüso onthso saokü sua akhosak aküo nou lotheankü noiküla.

10Nungai Apaou nou Mosa tü ngiom, 11“Ijip nokpao dongai khukü apa tü Israel thsoso apa goumchi ainou khu-iaulu noin ta lüchite.”

12Lüko Mosaüh thalakü ngiom, “Israel thsosoüh lüko ngütü tsüanglu, nungaito nokpao nou anglu-e süne? Ngo ngiosingio tsü monchitetsün noin.”

13Apaou nou Mosa naiuso Aron tü thoilutkü ngiom, “Israel thsoso naiuso Ijip nokpao tü Israel thsoso Ijip ainou khuau Ngo ngiokhem kiuwaniu ta lüchite.”

Mosa naiuso Aron Tsammong Sattaiutsün:

14Yakob thso yamchong Reuben tü melothso püle chetlut: Ngüso-Hanok, Pallu, Hezron, naiuso Karmi, nungso paosiposo kau nian ngüso nianphi noin. 15Simeon tü melothso luok chetlut: ngüso-Jemuel, Jamin, Ohad, Jakin, Zohar, naiuso Shaul, (nungso Kanan nyiuhai tsangkü chetluttsün noin), -nungso paosiposo kau nian lüko ngüso kau nian lüko ngüso nianphi noin. 16Levi tü melothso süme chetlut: ngüso-Gershon, Kohat, naiuso Merari- ngüso paosiposo kau nian lüko ngüso nianphi noin. Levi aakihlaiu pon 137 kih. 17Gershon tü melothso nime chetlut: ngüne-Libni, naiuso Shimei, ngüso thsaosithsoso piakü noiküla. 18Kohat tü melothso püle chetlut: ngüso-Amram, Izhar, Hebron, naiuso Uzziel. Kohat aakihlaiu pon 133 kih. 19Merari tü melothso nime chetlut: ngüne-Mahli naiuso Mushi. Nungso Levi kau ngüso thsaosithsoso hakü noin.

20Amramüh apa tsammongnyiu au apa po nio Jokebed lo, küta apa hau nung nyiuhai nou Aron naiuso Mosa chetlutkiu. Amram aakihlaiu pon 137 kih. 21Izhar tü melothso süme chetlut: ngüso-Kora, Nephek, naiuso Zikri. 22Uzziel tü lüko melothso süme chetlut: ngüso- Mishael, Elzafan, naiuso Sitri.

23Aronüh Nashon nio Aminadab menyiuthso Elisheba tsamsigoh yang; nung nyiuhai nou apa hau Nadab, Abihu, Eleazar, naiuso Ithamar chetkiu. 24Kora tü melothso süme chetlut: ngüso-Asir, Elkana, naiuso Abiasap, nungso Kora kau janpektsün paosipo noiküla. 25Mosa thso Eleazarüh Putiel menyiuthsoso ong ainou tsak tsamsigoh yang, nung nyiuhai nou Phinihas chetkiu. Nung Levi mele nai naiuso kau nouso ai ahei noiküla.

26“Israel meleso Ijip ainou aniasan” ta Apaou nou ngiokü shitsün khaiunia Aron naiuso Mosa noiküla. 27Ijip nokpao tü Israel thsoso ajashi ta chitetsün khaiuniahoi ngüso noiküla.

Mosa naiuso Aron tü Apaou ün Athoiluttsün:

28Tilai Mosa tü Apaou nou Ijip goumchi ko chitekü noiküla, 29apaüh ngiom, “Ngo Apaou nou. Ngo ni tü ngiotsün Ijip nokpao hau lüchite.”

30Lüko Mosaüh thalakü ngiom, “Ngo ngio tsümon chitetsün ta ni ngeji; nokpao nou titi thekü ngü tü anglu-e?”

ASIO THSAMLAI

©2005 Bible Society of India

More Info | Version Index