Search form

Apung 12

Goa nou Abram Jonsantsün

1Apaou nou Abram tü ngiom, “Agoumchi, atsammongso, naiuso apo tsam leankü ta ngo ni tü hanao noitsün goumchi tsak ai lükhu. 2Ngo ni hao thsaosithsoso piakü ouk kiu-e, küta ngüso mele asongting tsak iula-e. Ni ouk tsak noiau ngo ni ouk kiu-e, naiuso anian losungkiu-e.

3Sauhaiüh ni ouk kiu-e ngo ngüso ouk kiu-e,

Lüko sauhaiüh ni athesan kiu-e ngo ngüso athesan kiu-e.

Naiuso ni tsangkü ngo mele apem ouk kiu-e.”

4Tilai Abram achetpon 75 noiküla, Apaou nou apa tü chhiao ngiotsünli, apa Haran goumchi ainou tsalokü khu, naiuso Lot apa ko khuha. 5Abramüh apa tsammongnyiu Sarai, apa le Lot, naiuso akamsantaiu nou jengtsaiu apem, naiuso Haran nai kih taoko Sua hoi thalotaiutsünso ngüso niakü Kanan goumchi thaiutha tsalokü khu.

Tilai ngüsoüh Kanan goumchi nai shisaom, 6Abram Shekem nai asio thang More ün asio pai tsak dongai moshikün lektso (Nung taoko nai lüko Kanan to tsülaokü kihkü noiküla.) 7Apaou nou Abram khako sungküta ngiom, “Athsaosithsoso hao ngo kiuao noitsün goumchi nou nung noin.” Nai Abramüh Apaou sau apa khako sungkü noiküla apa thaiutha asio amthang tsak lahkiu. 8Nungphiai apa Bethel ainou ajepekai noitsün king goh nai soikü khu küta Bethel si Ai ne ajepekai seikü apaüh nejenkhio la. Nungko lüko apaüh asio amthang tsak shan küta Apaou tü amkham. 9Nungko nou apa athang tsakai nou tsakai ta tsakeikü Kanan goumchi tü ajepeki nai khukü noiküla.

Abram Ijip nai

10Nung taoko Kanan nai naiusile tsak noiküla, nungtiphe Abram Ijip nai kih ao thaiutha saom, tiautenai Kanan nai naiusile nou thatü thsüokü noiküla. 11Tilai apa Ijip elung yankü napao noiküla, apaüh apa tsammongnyiu Sarai tü ngiom, “Ni aluao aleng amei nyiuhai tsak noin. 12Tilai Ijip haiüh ni epe, ngüsoüh ni jü tsammongnyiu ta yangküta, ngüsoüh ni taiukü ngo loatte. 13Ngüso hao ni jünio ta lüchite, nungaito aküoko ngüsoüh ngo aa taiu-e, naiuso meikü paotsange.” 14Tilai apaüh Ijip nai napao elung nou yan, Ijip haiüh apa tsammongnyiu athapao aleng thatü meikü ep. 15Farao nokpao khemko asonghoi ajantsoüh nung nyiuhai nou ep, küta nokpao khako apa titi athapao aleng amei tsak ta chite; nungtiphe nyiuhai nou nokpao tsamai nialokü shin. 16Nung nyiuhai nou shioko nokpao nou Abram tü meikü kankei, küta apa hao onnemok si Won hoi, thainian hoi, gado hoi, tsamki hoi, naiuso ut hoi ta kium.

17Lüko nokpao nou Sarai nialo nou shioko, Apaou nou nokpao tü naiuso apa tsamai khaiunia nouso tü akiathe thsüokü tsak hong. 18Nungai nokpao nou Abram jonkü ngiom, “Ni ngü tü chhitsün nung ti? Tiauta ni apa atsammongnyiu ta tsüchite? 19Tiauta ni apa anio ta ngiom, küta ngü hao apa jü tsammongnyiu hao lou in? Atsammongnyiu nungai noin; apa nialoküta lükhuwan!” 20Nokpao nou apa khaiuniaso tü ngiokhem kiu, küta ngüsoüh Abram ko apa tsammongnyiu naiuso apaüh taiutsün apem lokü nungh goumchi ainou yanan.

ASIO THSAMLAI

©2005 Bible Society of India

More Info | Version Index