Search form

Apung 13

Abram naiuso Lot Pungeji

1Abram, ajepeki goumchi ainou ajenapki Kanan goumchi nai apa ko tsammongnyiu naiuso apaüh taiutsün chikü naiuso Lot hakü sungh. 2Abram onnemok si Won, naiuso amao thainian nouso ko naiuso loüh chaiou lakkeng naiuso tangkason nai thatü memei noiküla. 3Apaüh nungso wanküta athang tsak ainou tsak ai ta tsakeikü Bethel dongai khu. Apaüh Bethel naiuso Ai jetko nung thaiuko tsamlahtsün athang tsak nai shisaom, 4küta amkham thang tsak shan, nungko apaüh Apaou tü amkham.

5Lotüh lüko apa tsammongso naiuso tsamkihoi nouko thainian: onnemok hoi, naiuso won hoi taiuküla. 6Naiuso ngüso aikü kamkiao thsanyan noitsün goh nou tsüsaiu, tiautenai ngüsoüh thainian piakü taiuküla. 7Nungtiphe Abram ün thainian jimtsünso si Lot ün thainian jimtsünso jetko ali-e nou sungh. (Nungtaoko nai Kanan hai naiuso Perez hai nung goh nouko kihküla.)

8Nai Abramüh Lot tü ngiom, “Je nemtso tsammong noin, akhaiuniaso si jü khaiuniaso jetko ali-e tsünoi-ela. 9Nungtiphe sam pungekü noiko; ni aiutsün gohthang tsak lücholo. Ni yam tsak ai lükhu, naiuso ngo yam tsak ai khu-e.”

10Lotüh Yordan tsamei tü Zoar saokü lemkü thap, küta Apaou aimong khekkü, tsüdekünai Ijip goumchi khekkü, khiam saiukü noitsün apaüh epm. (Nung Apaou nou Sodom naiuso Gomora noknio nouso molomowankün khako noiküla.) 11Nungtiphe Lotüh Yordan tsamei apem apa thaiutha hao cholo, küta ajepek dongai apa soikü khu, ngüso tsaküh tsak ainou punge. 12Abram Kanan goumchi ai noi, naiuso Lot tsamei goh nai noknio nouso ongko Sodom shimkü apa nejenkhio shankü kih, 13nungko kihtsün khaiunia nousoüh akausai naiuso Apaou thako angei sunhetsün chhisiyakü noiküla.

Abram Hebron nai Khuji

14Lot pungekü khukütünai, Apaou nou Abram tü ngiom, “Ni tiai noin, nungko yalokü thatü thsüokü goh lemkü aniokün püle nai lüthaplu. 15Tiautenai ti goumchi ni epji, nung chikü ni hao, naiuso athsaosithsoso hao, ngo athon tsüyangkü hao kiu-e; 16ngüso tü wetsünko to goumchi nai singtso nou tü ve naibao siutso-e! 17Atsalo, khukü goumchi apem tü lüthaplu, tiautenai ngo nung apem ni hao kiuao noin.” 18Nungtiphe Abramüh apa nejenkhio kankü shikü, Hebron nai noitsün, Mamre tsamei nai paiso nai noi, küta apaüh nungai Apaou tü amkham ao asio amthang tsak shan.

ASIO THSAMLAI

©2005 Bible Society of India

More Info | Version Index